ក្រោយពីចេញសេចក្តីព្រមានច្រើនឆ្នាំកន្លងមក កាលពីថ្ងៃសុក្រ អាមេរិកបានបញ្ជាក់ថា ប្រទេសថៃ ម៉ាឡេស៊ី និង វ៉េណេហ្ស៊ុយអេឡាជាប្រទេសកំពូលតារាងដែលមិនបានចាត់វិធានការទប់ស្កាត់ការរំលោភសិទ្ធិមនុស្សក្នុងសម័យទំនើបនាពេលបច្ចុប្បន្ននេះ។ ក្រៅពីប្រទេសទាំង៣នេះ នៅមានប្រទេស ហ្គាមបៀ(Gambia) អ៊ីរ៉ង់ កូរ៉េខាងជើង និងស៊ីរី ក៏ស្ថិតក្នុងចំណោមប្រទេសដែលក្រសួងការបរទេសអាមេរិកចាត់ទុកថា ជាប្រទេសដែលមានការព្រួយបារម្ភបំផុតនៅក្នុងបញ្ហារំលោភសិទ្ធិមនុស្ស ហើយដែលអាមេរិកកំពុងពិចារណាឈានដល់ការដាក់ទណ្ឌកម្មផងដែរ។
អង្គការពលកម្មអន្តរជាតិបានប៉ានប្រមាណថា ការរំលោភសិទ្ធិមនុស្សក្នុងមួយឆ្នាំៗមានទឹកប្រាក់១៥០ពាន់លានដុល្លារ ក្នុងនោះ៩៩ពាន់លានដុល្លារបានពីឧស្សាហកម្មផ្លូវភេទ ហើយពលរដ្ឋដែលទទួលរងការរំលោភសិទ្ធិទាំងនោះ មានចាប់ពី២០លាននាក់ដល់២៧លាននាក់នៅទូទាំងពិភពលោក។ របាយការណ៍ខាងលើបានបញ្ជាក់ថា ជនរងគ្រោះដោយការរំលោភសិទ្ធិមនុស្សរាប់ពាន់នាក់គឺនៅក្នុងប្រទេសថៃ ដែលពួកគេទាំងនោះមកពីប្រទេសជិតខាង ។
ពួកគេទទួលរងការធ្វើទារុណកម្ម បង្ខិតបង្ខំឲ្យធ្វើពលកម្ម និងបោកប្រាស់ លក់ឲ្យទៅបម្រើផ្លូវភេទជាដើម ដែលការរំលោភសិទ្ធិមនុស្សនេះកើតឡើងតាំងពីមុនការធ្វើរដ្ឋប្រហារយោធាមកម្ល៉េះ។ ជាងនេះទៀតនោះ នៅតាមឧស្សាហកម្មនេសាទ និងឧស្សាហកម្មកាត់ដេរសម្លៀកបំពាក់ក៏មានការរំលោភសិទ្ធិមនុស្សខ្លាំងក្លាណាស់ដែរ។ ការអនុវត្តច្បាប់ដើម្បីទប់ស្កាត់ការរំលោភសិទ្ធិមនុស្សនៅមានកម្រិត គាបជួនបញ្ហាពុករលួយយារយីផងនោះ។ ប្រទេសថៃបានច្រានចោលរបាយការណ៍លើកឡើងស្តីអំពីរំលោភសិទ្ធិមនុស្សរបស់អាមេរិក ដោយនិយាយថា វាប្រាសចាកពីការពិតឆ្ងាយពេក។ ឯកអគ្គរាជទូតថៃប្រចាំនៅអាមេរិក លោក Vijavat Isarabhakdi បានថ្លែងថា របាយការណ៍នេះមិនស្របទៅនឹងការខិតខំប្រឹងប្រែងរបស់រដ្ឋាភិបាលថៃនោះឡើយ ។
ម៉ាឡេស៊ីក៏ជាប្រទេសស្ថិតក្នុងចំណោមអ្នកដែលរំលោភសិទ្ធិមនុស្សខ្លាំងក្លាណាស់ដែរ។ ក្រុមហ៊ុនជ្រើសរើលពលករភាគច្រើនលក់មនុស្សឲ្យទៅពួកអ្នករត់ពន្ធ ហើយពួកអ្នករត់ពន្ធលក់បន្តឲ្យទៅធ្វើកសិកម្ម នេសាទ និងផ្ទះបន ។ នៅពេលដែលអ្នកទទួលរងការរំលោភសិទ្ធិទាំងនោះរត់គេច ហើយត្រូវអាជ្ញាធរចាប់បាននោះ ពួកគេប្រឈមនឹងការជាប់ពន្ធនាគារ រហូតដល់១ឆ្នាំក៏មាន ។
ជនរងគ្រោះទាំងនោះមិនស្ថិតនៅក្រោមកម្មវិធីការពារតាមច្បាប់នោះឡើយ។ ចំណែកប្រទេសវេណេស្ស៊ុយអេឡាក៏ស្ថិតក្នុងប្រទេសដែលអាមេរិកចាត់ទុកថា បានរំលោភទៅលើសិទ្ធិមនុស្សខ្លាំងក្លាណាស់ដែរ។ ប្រទេសនេះមិនបានសរសេរផែនការអនុវត្តន៍ទប់ស្កាត់ការរំលោភបំពាន់លើបញ្ហាសិទ្ធិមនុស្សឡើយ ៕
