ក្រសួងវប្បធម៌ និងវិចិត្រសិល្បៈ បានចេញសេចក្តីជូនដំណឹង ស្តីពីការកំណត់យកថ្លៃសេវាពីភ្ញៀវទេសចរបរទេស ដែលចូលទស្សនាសារមន្ទីរ ឧក្រិដ្ឋកម្មប្រល័យពូជសាសន៍ទួលស្លែង ចំនួន៣ដុល្លារ សម្រាប់ជនបរទេស អាយុ១៨ឆ្នាំឡើងទៅ សម្រាប់ជនជាតិខ្មែរមិនគិតថ្លៃ។ នៅក្នុងសេចក្តីជូនដំណឹង ដែលទើបនឹង
ទទួលបានឲ្យដឹងថា ចាប់ពីថ្ងៃទី០១ ខែសីហា ឆ្នាំ២០១៤ នេះតទៅ ក្រសួងនឹងដាក់ឲ្យដំណើរការលក់សំបុត្រ ជូនភ្ញៀវទេសចរ ដែលចូលទស្សនាសារមន្ទីរឧក្រិដ្ឋកម្ម
ប្រល័យពូជសាសន៍ទួលស្លែង តាមការកំណត់ដូចតទៅ សម្រាប់ជនជាតិខ្មែរទាំងអស់ ចូលទស្សនាសារមន្ទីរដោយមិនគិតថ្លៃ សម្រាប់ជនជាតិបរទេស ចាប់ពីអាយុ១៨ឆ្នាំឡើងទៅ ត្រូវបង់ថ្លៃសំបុត្រ ចូលទស្សនាសារមន្ទីរ ចំនួន៣ដុល្លារ អាមេរិកក្នុងម្នាក់ ។ ចំពោះគណៈប្រតិភូបរទេស ដែលមានលិខិតអនុញ្ញាត និងសិស្សនិស្សិតជនជាតិបរទេស ព្រមទាំងអ្នកសិក្សាស្រាវជ្រាវ លើវិស័យវប្បធម៌ និងអប់រំ ត្រូវបានលើកលែង។
សេចក្តីជួនដំណឹងនោះ បានបញ្ជាក់ថា ដើម្បីឲ្យការយកកម្រៃសេវា និងការប្រមូលចំណូល ប្រព្រឹត្តទៅដោយតម្លាភាព ច្បាស់លាស់ ភ្ញៀវទេសចរដែលបង់ថ្លៃសំបុត្រចូលទស្សនា សារមន្ទីរនឹងទទួលបានបង្កាន់ដៃបង់ប្រាក់តាមតារាងតម្លៃសេវា ដែលបិទផ្សាយនៅចំខាងមុខ បញ្ជរលក់សំបុត្រ ស្ថិតនៅមាត់ច្រកចូលសារមន្ទីរជ្រុងខាងត្បូង ។ ទន្ទឹមនឹងនេះក្រសួងនឹងបង្កើតកន្លែងផ្តល់ព័ត៌មាន សម្រាប់ភ្ញៀវទេសចរ និងប្រអប់សំបុត្រទទួលបណ្តឹងតវ៉ា ឬមតិកែលំអ នៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ៕