ខេត្ដកំពង់ស្ពឺ ៖ បណ្តាបុត្រាបុត្រីសម្តេចអគ្គមហាសេនបតីតេជោ ហ៊ុន សែន និងសម្តេចគតិ ព្រឹទ្ធបណ្ឌិត ប៊ុន រ៉ានី ហ៊ុនសែន សុទ្ធតែបានចុះប្រឡូកនៅមូលដ្ឋាន បានជួបផ្ទាល់ជាមួយ ប្រជាពលរដ្ឋ និងត្រូវបានទទួលស្វាគមន៍យ៉ាងរាក់ទាក់ ស្និទ្ធស្នាលពីមនុស្សម្នាគ្រប់ទីកន្លែង ដែលគេ
សង្កេតឃើញថា ពួកគេកំពុងដើរតាមគន្លងមសម្តេចតេជោ ទាក់ទិននឹងការចុះសួរ សុខទុក្ខជួបប្រជាពលរដ្ឋដោយផ្ទាល់និងសាមញ្ញ។ ជាក់ស្តែង នៅថ្ងៃអាទិត្យទី២២ ខែមិថុនា ឆ្នាំ២០១៤ កន្លងទៅនេះ នៅភូមិអូរលើ ឃុំក្រាំងចេក ស្រុកឧដុង្គ ខេត្ដកំពង់ស្ពឺ ប្រជាពលរដ្ឋប្រមាណ២០០នាក់, ព្រះសង្ឃ៥អង្គ និងមន្ដ្រីនគរបាលមូលដ្ឋានផងបានស្វាគមន៍ការមកដល់ឯឧ.ហ៊ុន ម៉ានី ដែលជាតំណាងខេត្តកំពង់ស្ពឺដើម្បីសម្ពោធផ្លូវលំតូចមួយខ្សែពីភូមិទៅផ្លូវថ្នល់ធំ យ៉ាងកក់ក្តៅ និងសប្បាយរីករាយ ។
នៅក្នុងពិធីនេះពួកគេធ្វើជាលក្ខណៈធម្មតា សាមញ្ញ ហើយក៏មិនធំដុំអ្វីនោះដែរ ប៉ុន្តែភាព សាមញ្ញ និង លក្ខណៈសាមញ្ញនេះវាបានបង្ហាញនូវភាពជិតស្និទ្ធ និងស្និទ្ធស្នាលទ្វេឡើងរវាង ប្រជាពលរដ្ឋ និងអ្នកតំណាងរាស្ដ្ររូបនេះ ។ មានន័យថា ក្នុងនាមជាអ្នកតំណាងរាស្ដ្រមណ្ឌលកំពង់ស្ពឺនៃគណបក្សប្រជាជនកម្ពុជាឯឧ.ហ៊ុន ម៉ានី អាយុ៣១ឆ្នាំ តែងតែ ចុះទៅកាន់មូលដ្ឋានដើម្បីស្ដាប់អំពីកង្វល់ របស់ប្រជាពលរដ្ឋ និងព្យាយាមដោះស្រាយ បញ្ហាជូនប្រជាពលរដ្ឋទៅតាមដំណាក់កាល និងតាមលទ្ធភាពផងដែរ។
ចុះពីរថយន្ដភ្លាមអ្នកតំណាងរាស្ដ្រវ័យ ក្មេងរូបនេះក្នុងសម្លៀកបំពាក់អាវ ក្រណាត់ពណ៌ដៃខ្លី ខោពណ៌ខ្មៅជើងវែង និងស្បែកជើងសង្រែកបានបញ្ចេញនូវ ពាក្យពេចន៍ស្វាគមន៍ ព្រមជាមួយនឹង ស្នាមញញឹមលើកដៃសំពះជាដរាបទៅរកអ្នកភូមិទាំងចាស់ទាំងក្មេង ។ លោក បាននិយាយដោយសុភាពរាបសាជា មួយប្រជាពលរដ្ឋទាំងនោះដ៏សាមញ្ញបំផុត “ជម្រាប សួរបង, ប្អូន, អ៊ំប្រុស, អ៊ំស្រី, ពូមីង! សុខសប្បាយជាទេ?” ។ ចប់ពិធីសំណេះសំណាល រយៈពេល៤០នាទីអ្នកតំណាង រាស្ដ្រ ហ៊ុន ម៉ានី បានចូលរួមកាត់ខ្សែបូ ជាមួយចាស់ទុំក្នុងភូមិមុននឹងដើរចូល ទៅក្នុងភូមិ ។
ប៉ុន្តែ អ្វីដែលប្រជាពលរដ្ឋនៅក្នុង សហគមន៍ នេះរីករាយនេះគឺក្រោយចប់កម្មវិធី សម្ពោធផ្លូវមាននំបញ្ចុកសម្លការី និង សម្លខ្មែរបានត្រៀមជាស្រេចសម្រាប់អ្នកចូលរួមកម្មវិធីដែលមាន អាជ្ញាធរមូល ដ្ឋាននិងក្រុមអ្នកតំណាងរាស្ដ្រ ។ ឯឧ.ហ៊ុន ម៉ានី បានអង្គុយនៅលើកន្ទេលដែលក្រាល ផ្ទាល់ដី ក្រោមដំបូលកៅស៊ូតង់កំពុងពិសានំ បញ្ចុកបណ្ដើរអ្នកតំណាងរាស្ដ្រវ័យក្មេង របស់ប្រជាពលរដ្ឋនៅមណ្ឌលកំពង់ស្ពឺ ឆ្លៀតជជែកជាមួយមេឃុំបណ្ដើរ ។ វាជាទិដ្ឋភាពដែលធ្វើឱ្យប្រជាពលរដ្ឋក្នុងភូមិ អូរលើហាក់ដូចជាមានមោទនភាពជាខ្លាំង ក៏ព្រោះតែឃើញអ្នកតំណាង រាស្ដ្ររបស់ខ្លួនអង្គុយហូបនំបញ្ចុកយ៉ាង សាមញ្ញជាមួយពួកគាត់ ។
ប្រជាពលរដ្ឋនៅភូមិអូរលើបាន សម្ដែង នូវការសប្បាយរីករាយក្នុងចិត្ដ ហើយថា នេះមិនមែនជាលើកទី១នោះទេ ដែល អ្នកតំណាងរាស្ដ្រវ័យក្មេងរូបនេះបាន បង្ហាញឱ្យនូវភាពកក់ក្ដៅជាមួយប្រជាពលរដ្ឋមូលដ្ឋាន ។ លើសពីនេះ ពួកគាត់បានជូនពរសព្ទសាធុការជូនដល់ តំណាងរាស្ត្រវ័យក្មេងឲ្យមានសុខភាពល្អ ពិសេសសូមសមប្រកបដោយពុទ្ធពរ៤ប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕ 
