កំពង់ឆ្នាំង៖ យោងតាមញត្តិចុះថ្ងៃទី២០ ខែមិថុនា ឆ្នាំ២០១៤ របស់អាជីវករខាងត្បូងផ្សារលើចំនួន១៩គ្រួសារ បានអោយដឹងថា៖នៅថ្ងៃទី២០ ខែមិថុនា ឆ្នាំ២០១៤ លោកហៃ មនោរម្យ អភិបាលក្រុងកំពង់ឆ្នាំងបានហៅអាជីវករខាងលើមកធ្វើការប្រជុំ ដើម្បីរៀបចំសណ្តាប់ធ្នាប់លក់ដូរនៅតាមផ្ទះអាជីវករជួរខាងត្បូងផ្សារលើ។ក្នុងការប្រេជុំលោកអភិបាលក្រុងបានដាក់គោលការណ៍ថា៖ចាប់ពីផ្ទះថ្មជ្រុងខាងលិចរហូតដល់ផ្ទះលោក ញឹក ផុន ត្រូវរក្សាសំយ៉ាបដំបូលផ្ទះតាមប្លង់ផ្ទះថ្មចាស់ដែលមានប្រវែង៣,៣០ម៉ ដោយមិនអនុញាតិអោយមានជើងសសរខាងមុខឡើយ សំយ៉ាបដែលលៀនលយលើសពីនេះត្រូវកាត់ចោល។
ដោយឡែកចាប់ពីផ្ទះឈ្មោះជួន លន់ ទៅខាងកើតដែលមានផ្ទះ២ទៀតគឺរក្សាទុកអោយនៅលានលយដដែល ដោយអោយតំរឹមតែបន្តិចបន្តួចប៉ុណ្ណោះ។ នៅរសៀលថ្ងៃទី២២ ខែមិថុនា ឆ្នាំ២០១៤ នៅពេលអ្នកយកព័ត៌មានយើងចុះទៅស្រាវជ្រាវប្រតិកម្មរបស់ក្រុមអាជីវករខាងលើនេះ ពួកគាត់បានប្រាប់អោយដឹងថា៖គោលការណ៍រៀបចំសណ្តាប់ធ្នាប់ផ្សារលើនេះរបស់លោកអភិបាលក្រុង ពួកគាត់មិនបដិសេដឡើយ ក៍ប៉ុន្តែត្រូវកាត់តំរឹមផ្ទះស័ង្កសីរបស់ឈ្មោះ ជួន លន់ និងម៉ុក ស៊ុន ដែលបានសាងសង់លយវែងហួសផ្ទះពួកគាត់ អោយរត់ជួរស្មើគ្នាទើបពួកគាត់សុខចិត្ត។
ព្រោះថាផ្ទះឈ្មោះ ជួន លន់ ដែលមានប័ណ្ឌកម្មសិទ្ធដីលេខ T1-0022 និងផ្ទះ ឈ្មោះ ម៉ុក ស៊ុន ដែលមានប័ណ្ឌកម្មសិទ្ធដីលេខT1-0023 គឺមានបណ្តោយដីវែងជាងដីរបស់អាជីវករទាំង១៩គ្រួសារទៅទៀត ប៉ុន្តែបែរជាលោកអភិបាលក្រុងរក្សាទុកផ្ទះទាំង២នេះអោយនៅដដែល ដោយមិនតំរូវអោយកាត់តំរឹមទៅវិញ?។ទង្វើបែបនេះរបស់លោកអភិបាលក្រុង ត្រូវបានអាជីវករយល់ថា ជាការរៀបចំសណ្តាប់ធ្នាប់ប្រកាន់បក្ខពួកមិនប្រក្រតី។
លោក សិន សូត ប្រធានភូមិបាលក្រុងកំពង់ឆ្នាំងបានអោយដឹងថា៖ផ្ទះទាំង២ខាងលើនេះកន្លងមកអាជ្ញាធរក្រុងក៍បានអោយរុះរើថយក្រោយជាយូរមកហើយ ប៉ុន្តែម្ចាស់ផ្ទះទាំង២មិនបានអនុវត្តតាមឡើយ។ដោយឡែកការរៀបចំសណ្តាប់ធ្នាប់ខាងលើនេះវាជាគោលការណ៍របស់លោកអភិបាលខេត្ត។
លោក ហៃ មនោរម្យ អភិបាលក្រុងកំពង់ឆ្នាំងបានអោយដឹងនៅព្រឹកថ្ងៃទី២៤ ខែមិថុនា ឆ្នាំ២០១៤នេះថា៖ការរៀបចំសណ្តាប់ធ្នាប់ និងការកាត់តំរឹមសំយ៉ាបផ្ទះខាងលើនេះ ជាគោលការណ៍របស់លោកអភិបាលខេត្តដែលបានប្រជុំសំរេចដោយតំរូវអោយផ្ទះអាជីវករនៅខាងត្បូងផ្សារលើទាំងអស់ថយចេញអោយផុតពីគំនូសក្រហមពីកន្លះម៉ែត្រទៅ១ម៉ែត្រ របស់គំរោងសាងសង់ផ្លូវជុំវិញផ្សាររបស់អង្គការចៃការ។ដោយឡែកការមើលឃើញផ្ទះទាំង២លានលយហួសគេនោះ ក្នុងគោលការណ៍របស់លោកអភិបាលខេត្តមិនបានតំរូវអោយកាត់ថយក្រោយស្មើគ្នារត់ជួរនោះទេ សំខាន់គឺអោយថយផុតពីគំនូសក្រហមរបស់ចៃការដែលកំពុងសាងសង់ផ្លូវថ្នល់និងលូជុំវិញផ្សារលើតែប៉ុណ្ណោះ៕
