កំពត៖ ឯកឧត្តម សោម ចិនអ្នកតំណាងរាស្ត្រ មណ្ឌលកំពត និងជាប្រធានក្រុមការងារថ្នាក់កណ្ដាលចុះជួយក្រុងកំពតរួមនិងសហការីនៅថ្នាក់ខេត្ត ។ នៅព្រឹកថ្ងៃសៅរ៍០៤រោចខែជេស្ឋឆ្នាំចសំរិទ្ធិស័កព.ស២៥៦២ ត្រូវថ្ងៃទី០២
ខែមិថុនាឆ្នាំ២០១៨ បានអញ្ជើញចុះជួបសំណេះសំណាលសួរសុខទុក្ខនិងស្វែងយល់ពីជីវភាពរស់នៅរបស់
ប្រជាពលរដ្ឋព្រមទាំងការងាអភិវឌ្ឍន៍ក្នុងមូលដ្ឋាននៅក្នុងភូមិតាអង្គសង្កាត់ត្រើយកោះ ក្រុងកំពតខេត្តកំពត។
មានប្រសាសន៍សំណេះសំណាលឯកឧត្តម សោម ចិនបានកោតសរសើរដល់អាជ្ញាធរគ្រប់លំដាប់ថ្នាក់និងប្រជាពលរដ្ឋដែលបានសហការគ្នាអភិវឌ្ឍមូលដ្ឋានមានការរីកចម្រើនគួរអោយប្រសើរ។
ឯកឧត្តមសោម ចិន ក៏បានបន្តការលើកឡើងទៀតថា៖ ភាពរីកចម្រើនរបស់ប្រទេសជាតិយើងដូចសព្វថ្ងៃនេះគឺផ្ដើមចេញពីមូលដ្ឋានគ្រឹះ នៃសុខសន្តិភាពដែលយើងទើបតែទទួលបានក្នុងរយៈពេល២០ឆ្នាំចុងក្រោយនេះប៉ុណ្ណោះ ដែលប្រទេសជាតិយើងមិនធ្លាប់មានពីមុនយូរមកហើយ។ ហើយបើគ្មានសុខសន្តិភាពនេះទេកុំថាឡើយការអភិវឌ្ឍន៍សូម្បីសទ្ធិសេរីភាពក៏គ្មានដែរ។ ហើយសុខសន្តិភាពនេះទៀតសោតគឺផ្ដើមចេញពីការដឹកនាំដ៏ត្រឹមត្រូវរបស់សម្ដេចតេជោហ៊ុនសែន ដោយបានធ្វើការលះបង់ជាច្រើនថែមទាំងយកអាយុជីវិតទៅប្ដូរដើម្បីបុព្វហេតុប្រជាជននិងប្រទេសជាតិយ៉ាងពិតប្រាកដទៀតផង។
ដោយមើលឃើញពីសច្ចៈភាពនេះហើយទើបរាល់ការបោះឆ្នោតជ្រើសតាំងតំណាងរាស្ត្រគ្រប់អាណត្តិ ប្រជាពលរដ្ឋតែងមានការគាំទ្រសម្ដេចតេជោយ៉ាងច្រើនលើសលុបដើម្បីបានដឹកនាំប្រទេសជាតិអោយបានកាន់តែរីកចម្រើនជាបន្តបន្ទាប់។
ពាក់ព័ន្ធសិទ្ធិប្រជាពលរដ្ឋឯកឧត្តម សោម ចិន ក៏បានបន្តលើកឡើងទៀតថា៖លទ្ធិប្រជាធិបតេយ្យស្តែងចេញ
ដំបូងបង្អស់ តាមរយៈការប្រើសិទ្ធិរបស់ប្រជាពលរដ្ឋ ទៅបោះឆ្នោត ជ្រើសរើសមេដឹកនាំ ដែលខ្លួនស្រលាញ់ពេញចិត្ត មិនមែនតាមរយៈការបង្កចលាចល ការប៉ះបោ ការធ្វើបដិវត្តព័ណ៌ និងការធ្វើបាតុកម្មនោះទេ ហើយថាទង្វើទាំងនោះផ្ទុយទាំងស្រុងទៅនឹងគោលការណ៍លទ្ធិប្រជាធិបតេយ្យ ជាពិសេសជាទង្វើខុសច្បាប់ត្រូវទទួលទោសទណ្ឌ។ ដូចនេះហើយឯកឧត្តមសោម ចិនក៏បានអំពាវនាវក្រើនរំលឹកដល់ប្រជាពលរដ្ឋគ្រប់រូបដែលមាន
ឈ្មោះបោះឆ្នោតត្រូវទៅបោះឆ្នោតអោយបានគ្រប់ៗគ្នានៅថ្ងៃទី២៩ ខែកក្កដា ឆ្នាំ ២០១៨ ខាងមុខនេះដើម្បីសំដែងឆន្ទៈគាំទ្រសម្តេចតេជោហ៊ុនសែនធ្វើជានាយករដ្នមន្ត្រីសម្រាប់នីតិកាលទី៦និងអាណត្តិក្រោយៗទៀតដើម្បីបន្តដឹកនាំនិងផ្តល់នូវ សុខសន្តិភាព ស្ថេរភាព និងការអភិវឌ្ឍន៍ រីកចម្រើនដល់ប្រទេសជាតិដូចសព្វថ្ងៃនេះ។
ក្នុងឱកាសនោះឯកឧត្តមសោម ចិន ក៏បាននាំយកនូវសារុងជាអំណោយអនុស្សាវរីយ៍រួមនិងថវិកាមួយចំនួនចែកជូនដល់ប្រជាពលរដ្ឋប្រមាណ១០០នាក់ និងបាននាំយកនូវថវិកានិងអំណោយមួយចំនួនទៀតដើម្បីបន្តឧបត្ថម្ភជូននិងសួរសុខទុក្ខដល់ប្រជាពលរដ្ឋដែលពិកាក្រីក្រខ្វះខាតតាមខ្នងផ្ទះចំនួន៣គ្រួសារថែមទៀតផងដែរ ៕