លោក នុត ពុធដារ៉ា អភិបាលនៃគណៈអភិបាលខណ្ឌដង្កោ បានចូលរួមជាអធិបតីក្នុងពិធីបើកការដ្ឋានស្ថាបនាផ្លូវបេតុង ចំនួន ០២ខ្សែ ក្នុងសង្កាត់ចំនួន ០២ គឺសង្កាត់ពងទឹក និងសង្កាត់ព្រៃវែង ដោយបានប្រារពឡើងនៅភូមិពងទឹក សង្កាត់ពងទឹក ខណ្ឌដង្កោ។ មានប្រសាសន៍សំណេះសំណាលជាមួយបងប្អូនប្រជាពលរដ្ឋ លោកអភិបាលខណ្ឌបានធ្វើការលើកឡើងអំពីការអភិវឌ្ឍ ពីមួយថ្ងៃទៅមួយថ្ងៃ របស់ប្រទេសជាតិ ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី តួយ៉ាងនៅថ្ងៃនេះ សង្កាត់ពងទឹក និងសង្កាត់ព្រៃវែង បានទទួលផ្លូវបេតុងថ្មីចំនួន ០២ខ្សែ ស្ថិតក្រោមគម្រោងថវិការអភិវឌ្ឍន៍ឆ្នាំ២០១៤ របស់សង្កាត់ ដែលជាផ្លូវបេតុង គ្មានសសៃដែក។
លោកអភិបាលក៏បានផ្តាំផ្ញើរដល់បងប្អូនប្រជាពលរដ្ឋទាំងអស់ដែលរស់នៅតាមបណ្តោយផ្លូវដែលកំពុងស្ថាបនា សូមមេត្តាយោគយល់ដល់ផលប៉ះពាល់តិចតួចដែលកើតឡើងក្នុងពេលស្ថាបនា និងសូមជួយតាមដានទាំងអស់គ្នាអំពីការស្ថាបនាបើពិនិត្យឃើញថាមានបញ្ហាសូមរាយការណ៍បន្ទាន់មកអាជ្ញាធរ សង្កាត់ ខណ្ឌដើម្បីមានវិធានការ។
លោកអភិបាលខណ្ឌ ក៏បានក្រើនរំព្ញកដល់ក្រុមហ៊ុនទទួលការស្ថាបនាផ្លូវនេះសូមធ្វើការស្ថាបនាឲ្យបានត្រឹមត្រូវតាមលក្ខណៈបច្ចេកទេសសំណង់ និងបានទាន់ពេលវេលាជូនបងប្អូនប្រជាពលរដ្ឋក្នុងសង្កាត់ទាង០២បានប្រើប្រាស់។ គួរបញ្ជាក់ថា៖ ផ្លូវទាំង០២ខ្សែនេះ ស្ថិតក្រោមគម្រោងអភិវឌ្ឍន៍សង្កាត់ឆ្នាំ២០១៤ ជាផ្លូវបេតុង គ្មានសសៃដែក អនុវត្តគម្រោងដោយក្រុមហ៊ុន សំ ស៊ីវន ក្នុងនោះ៖ - ០១ខ្សែ ស្ថិតក្នុងភូមិពងទឹក សង្កាត់ពងទឹក មានប្រវែង ២១០ម៉ែត្រ ទទឹង ០៤ម៉ែត្រ កម្រាស់ ០,១៥ម៉ែត្រ - ០១ខ្សែទៀត ស្ថិតក្នុងភូមិត្រពាំងស្វា និងភូមិទ័ពបោះ សង្កាត់ព្រៃវែង មានប្រវែង ២១៣ម៉ែត្រ ទទឹង ០៤ម៉ែត្រ កម្រាស់ ០,១៥ម៉ែត្រ