ភ្នំពេញ ៖ បុរសម្នាក់ដែលទើបតែចេញពីខារ៉ាអូខេយីហោ ស៊ីធីឡាយ សង្ស័យស្រវឹងបានថយរថយន្តលុចស៊ីស៤៧០ ក្នុងល្បឿនលឿនឆ្លងផ្លូវជ្រុលទៅបុកនិងរថយន្តរ៉េវហ្វ័រមួយគ្រឿងដែលចតនៅម្ខាងផ្លូវទល់មុខផ្សារទំនើបស៊ីធីម៉លបណ្ដាលអោយអូសរុញផ្ទប់ទៅនិងជញ្ជាំងគាបជាប់រងការខូចខាតយ៉ាងដំណំ ដែលហេតុការណ៍នេះបានកើតឡើងកាលពីវេលាម៉ោង៩និង៤០នាទីយប់ថ្ងៃទី១៧ខែកុម្ភៈឆ្នាំ២០១៤ នៅទល់មុខផ្សារទំនើបស៊ីធីម៉ល ស្ថិតក្នុងសង្កាត់វាលវង់ ខណ្ឌ៧មករា។
សមត្ថកិច្ចដែលចុះមកដល់កន្លែងកើតហេតុបានអោយដឹងថា នៅមុខពេលកើតហេតុគេបានសង្កេតឃើញរថយន្តមួយគ្រឿងម៉ាកលុចស៊ីស៤៧០ ពណ៌ស្ករ ពាក់ស្លាកលេខ ភ្នំពេញ 2M-8837 ដែលបើកដោយបុរសម្នាក់ទើបតែចេញពីហាងខារ៉ាអូខេយីហោ ស៊ីធីឡាយ ហើយគាត់ក៏បានថយរថយន្តចេញពីហាងនោះក្នុងល្បឿនលឿនក៏បានជ្រុលទៅបុករថយន្តរ៉េហ្វ័រ
មួយគ្រឿង ពណ៌ទឹកប្រាក់ គ្មានស្លាកលេខ ដែលម្ចាស់រថយន្តទើបតែទិញជិះបានកន្លះខែ ចតនៅម្ខាងផ្លូវបណ្ដាលអោយអូសរុញផ្ទប់ទៅបុកនិងជញ្ជាំងផ្សារទំនើបផ្សារទំនើបស៊ីធីម៉ល បណ្ដាលអោយបាក់គាបជាប់និងជញ្ជាំងរងខាងខូចខាតខ្ទេចមួយជំហៀងរថយន្ត ចំណែករថយន្តលុចស៊ីសបង្កបានរងការខូចខាតផ្នែកខាងក្រោយស្ទើរទាំងស្រុង។
បន្ទាប់ពីកើតសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចរាចរអោយចុះមកវាស់វែងនៅកន្លែងកើតហេតុរួចក៏សម្របសម្រួលអោយភាគីទាំងសងខាងដំណោះស្រាយគ្នានៅកន្លែងកើតហេតុ ហើយក៏ម្ចាស់រថយន្តលុចស៊ីបង្កហេតុនេះព្រមទទួលសងរាល់ការខូចខាត ថែមទាំងសងរថយន្តថ្មីអោយម្ចាស់រថយន្តរ៉េវហ្វ័ររងគ្រោះខាងលើដែលមានតម្លៃ១១៥០០
ដុល្លារផងដែរ ហើយចំពោះរថយន្តរេហ្វ័រដែលរងការខូចខាតនេះម្ចាស់រថយន្តលុចស៊ីសព្រមទទួលយកមករក្សាទុកខ្លួនឯងព្រោះមិនចង់មានរឿងតទៅមុខទៀត។គួរបញ្ជាក់ផងដែរថា ចំពោះករណីចរាចរនេះមិនបណ្ដាលអោយមានមនុស្សរងរបួសឡើយ គឺគ្រាន់តែរងការខូចខាតទ្រព្យសម្បត្តិខ្លួនតែប៉ុណ្ណោះ៕ 
