កំពង់ចាម : ខណៈពេលដែល ទឹកទន្លេមេគង្គ ខេត្តកំពង់ចាម ទោះបីជាមានការស្រកថយចុះ បន្តិច ក៏ពិតមែន បើចាប់គិតត្រឹមថ្ងៃទី០៤ ខែកញ្ញា ឆ្នាំ២០១៨នេះ ទឹកនៅត្រឹមកម្ពស់១៥.៣២ម៉ែត្រ ដែលខ្ពស់ជាងចំណុចប្រកាសអាសន្ន១៥.២០ម៉ែត្រ ពោលគឺរយៈពេល២៤ម៉ោងទឹកបានស្រកចុះជិត១តឹក។
បើយោងតាមរបាយការណ៍ របស់គណៈកម្មាធិការគ្រប់គ្រងគ្រោះមហន្តរាយ ខេត្តកំពង់ចាម បានឲ្យដឹងថា បើចាប់គិតពី អំឡុងពេលទឹកទន្លេមេគង្គ ចាប់ផ្ដើមហក់ឡើង រហូតមកដល់ពេលនេះ គឺមានមនុស្ស បានលង់ទឹកស្លាប់ ចំនួន១៩នាក់ហើយ ក្នុងនោះក៏មាន កុមារចំនួន០៨នាក់ទៀតផង ដោយឡែក មនុស្ស៧៦នាក់ ត្រូវរងរបួសដោយសត្វអាសិរពិស និងពស់ចឹក ប៉ុន្តែត្រូវបានព្យាបាលទាន់ពេលវេលា។
របាយការណ៍ ដដែលបានបញ្ជាក់ថា ចំពោះផលប៉ះពាល់ដោយជំនន់ទឹកទន្លេមេគង្គ នៅទូទាំង ខេត្តកំពង់ចាម គឺមានចំនួន០៩ លើ១០ក្រុង -ស្រុក ក្នុងនោះមានចំនួន៥៤ឃុំ-សង្កាត់ ស្មើនឹង២៨៤ភូមិ ដែលមានពលរដ្ឋ ៣៧.៤៦១គ្រួសារ ដែលបានលិចផ្ទះសម្បែង ចំនួន២៨.៦៦២ខ្នងផ្ទះ និងរុះរើផ្ទុះ ចំនួន៦៩ខ្នង ព្រមទាំងលិចវត្ត និងវិហារ អិស្លាម ចំនួន៥៧កន្លែង សាលារៀន៨០កន្លែង មណ្ឌុលសុភាព០៦កន្លែង។
ចំពោះការធ្វើដំណើរត្រូវជួបការលំបាកជាច្រើន ដោយលិចផ្លូវ ប្រវែង២៣៥.៩១៣ម៉ែត្រ ក្នុង នោះមាន ផ្លូវក្រាលគ្រួសក្រហម ប្រវែង១៩៨.១៩៤ម៉ែត្រ ផ្លូវបេតុង ប្រវែង៣៦.១៧៩ម៉ែត្រ និងផ្លូវ កៅស៊ូ ប្រវែង ១.៥៤០ម៉ែត្រ ព្រមទាំងលិចស្ពាន១៧កន្លែង និងលិចទំនប់ប្រវែង៤១.០៤២ម៉ែត្រ។
ដោយឡែកដំណាំកសិផល រួមមាន ស្រូវ ពោត និងដំណាំផ្សេងៗ ត្រូវរងផលប៉ះពាល់សរុបជាង៩ពាន់ ហិកតា និងរងការខូចខាតចំនួន៣.២៣០ហិកតា។
ជាមួយនឹងវិធានការ ជួយសង្គ្រោះ អាជ្ញាធរ បានជម្លៀស ប្រជាពលរដ្ឋ ទៅកាន់ទីទួលសុវត្ថិភាព ចំនួន១៥កន្លែង ដែលមាន១.៤៤១គ្រួសារ ស្មើនឹង៤.៨៦៩នាក់ សត្វពាហនៈ៥.៦៥១ក្បាល ។ ក្នុងនោះ ក៏មាន មន្ត្រី សុខាភិបាល ចុះពិនិត្យសុខភាព ប្រជាពលរដ្ឋ នៅតាមទីទួលសុវត្ថិភាព ព្រមទាំងបានធ្វើការណែនាំ ឲ្យមានការរស់នៅស្អាត និងហូបចុកស្អាត គឺត្រូវទទួលទាន ទឹកដាំពុះ ចៀសវាងការឆ្លងមេរោគផ្សេងៗ ផងដែរ។
ជាមួយនឹង វិធានការ ការពារ និងកិច្ច អន្តរាគមន៍ ជួយសង្គ្រោះនេះ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានគៀងគរនាំយកអំណោយមនុស្សធម៌ ទៅចែកជូនដល់បងប្អូនប្រជាពលរដ្ឋរងគ្រោះទាំងនោះ ព្រមទាំងបានធ្វើការ អំពាវនាវ ឲ្យមានការប្រុងប្រយ័ត្នខ្ពស់ ចំពោះហេតុការណ៍ចៃដន្យណាមួយ ដែល បណ្តាល ឲ្យប៉ះពាល់ដល់អាយុជីវិត ពិសេស ត្រូវប្រុងប្រយ័ត្ន ខ្ពស់ ចំពោះ កុមារ ជនពិការ និងចាស់ជរា។ ជាងនេះទៅទៀតនោះ គឺត្រូវប្រុងប្រយ័ត្នចំពោះសត្វពស់ និងសត្វអសិរពិសនានាចឹក ក្នុងករណីបើមានសត្វអសិរពិសចឹក សូមបញ្ជូនជនរងគ្រោះជាបន្ទាន់ទៅកាន់មន្ទីរពេទ្យបង្អែក ដែលនៅជិតបំផុត ព្រោះមានក្រុមគ្រូពេទ្យ និងឱសថគ្រប់គ្រាន់ សម្រាប់ធ្វើការ ព្យាបាល ភ្លាមៗ ចៀសវាងមានគ្រោះថ្នាក់ដល់អាយុជីវិត ៕