សៀមរាប ៖ នៅថ្ងៃទី២២ មិថុនា ឆ្នាំ២០១៤នេះ គណៈប្រតិភូខេត្តសៀមរាប ដឹកនាំដោយឯ.ឧ ម៉ៅ វុឌ្ឍី អភិបាលរង នៃគណៈអភិបាលខេត្ត និងឯ.ឧ ស៊ូ នី សមាជិកក្រុមប្រឹក្សាខេត្ត បានដឹកនាំប្រតិភូ ជាថ្នាក់ដឹកនាំមន្ទីរ មន្រី្តរាជការជុំវិញខេត្ត និង អស់លោក លោកស្រីជា អាជ្ញាធរក្រុង
ស្រុក និង ឃុំ សង្កាត់ អញ្ជើញចូលរួមរំលែកទុក្ខ និង គោរព វិញ្ញាណក្ខ័ន្ត សពរបស់ ឯកឧត្តមឧត្តមសេនីយ៍ឯក ចាន់ សារឿន មេបញ្ជាការកងពលតូចលេខ៤ ចំណុះឲ្យកងពលធំអន្តរាគមន៍លេខ២ ដែលបានទទួលមរណ:ភាព កាលពីវេលាម៉ោង១៥ និង៥៥នាទី ថ្ងៃទី១៩ខែមិថុនាឆ្នាំ២០១៤ ដោយរោគាពា ។ ក្នុងនោះដែរក៏មានក្រុមគណៈប្រតិភូរបស់គណៈកម្មាធិការសាខាកាកបាទក្រហមកម្ពុជាខេត្តសៀមរាប ដឹកនាំដោយលោកជំទាវ មាស សន ជា ម៉ន អនុប្រធានគណៈកម្មាធិការសាខាកាកបាទក្រហមកម្ពុជាខេត្ត ព្រមទាំង លោកជំទាវ អស់លោក
លោកស្រីគណៈប្រតិភូ ជាមេបញ្ជាការ បញ្ជាការរង អគ្គបញ្ជាការកងយោធពលខេមរភូមិន្ទ យោធភូមិភាគទី៤ ប្រតិភូខេត្តព្រះសីហនុ និង កងពលតូច កងពលធំអន្តរាគមន៍លេខ២ តំបន់ប្រតិបត្តិការសឹករង ស្នងការដ្ឋាននគរបាលខេត្ត កងរាជអាវុធហត្ថខេត្ត ព្រមទាំងនាយទាហាន ពលទាហានកងពលតូចលេខ៤ និង អាជ្ញាធរស្រុកបន្ទាយស្រី និង ស្រុកវ៉ារិន តំណាងក្រុមហ៊ុនផងដែរ ។ បន្ទាប់ពីគ្រប់ផែនបានដាក់នូវកម្រងផ្កា និង ការបូជ្ញាទៀន ធូក ដើម្បីឧទ្ទិសជូនដល់ដួងវិញ្ញាណក្ខ័ន្ត នៃសពឯកឧត្តមឧត្តមសេនីយ៍ឯក ចាន់ សារឿន និង ធ្វើការស្មឹងស្មាត
គោរពវិញ្ញាណក្ខ័ន្តនៃសព ក្នុងការរំលឹងនូវគុណបំណាច់របស់ឯកឧត្តម ដែលបានតស៊ូពុះពារក្នុងការបំរើជាតិមាតុភូមិ នៃទឹកដីសុវណ្ណភូមិកម្ពុជាយើង ។ ក្នុងការចូលរួមរំលែកទុក្ខនៃក្រុមគ្រួសារឯកឧត្តមឧត្តមសេនីយ៍ឯក ចាន់ សារឿន នាឱកាសនោះ ឯកឧត្តម លោកជំទាវ អស់លោក លោកស្រី ព្រមទាំងសមាជិកក្រុមប្រតិភូដែលបានចូលរួម ក្នុងការរំលែកទុក្ខ គោរពវិញ្ញាណក្ខ័ន្ត បានសម្តែងនូវការសោកស្តាយយ៉ាងខ្លាំង ចំពោះការបាត់បង់នូវកុលបុត្រខ្មែរដ៏ឆ្នើម ក្នុងការរំដោះជាតិមាតុភូមិ ពីបនប្រល័យពូជសាសន៍ ប៉ុល ពត ព្រមទាំងចូលរួមកសាងការពារជាតិ
ឲ្យមានការអភិវឌ្ឍន៍រីកចម្រើនលើគ្រប់វិស័យ ទាំងវិស័យកងទ័ពរដ្ឋបាល និង ព្រះពុទ្ធសាសនា ។ ម្យ៉ាងទៀតចំពោះគំរូនៃវីរៈភាព និង រាល់ស្នាដៃនៃសមិទ្ធផលដ៏ធំធេងដែល ឯកឧត្តមបានបន្សល់ទុកនៅ ក៏បានធ្វើបងប្អូនរួមអាវុធ ថ្នាក់ដឹកនាំគ្រប់ជាន់ថ្នាក់ មន្ត្រីរាជការ ចងចាំជានិច្ច នូវគំរូវីរៈដ៏ឆ្នើមរបស់ឯកឧត្តម ដែលធ្វើឲ្យកូនចៅជំនាន់ក្រោយ សិក្សារៀនសូត្រពីវីរៈភាពទាំងនេះ ។ ក្នុងនោះគណៈប្រតិភូទាំងរដ្ឋបាល
កងកម្លាំងប្រដាប់អាវុធ ក៏ធ្វើការឧទិ្ទសជូនដល់វិញ្ញាណក្ខ័ន្តឯកឧត្តមឧត្តមសេនីយ៍ឯក ចាន់ សារឿន ឲ្យបានទៅកាន់ទីសោយសុខក្នុងសុគតិភពថ្មី ព្រមទាំងសូមបែរក្រោយឲ្យពរជ័យដល់ថ្នាក់ដឹកនាំជាតិ បងប្អូនរួមអាវុធ និង ក្រុមគ្រួសារ សូមឲ្យជួបតែសេចក្តីសុខ នឹង ដឹកនាំប្រទេសឲ្យមានកិច្ចអភិវឌ្ឍន៍រីកចម្រើន ព្រមទាំងធ្វើឲ្យបានឈ្នះលើមាសត្រូវដែលចូលឈានពានកម្ពុជាផងដែរ ៕
រូបភាព និង អត្ថបទ លោក ខេង ខេមរា
