ក្រុមអាហ្ស៊ូរីអ៊ីតាលីបានអះអាងថា ខ្សែបម្រើ Daniele De Rossi (ដានីញ៉េល ដេ រ៉ូស៊ី) នឹងត្រូវអវត្តមានមិនបានចូលលេងក្នុងជំនួបពូលDជាមួយក្រុមអ៊ុយរ៉ាហ្គាយនៅថ្ងៃអង្គារនេះដោយសាតែ បញ្ហារបួស ។ តួរឯកដ៏សំខាន់មកពីក្លិបចចកព្រៃ Roma រូបនេះបានរងរបួសសាច់ដុំកំភួនជើង
ក្នុងការប្រកួត ដែលអ៊ីតាលីចាញ់កូស្តារីកា១-០កាលពីយប់ថ្ងៃសុក្រហើយមកដល់ពេលនេះក្រុមគ្រូពេទ្យរបស់ អ៊ីតាលីបានបង្ហាញថា De Rossi នឹងមិនអាចចូលលេងបានទេក្នុងជំនួបជាមួយប្រទេសនៅតំបន់ អាមេរិកខាងត្បូងមួយនេះ ។ លោកវេជ្ជបណ្ឌិតEnrico Castellaci (អេនរីកូ កាស្តេឡាស៊ី) បាននិយាយប្រាប់អ្នកសារព័ត៌មាន ថា “De Rossi នឹងមិនអាចចូលលេងបានទេក្នុងជំនួបជាមួយអ៊ុយរ៉ាហ្គាយ របួសរបស់គេត្រូវការ រយៈពេល២-៣ថ្ងៃដើម្បីព្យាបាល” ។ គួរបញ្ជាក់ថា កូនក្រុមរបស់លោកCesare Prandelli (សេសារី ប្រានឌីលី) ត្រូវការតែ១ពិន្ទុ ប៉ុណ្ណោះក្នុងការប្រកួតជាមួយអ៊ុយរ៉ាហ្គាយដើម្បីឆ្លងផុតទៅលេងវគ្គ១៦ក្រុមចុងក្រោយ ៕