ក្រុមសាខាមានជ័យទទួលបាន៣ពិន្ទុបន្ថែម បន្ទាប់ពីឈ្នះក្រុមសាខាក្រុងតាខ្មៅខេត្តកណ្តាល ដោយលទ្ឋផល៧ទល់នឹង២ ក្នុងការប្រកួតបាល់ទាត់ដណ្តើមពានរង្វាន់ធនាគារអេស៊ីលីដា ប្រចាំឆ្នាំ២០១៤ នៅលើទីលានខេមរា នាព្រឹកមិញនេះ ។ ក្នុងមួយប្រកួតនេះ ក្រុមសាខាមានជ័យ មានប្រៀប និងកំលាំងបច្ចេកទេសលេងយ៉ាងល្អ ដោយគេអាចរកគ្រាប់បាល់បានផ្ទួនៗគ្នា ចំនួន៧គ្រាប់ ដោយក្នុងតង់ទី១ រកបាន៤គ្រាប់ និងតង់ទី២ រកបាន៣គ្រាប់បន្ថែមទៀត ។
រីឯក្រុមសាខាក្រុងតាខ្មៅខេត្ត កណ្តាល គេក៏បានខិតខំប្រឹងប្រែងយ៉ាងអស់ពីសមត្ថភាពខ្លាំងណាស់ដែរ ប៉ុន្តែគេមានឱកាសរកគ្រាប់បាល់បានសងវិញ តែ២គ្រាប់ប៉ុណ្ណោះ នៅក្នុងតង់ទី២ ។ គួររំលឹកផងដែរថា ការប្រកួតបាល់ទាត់ដណ្តើមពានរង្វាន់ធនាគារអេស៊ីលីដា កាលពីឆ្នាំ២០១៣ លេខ១បានទៅលើក្រុមកំពង់ថ្ម លេខ២ក្រុមការិយាល័យកណ្តាលគ្រុបឌី និងលេខ៣ស្ទួនបានទោក្រុមសាខាបឹងត្របែក និងក្រុមសាខាខេត្តបាត់ដំបង ។
ចំណែកឯប្រកួតជាលក្ខណៈមិត្តភាពវិញ គឺសាខាស្រុកអង្គស្នួល ខេត្តកំពង់ស្ពឺ ចាញ់ក្រោមថ្វីជើងក្រុមចំណូលថ្មី សាខាផ្សារដើមថ្កូវ ក្នុងលទ្ឋផល២ទល់នឹង៥ ។ ថ្វីត្បិតតែក្រុមសាខាផ្សារដើមថ្កូវ ជាក្រុមថ្មីក៏ពិតមែន ប៉ុន្តែកីឡាករនីមួយៗនៅក្នុងក្រុម គឺសុតសឹងមានសមត្ថភាពល្អ ក្នុងការបញ្ចូន គ្របគ្រង និងការទាត់បាល់ទៅកាន់ទីគូប្រកួត ។
ក្រុមសាខាស្រុកអង្គស្នួល នៅក្នុងមួយប្រកួតនេះ គឺគេគ្រាន់តែធ្វេសប្រហែសបន្តិចតែប៉ុណ្ណោះ ដោយលទ្ឋផលតង់ទី១ សាខាផ្សារដើមថ្កូវ នាំមុខបណ្តោះអាសន្ន៣ទល់នឹង០ និងតង់ទី២រកបានម្ខាង២គ្រាប់ដូចគ្នា ៕