ខេត្តបន្ទាយមានជ័យ៖ ច្រកបៀងអូរបីរជាន់ គឺជាច្រកមួយឋិតក្នុងចំណោមច្រករបៀងតាមព្រំដែនកម្ពុជាថៃ ច្រកមួយនេះសព្វថ្ងៃកំពុងតែចេញទំនិញគេចពន្ធ មានដូចជា ជ្រូកក្រហម សត្វបក្សី សត្វឆ្កែ ប្រហិត ហ្គាស និងរបស់ផ្សេងៗទៀតយ៉ាងគគ្រឹកគគ្រេង ដូចបាក់ទំនប់បើតាមការអះអាងពីប្រជាពលរដ្ឋនៅទីនោះបាននិយាយថា ការចេញទំនិញគេចពន្ធនោះបានដោយសារសមត្ថកិច្ចនៅទីនោះបានលាភសក្ការៈពីឈ្នួញទាំងនោះគ្រប់ៗគ្នាទើបរឿងទាំងនេះស្ងាត់យ៉ាងដូច្នេះ ។
ឈ្មួញរកស៊ីដឹកជ្រូកក្រហមចេញមកពីថៃរាប់ពាន់ក្បាលស្របច្បាប់បានបង់ពន្ធរដ្ឋគ្រប់ចំនួនបាននិយាយប្រាប់អ្នកយកព័ត៌មានឲ្យដឹងថា៖ សព្វថ្ងៃនេះលោកមិនហានរកស៊ីខុសច្បាប់ក្នុងព្រះរាជាណាច ក្រ កម្ពុជានោះឡើយ លោកធ្វើអ្វីៗគឺស្របច្បាប់ដែលប្រទេសកម្ពុជាបានកំណត់ឲ្យទាំងអស់ ឧទាហរណ៍ ដូចជាលោកបានដឹកជ្រូកក្រហមទាំងពាន់ៗក្បាលចូលមកលក់ក្នុងប្រទេសខ្មែរនោះ ដោយស្របច្បាប់បំផុត ជ្រូកទាំងនោះលោកត្រូវបង់ពន្ធចំណូលចូលរដ្ឋដោយពុំមានការខ្វះ១កាក់១សេនឡើយ ហើយយកមកលក់ជូនអ្នកកាប់ក្នុងតាមខេត្តនោះក៏ចំណេញបានតិចតួចបំផុតដែរ ។
លោកបាននិយាយបន្តថា៖ តែចំពោះអ្នករកស៊ីខុសច្បាប់ក្នុងស្រុកខ្មែរនោះគេពុំបាច់យកលុយទៅបង់ពន្ធជូនរដ្ឋស្រស់ៗដូចគាត់ដែរ គ្រាន់តែធ្វើការទំនាក់ទំនងលោកពេទ្យសត្វ និងមន្ត្រីពាក់ព័ន្ធនៅតាមច្រករបៀងទាំងនោះគឺអាចនាំទំនិញគេចពន្ធបានយ៉ាងងាយ ។ ឧទាហរណ៍មានឈ្មួញចំនួន៤នាក់ សុំមិនបញ្ចេញឈ្មោះ ឈ្មួញទាំងនោះកំពុងតែធ្វើការទំនាក់ទំនងដល់មន្ត្រីពេទ្យសត្វនិងសមត្ថកិច្ចឈរជើងតាមច្រករបៀងអូរបីជាន់ និងច្រកទំនប់ដាច់ សព្វថ្ងៃនេះឈ្មួញទាំងនេះកំពុងតែនាំចេញទំនិញគេចពន្ធយ៉ាងសន្ធឹកសន្ធាប់ដូចជា មាន់ ប្រហិត សាច់ឆ្កែ ហ្គាស ជាពិសេសគឺជ្រូកក្រហមតែម្ដង យកមកលក់តាមផ្សារក្នុងខេត្តបន្ទាយមានជ័យជាហូរហែដោយពុំបានបង់ពន្ធជូនរដ្ឋ១កាក់១សេនឡើយ ។ ធ្វើឲ្យចំណូលចូលរដ្ឋក្នុង១ឆ្នាំខាតបង់ស្ទើររាប់លានដុល្លា ។
លោកបាននិយាយបន្តថា៖ ឈ្មួញទាំងអស់នោះគេតែងតែដឹកទំនិញគេចពន្ធទាំងនោះចូលមកក្នុង ទីរួមខេត្តបន្ទាយមានជ័យយប់ជ្រៅម៉ោង១ ម៉ោង២ទើបបានសុវត្ថិភាពសូម្បីតែ សមត្ថកិច្ចធំៗក្នុងថ្នាក់ខេត្តក៏ពុំបានដឹងការដឹកទំនិញគេចពន្ធយប់ជ្រៅចូលមកខេត្តបន្ទាយមានជ័យនេះបានឡើយ ។
ការដែលទំនិញ គេចពន្ធដូចជា សត្វបក្សី ជ្រូកក្រហមដឹកចូលមកក្នុងប្រទេសកម្ពុជាដោយពុំមានការត្រួតពិនិត្យពីសមត្ថកិច្ចនិងពេទ្យសត្វនោះធ្វើឲ្យប្រជាជនមានការព្រួយបារម្ភយ៉ាងខ្លាំងខ្លាចឈ្មួញទាំងអស់នោះមានការនាំចូលជ្រូកនិងបក្សីផ្ទុកជំងឺផ្សេងៗយកមកឲ្យប្រជាពលរដ្ឋស៊ីនិងអាចមានជំងឺផ្សេងៗទៅថ្ងៃមុខជាមិនខានឡើយ ។
ពាក់ព័ន្ធនឹងការនាំចេញជ្រូកក្រហមនិងបក្សីចូលមកដោយគ្មានការបង់ពន្ធនិងការត្រួតពិនិត្យរបស់ពេទ្យសត្វនោះភ្នាក់ការងារអ្នកយកព័ត៌មានបានទូរស័ព្ទទៅលោក ហ៊ុយ ទូច ប្រធានការិយាល័យផលិតកម្មនិងបសុព្យាបាលប្រចាំខេត្តបន្ទាយមានជ័យសុំការធ្វើទំនាក់ទំនងនោះពុំបានឡើយព្រោះលោកបាននិយាយថា លោកកំពុងជាប់ប្រជុំនៅសាលាប្រជុំសាលាខេត្តបន្ទាយមានជ័យ ៕
