ព្រះវិហារ៖ កាលពីរសៀលថ្ងៃទី២០ខែមិថុនាកន្លងទៅនេះនៅអគារដ្ឋបាលថ្មីខណ្ឌរដ្ឋបាលព្រៃឈើព្រះវិហារ លោក អ៊ិត ភូម្រា នាយខណ្ឌរដ្ឋបាលព្រៃឈើ បានកោះអញ្ជើញម្ចាស់រោងសិប្បកម្មកែច្នៃផលអនុផលព្រៃឈើប្រភេទ តូច និង ម្ចាស់រោងសនិ្នធិលក់ចែកចាយផលអនុផល
ព្រៃឈើមានដូចជាជ័រទឹកជ័រស្អុងមកចូលរួមប្រជុំផ្សព្វផ្សាយ និងអប់រំណែនាំអំពីច្បាប់ស្តីពីព្រៃឈើនិងលិខិតបទដ្ឋានគតិយុត្តផ្សេងៗទៀតពាក់ព័ន្ធ និង ការបង្កើតរោងសិប្បកម្មកែច្នៃផលអនុផលព្រៃឈើឲ្យក្លាយទៅជាគ្រឿងសង្ហារឹមផ្សេងៗ ដោយមានការចូលរួមពីសំណាក់ លោក នុត សោភ័ណ្ឌ អភិបាលក្រុងព្រះវិហារ និង លោក រតនា តំណាងឱ្យ ក្រុមហ៊ុនឧកញ្ញា ទ្រីភាព ក្រុមហ៊ុន អានម៉ារ៉ាឌី សរុបវត្តមានចូលរួមជាង៥០នាក់ផងដែរ។
លោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារបានមានប្រសាសន៏ទៅកាន់បងប្អូនម្ចាស់សិប្បកម្មដែលបានអញ្ជើញមកពីគ្រប់បណ្តាស្រុកទូទាំងខេត្តព្រះវិហារឲ្យដឹងថាដើម្បីចូលខ្លួនមកធ្វើច្បាប់អាជីវកម្មថ្មីឲ្យបានគ្រប់ៗគ្នាកុំបីអាក់ខាន ហើយ លោកនាយខណ្ឌទុកពេលឱ្យម្ចាស់សិប្បកម្មទាំងអស់ក្នុងរយៈពេល១សប្តាហ៍តែមប៉ុណ្ណោះ ។
លោកនាយខណ្ឌបានបន្តទៀតថាបងប្អូនម្ចាស់រោងសិប្បកម្មទាំងអស់អាចចូលទៅ ទិញឈើ ពីក្រុមហ៊ុនណាមួយក្នុងចំណោមក្រុមហ៊ុនទាំង៥ក្រុមហ៊ុនទាំងនោះដែលទទួលដីសម្បទានសេដ្ឋកិច្ចស្របច្បាប់ពីរាជរដ្ឋាភិបាលរួមមាន៖ ១ ក្រុមហ៊ុនឧកញ្ញាទ្រីភាពទន្លេម្រេច ២ ក្រុមហ៊ុនអានម៉ារ៉ាឌី ៣ ក្រុមហ៊ុនសុវណ្ណភូមិ ៤ ក្រុមហ៊ុនដួងស្រូច ៥ ក្រុមហ៊ុនរំដោះស្រែ ហើយការចូលរួមប្រជុំថ្ងៃនេះផងដែរមានតែតំណាងក្រុមហ៊ុន២ទេដែលបានអញ្ជើញមកចូលរួមគឺក្រុមហ៊ុនឧកញ្ញាទ្រីភាពនិងក្រុមហ៊ុន អានម៉ារ៉ាឌីតែប៉ុណ្ណោះ ។
លោកនាយខណ្ឌបានបន្តទៀតថាបងប្អូនម្ចាស់អាជីវកម្មក្នុងការកែច្នៃផលអនុផលព្រៃឈើទាំងអស់នៅតាមបណ្តារោងសិប្បកម្មរបស់បុគ្គលនីមួយៗមានច្បាប់អនុញ្ញាតិឲ្យទិញឈើចូលស្តុកក្នុងរោងរបស់ខ្លួនមិនឲ្យលើសពីចំនួន៣ម៉ែត្រគូបនោះឡើយហើយបើម្ចាស់រោងសិប្បកម្មកែច្នៃណាមួយទិញលើសចំនួនដែលខណ្ឌរដ្ឋបាលព្រៃឈើបានកំណត់ខណ្ឌនិងចាត់វិធានការទៅតាមផ្លូវច្បាប់។ សូមបញ្ជាក់ផងដែរថានេះជាលើក
ទី២ហើយដែលលោកនាយខណ្ឌរដ្ឋបាលព្រៃឈើព្រះវិហារបានធ្វើលិខិតកោះអញ្ជើញរាល់ម្ចាស់សិប្បកម្មកែច្នៃឈើប្រណីតនិងឈើជ្រាយទាំងមានច្បាប់ចាស់និងអត់ច្បាប់មកធ្វើច្បាប់តាមការកំណត់ឲ្យបានរួសរាន់ កាលពីលើកទី១គឺធ្វើនៅថ្ងៃទី២១ខែឧសភាឆ្នាំ២០១៤ និង លើកទី២ធ្វើនៅថ្ងៃ ទី ២០ខែមិថុនា ឆ្នាំ២០១៤កន្លងទៅ។ ដោយ យ៉ែម ណាល់
