គ្រូបង្វឹកអាហ្សង់ទីនអះអាងថាក្រុមរបស់ខ្លួនត្រូវតែបង្កើនទម្រង់ការពារ គ្រូបង្វឹកក្រុមតុងហ្គោអាហ្សង់ទីនលោក Alejandro Sabella (អាឡិចចាន់ត្រូ សាបេឡា) បានបញ្ជាក់ថា ក្រុមរបស់ខ្លួនត្រូវតែបង្កើនសមត្ថភាពប្រព័ន្ធការពារមុនការប្រកួត World Cup វគ្គ១៦ក្រុមចុងក្រោយមកដល់ ។ កូនក្រុមរបស់លោក Sabella បានប្រកួត
ឈ្នះក្រុមឥន្ទ្រីដែកអាហ្វ្រិកនីហ្សេរីយ៉ា៣-២ក្នុងការប្រកួតចុងក្រោយ នៃពូលF កាលពីយប់ថ្ងៃពុធប៉ុន្តែលោកបានអះអាងថា ក្រុមរបស់លោកពិតជាទន់ខ្សោយប្រព័ន្ធការពារណាស់ ។
គ្រូបង្វឹកវ័យ៥៩ឆ្នាំរូបនេះប្រាប់ក្រុមអ្នកសារព័ត៌មានថា “យើងជាក្រុមពូកែខាងវាយប្រហារមួយហើយមាន សំណួរជាច្រើនទាក់ទងនឹងប្រព័ន្ធការពាររបស់យើង ។ ការការពារដ៏រឹងមាំជារឿងដ៏ល្អបំផុតសម្រាប់យើងប៉ុន្តែយើងត្រូវតែសិក្សាពីវិធីនៃការបង្កើនទម្រង់ការពារ” ។ គួរបញ្ជាក់ថា អាហ្សង់ទីននឹងត្រូវជួបជាមួយស្វីសសម្រាប់ការប្រកួតវគ្គ១៦ក្រុមចុងក្រោយនៅថ្ងៃអង្គារក្រោយ ៕
