ដោយមានការឧបត្ថម្ភគាំទ្រថវិកាពីអង្គការហេហ្វឺកម្ពុជា(HEIFER)ប្រចាំរាជធានីភ្នំពេញនិងមានកិច្ចសហការរៀបចំពីសំណាក់អង្គការសេវាកម្មអភិវឌ្ឍន៍ជនពិការហៅកាត់ថា(DDSP) ជាមួយនឹងអង្គការព្រហ្មវិហារធម៌ខេត្តពោធិ៍-សាត់នោះ ក្នុងពេលកន្លងទៅថ្មីៗនេះ នៅសណ្ឋាគារសេនជូរី
លោកស្រី ជុក សុផានី អភិបាលរង នៃគណៈអភិបាលខេត្តពោធិ៍សាត់ បានអញ្ជើញជាអធិបតីភាព ក្នុងសិក្ខាសាលាមួយស្តីពីគម្រោងបង្កើតប្រាក់ចំណូលនិងអា-ហារូបត្ថម្ភតាមរយៈការពង្រឹងសិទ្ធិជាម្ចាស់ដល់សហគមន៍ដែលពិធីខាងលើនេះមានការអញ្ជើញចូលរួមពីសំណាក់តំណាងអាជ្ញាធរស្រុកក្រគរអាជ្ញាធរឃុំចំនួន០៤គឺៈឃុំស្នាអន្សាអន្លង់ត្នោតត្នោតជុំបឹងកន្ទួតរបស់ស្រុកក្រគរ មន្ទីរជំនាញពាក់ព័ន្ធមួយចំនួនក្នុងខេត្ត និងតំណាងសហគមន៍ទាំង០៤ឃុំ សរុបៈ៨០នាក់។
លោកផែង សំណាង នាយកអង្គការ (DDSP) និងលោកអ៊ុយ ចាន់ថន ប្រធានគ្រប់គ្រងកម្មវិធី របស់អង្គការហេហ្វឺ បានមានប្រសាសន៍ថា ការរៀបចំសិក្ខាសាលានេះឡើង គឹដើម្បីផ្សព្វផ្សាយឲ្យប្រជាពលរដ្ឋនិងសហគមន៍ យល់ដឹងថា ៖ កន្លងមក អង្គការរបស់លោក បានធ្វើការឧបត្ថម្ភគាំទ្រទៅដល់សហគមន៍ នូវគម្រោងខ្នាតធំ ដូចជា គោ ក្របី។ល។ និងគម្រោងខ្នាតតូចខ្លះផងដែរ តែបច្ចុប្បន្ននេះ អង្គការលោក ធ្វើការផ្លាស់ប្តូរទិសដៅ មកអនុវត្តតែគម្រោងខ្នាតតូច ដូចជា៖ ការចិញ្ចឹមជ្រូក មាន់ ទា ធ្វើសួនដំណាំ សន្សំប្រាក់ចំណូលនិងឥណទាន និងអាហារូបត្ថម្ភ ដោយបើកទីផ្សារឲ្យទូលាយ សម្រាប់អនុវត្តគម្រោងក្នុងរយៈពេលខ្លីអាចទទួលផលបានឆាប់រហ័សហើយពួកគាត់ អាចទទួលខុសត្រូវ ក្នុងការផ្ទេរគម្រោងទៅឲ្យអ្នកបន្ទាប់ទៀតបាន ដែលករណីទាំងនេះ ស្របទៅនឹងគោលនយោបាយចតុកោណរបស់រាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាពលរដ្ឋផងដែរ។
បន្ទាប់មក លោកស្រី ជុក សុផានី បានថ្លែងអំណរគុណ ចំពោះអង្គការទាំងពីរខាងលើ ដែលបានយកចិត្តទុកដាក់ ជួយគាំទ្រដល់សហគមន៍ ឲ្យស្របទៅនឹងសភាពការជាក់ស្តែង និងភាពចាំបាច់របស់ពួកគាត់។លោកស្រីបានសំណូមពរសុំឲ្យអាជ្ញាធរមូលដ្ឋាន និងជំនាញពាក់ព័ន្ធក្នុងខេត្ត សហការជាមួយអង្គខាងលើ ក៏ដូចជាបណ្តាអង្គការ និងសង្គមស៊ីវីលនានា ជួយជម្រុញនូវមុខរបរខ្នាតតូច អាហារូបត្ថម្ភ ការអប់រំ អនាម័យ បរិស្ថាន។ល។ ឲ្យចំគោលដៅ ប្រកបដោយប្រសិទ្ទិភាព និងនិរន្តរភាព ដល់ជនងាយរងគ្រោះនិងជនពិការ ។ជាពិសេស បងប្អូនប្រជាពលរដ្ឋ ត្រូវយកចិត្តទុកដាក់ ទៅលើការប្រកបមុខរបរក្នុងស្រុក ប្រសើរជាងធ្វើចំណាកស្រុក ទៅប្រទេសជិតខាងដោយខុសច្បាប់។
សូមបញ្ជាក់ថា គម្រោងបង្កើនប្រាក់ចំណូល និងអាហារូបត្ថម្ភ តាមរយៈការពង្រឹងសិទ្ធិជាម្ចាស់ដល់សហគមន៍ បានចាប់អនុវត្តពីខែសីហាឆ្នាំ២០១៣ រហូតដល់ខែមិថុនាឆ្នាំ២០១៧ ដែលមានអ្នកទទួលផលពីគម្រោង ចំនួន២ម៉ឺនគ្រួសារ ក្នុងនោះ គ្រួសារដំបូង ចំនួន៥ពាន់ និងគ្រួសារទទួលបន្ត ចំនួន១ម៉ឺន៥ពាន់ ប្រើថវិកាសរុបៈ2,581,121.00$ ដែលក្នុងនោះ ថវិកាវិភាជន៍ពីសហគមន៍ 756,850.00$ និងថវិកាពីអង្គការហេហ្វឺ1,824,217.00$ ៕