កំពង់ឆ្នាំង៖ វិស័យទេសចរណ៍គឺជាឧស្សាហកម្មធម្មជាតិដ៏រស់រវើកមួយ ដែលនៅតាមបណ្តារខេត្តមួយចំនួនមានព្រៃឈើធម្មជាតិ ទឹកជ្រោះភ្នំជ្រលងដងអូរស្ទឹង បឹងបួរជាច្រើនក្នុងនោះផងដែរ សួនឧទ្យាននៅក្នុងទីក្រុង ទីប្រជុំជនក៏ជាចំណែកមួយយ៉ាងសំខាន់ក្នុងការទាក់ទាញអារ
ម្មរណ៍ភ្ញៀវទេសចរណ៍អោយមកលំហែរកំសាន្ត និងថតផ្តឹតរូបភាពទុកអនុស្សាវរីយ៍ផងដែរ ដែលយើងទាំងអស់គ្នាត្រូវតែចាប់អារម្មណ៍ថែរក្សាការពារ។
នៅក្នុងអាណត្តិរាជរដ្ឋាភិបាលដែលដឹកនាំដោយសម្តេចតេជោ ហ៊ុន សែន និងក្រោមការគ្រប់គ្រងដឹកនាំក្នុងអាណត្តិនិមួយៗរបស់ លោកអភិបាលខេត្តកំពង់ឆ្នាំងគ្រប់ជំនាន់ មានលោក ភោគ សាមឿន លោក ស៊ូ ភិរិន្ទ លោក ទូច ម៉ារីម និងបច្ចុប្បន្នលោកឈួរ ចន្ត័ឌឿន ក្នុងវិស័យទេសចរណ៍និងវិស័យផ្សេងៗទៀតបានធ្វើអោយខេត្តកំពង់ឆ្នាំង មានការីចំរើនជាបន្តបន្ទាប់ធ្វើអោយជីវភាពប្រជាពលរដ្ឋកាន់តែធូរធានិងប្រសើរឡើង។
ជាក់ស្តែងនៅក្នុងក្រុងកំពង់ឆ្នាំងបច្ចុប្បន្នមានសួនឧទ្យានចំនួន៥កន្លែងគឺៈសួននិមិត្តសញ្ញាឆ្នាំងមាសរបស់ខេត្តកំពង់ឆ្នាំងនៅដំរី.ស ក្នុងភូមិទួលក្រឡាញ់ សួនឧទ្យានរិទ្ធសែននាងកង្រីនៅមុខមន្ទីរពេទ្យខេត្តកំពង់ឆ្នាំង សួនឧទ្យានដើមពោធិនៅមុខស្នងការដ្ឋាននគរបាលខេត្ត សួនឧទ្យានកុមារនៅមុខសាលាខេត្ត និងសួនឧទ្យានត្រីកាហោ និងនាងសុវណ្ណមច្ឆានៅមាត់ទន្លេផ្សារក្រោម។
លោក ប្រធានមន្ទីរទេសចរណ៍ខេត្ត បានអោយដឹងថា៖សួនឧទ្យានទាំង៥កន្លែងនៅតាមចំណុចខាងលើនេះ ត្រូវបានទាក់ទាញភ្ញៀវទេសចរណ៍ជាតិអន្តជាតិ អោយមកលេងកំសាន្តក្នុងមួយខែៗរាប់ពាន់នាក់ ពិសេសគឺសួនឧទ្យានត្រីកាហោ និងនាងសុវណ្ណមច្ឆានៅមាត់ទន្លេផ្សារក្រោមដែលទាក់ទាញភ្ញៀវបានច្រើនជាងគេ។ក្រៅពីសួនឧទ្យានទាំង៥កន្លែងខាងលើនេះ ទីប្រជុំជនផ្សារលើនិងផ្សារក្រោម ក៏ជាចំណុចប្រមូលផ្តុំរបស់ភ្ញៀវទេសចរណ៍ចូលមកទិញដូររបស់ប្រើប្រាស់ ហូបចុកផងដែរ ដែលគួរតែមានសណ្តាប់ធ្នាប់ល្អ។
នៅក្នុងការប្រជុំវេទិកាសេរីក្នុក្រុងកំពង់ឆ្នាំងកន្លងមក លោក ឈួរ ចន្ទ័ឌឿន អភិបាលខេត្តកំពង់ឆ្នាំង បានអំពាវនាវដល់មន្ត្រីរាជការគ្រប់អង្គភាព អាជ្ញាធរគ្រប់ជាន់ថ្នាក់ និងប្រជាពលរដ្ឋក្នុងក្រុងកំពង់ឆ្នាំងទាំងអស់ត្រូវចូលរួមអោយបានទាំងអស់គ្នាក្នុងផែនប្រឡងប្រណាំងធ្វើអនាម័យអោយ ទីក្រុងស្អាត រមណីយដ្ឋានស្អាត សេវាល្អ ដើម្បីទាក់ទាញភ្ញៀវទេសចរណ៍អោយមកកំសាន្តក្នុងទីក្រុងកំពង់ឆ្នាំង។បើមានភ្ញៀវទេសចរណ៍មកកំសាន្តច្រើននោះជីវភាពប្រជាពលរដ្ឋ អាជីវករលក់ដូរ អ្នករត់ម៉ូតូ អ្នកបើករថយន្តតាក់ស៊ី អ្នកបើកការណូតទេសចរណ៍របស់យើងនិងមានជីវភាពធូរធាមិនខានឡើយ៕