កំពង់ចាម: ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ នាល្ងាចថ្ងៃទី១៤ ខែតុលា ឆ្នាំ២០១៨នេះ បានអញ្ជើញជួបសំណេះសំណាលលើកទឹកចិត្តនិងប្រគល់សម្ភារៈមួយចំនួនជូនដល់ក្រុមកីឡាករបាល់ទាត់ ដែលកំពុងធ្វើការហ្វឹកហាត់ ត្រៀមចេញទៅប្រកួតនៅប្រទេសវៀតណាម នាពេលឆាប់ៗខាងមុខនេះ។
ឆ្លៀតក្នុងឱកាសនោះ ឯកឧត្ដម គួច ចំរើន អភិបាលខេត្តកំពង់ចាម បានថ្លែងលើកទឹកចិត្តដល់ក្រុមកីឡាករបាល់ទាត់ទាំង២២នាក់ និងគ្រូបង្វឹក ឲ្យខិតខំបន្ថែមទៀត ក្នុងការហ្វឹកហាត់ ឲ្យក្លាយខ្លួនទៅជាកីឡាករល្អ មានជំនាញយ៉ាងពិតប្រាកដ និងមានសុខភាពរឹងមាំផងដែរ។ 
ឯកឧត្ដម អភិបាលខេត្ត បានថ្លែងបន្តទៀតថា ការចេញទៅប្រកួតជាមិត្តភាពនៅប្រទេសវៀតណាម នាថ្ងៃទី២៧ ខែតុលា ឆ្នាំ២០១៨ ឆាប់ៗខាងមុខនេះ ថ្វីត្បិតតែមិនមែនជាការចេញទៅប្រកួតស៊ីសាច់ហុតឈាមគ្នាក៏ពិតមែន តែយើងត្រូវធ្វើការហ្វឹកហាត់លត់ដំខ្លួន ឲ្យក្លាយខ្លួនទៅជាកីឡាករ ដែលមានសមត្ថភាព ក្នុងការដណ្ដើមជយលាភី ដើម្បីលើកមុខមាត់ខេត្តកំពង់ចាម ក៏ដូចជាប្រទេសកម្ពុជាយើងទាំងមូលផងដែរ។ 
ជាមួយការជួបសំណេះសំណាលនេះ ឯកឧត្តម អភិបាលខេត្ត ក៏បានជូនពរដល់ក្រុមកីឡាករ ព្រមទាំងប្រគល់ជូនដល់ក្រុមកីឡាករបាល់ទាត់ និងគ្រូបង្វឹក នូវសម្ភារៈ រួមមាន សម្លៀកបំពាក់កីឡា ស្បែកជើង ទឹកផ្លែឈើ និងថវិកាមួយចំនួនផងដែរ ៕
