អាអាជ្ញាធរស្រុកស្អាង បានសហការជាមួយសមត្ថកិច្ច នៅព្រឹកថ្ងៃទី១៩ ខែមិថុនា ឆ្នាំ២០១៤ បានរៀបចំពិធីសំណេះសំណាលជាមួយ ពលករខ្មែរជាច្រើននាក់ ដែលទើបវិលត្រឡប់មកពីប្រទេសថៃ។
លោក ឃឹម ចាន់គីរី អភិបាលស្រុកស្អាងមានប្រសាសន៏ថា ការជួយសំណេះសំណាលជាមួយពលករនៅព្រឹកនេះ គឺដើម្បីចង់ដឹងសុខទុក្ខរបស់ពួកគាត់ ក៏ដូចជាធ្វើការអប់រំណែនាំឲ្យពួកគាត់ត្រិះរិះពិចារណារ ក្នុងការធ្វើស្វែងរកការងារធ្វើក្នុងស្រុក ជាជាងការធ្វើចំណាកស្រុកទាំង ប្រថុយប្រថានអាចនាំឲ្យគ្រោះថ្នាក់ដល់ខ្លួនឯង។
ក្នុងពិធីសំណេះសំណាលនេះ លោកអភិបាលក៏បានបញ្ជាក់ថា ក្នុងនាមជាអាជ្ញាធរដែលស្គាល់ពីសុខទុក្ខរបស់ពលរដ្ឋ លោកនឹងខិតខំគៀងគរវិនិយោគិន ទាំងក្នុងស្រុកនិងក្រៅស្រុក ក្នុងការបង្កើតរោងចក្រសហគ្រាសឲ្យបានកាន់តែច្រើន ទៅតាមលទ្ឋភាព ដើម្បីផ្តល់ការងារ ដល់ពលរដ្ឋយើងធ្វើនៅក្នុងស្រុកឲ្យបានគ្រប់ៗគ្នា ព្រមទាំងផ្តល់ប្រាក់កំរៃរស់នៅសមរម្យ។
ជាមួយគ្នានេះលោក សេង សុជាតិ អធិការស្រុកស្អាង ក៏បានពាំនាំការសួរសុខទុក្ខពីសំណាក់ អភិបាលខេត្តនិងស្នងការខេត្ត ដែលលោកមិនបានចូលរួមក្នុងកម្មវិធីសំណេះសំណាលនេះ ដោយសារមានភារកិច្ចរវល់។ យ៉ាងណានោះទាំងរដ្ឋាភិបាល ទាំងអាជ្ញាធរខេត្តស្រុក តែងយក ចិត្តទុកដាក់ចំពោះពលករ ដូចជាការផ្តល់អាហារហូបចុក និងចំណាយថវិកាក្នុងការដឹកជញ្ជូន វិលត្រឡប់មកដល់លំនៅដ្ឋានវិញ។
គួបញ្ជាក់ថានៅក្នុងស្រុកស្អាង មានប្រជាពលរដ្ឋចំនួន២៤០០០០នាក់ ក្នុងនោះមានប្រជាពលរដ្ឋប្រមាណជាជាង ១៧០០០នាក់ បានធ្វើចំណាកស្រុកទៅរកការងារ ធ្វើនៅតាមទីប្រជុំ ផ្សេងៗទាំងក្នុងស្រុកនិងក្រៅស្រុក ហើយរហូតមកទល់ពេលនេះ អាជ្ញាធរស្រុកបានទទួលពលករដែលទើបវិលត្រឡប់មកពីស្រុកវិញចំនួន ៥២៩នាក់។ ក្រោយពីពិធីសំណេះសំណាល នោះលោក សេង សុជាតិ ក៏បាននាំយកថវិការបស់ស្នងការខេត្តកណ្តាល ចែកជូនពលរដ្ឋ ចំនួន៣៧នាក់ ក្នុងម្នាក់ៗ២ម៉ឺនរៀល និងថវិការបស់លោកអភិបាលស្រុកក្នុងម្នាក់១ម៉ឺនរៀល ថែមទៀត៕