នៅថ្ងៃពុធនេះ ប៉ូលិសថៃបានប្រាប់ថា បានចាប់ខ្លួនមនុស្ស១ពាន់២៣នាក់ ពីបទភ្នាល់បាល់ទាត់ខុសច្បាប់ ក្នុងឱកាសពិភពលោកកំពុងរៀបចំការប្រកួតបាល់ទាត់នៅប្រេស៊ីល បច្ចុប្បន្ននេះ។ ក្នុងចំណោមជនល្មើស ក៏មានជនបរទេសផងដែរ។ ជនល្មើស
ទាំងនេះ អាចជាប់ពន្ធនាគារ ២ឆ្នាំ និងបង់ពិន័យ៤៥អឺរ៉ូ។ តាំងពីថ្ងៃ១២មិថុនា ថ្ងៃបើកការប្រកួតបាល់ទាត់ពិភពលោកឆ្នាំ២០១៤ នៅប្រទេសប្រេស៊ីលមក ប៉ូលិសថៃបានចាប់ខ្លួនមនុស្សជាងមួយពាន់នាក់ ជាប់ចោទពីបទធ្វើការភ្នាល់បាល់ទាត់ខុសច្បាប់។ ជនល្មើសភាគច្រើន ជាអ្នកយកលុយទៅចាក់បាល់តែម្តង។ ក្នុងចំណោមជនល្មើស ក៏មានជនបរទេស មកពីម៉ាកាវ និងហុងកុងផងសរុប៤នាក់ផងដែរ។ ប៉ូលិសចាប់ខ្លួនជនបរទេសទាំង៤រូបនេះ កាលពីថ្ងៃអង្គារ។ ប៉ូលិសសង្ស័យថា ពួកគេគឺជាមេភ្នាល់បាល់តែម្តង។ ថ្ងៃ២៦ឧសភា ពោលគឺ៤ថ្ងៃក្រោយធ្វើរដ្ឋប្រហារទំលាក់រដ្ឋាភិបាល របបសឹកថៃបានប្រកាសបើកប្រតិបត្តិការប្រឆាំងទីកន្លែងលេងល្បែង ស៊ីសង កាស៊ីណូ ខុសច្បាប់ជាច្រើនកន្លែង ក្នុងក្របខណ្ឌនៃការឃោសនារៀបចំសណ្តាប់ធ្នាប់សីលធម៌ក្នុងស្រុក ឡើងវិញ។ ថៃជាប្រទេសហាមឃាត់ល្បែងភ្នាល់លុយ។ មានតែឆ្នោតជាតិ រឺក៏ការប្រកួតប្រណាំងសេះតែប៉ុណ្ណោះ ដែលរដ្ឋអំណាចអនុញ្ញាតអោយដំណើការក្នុងស្រុក។ ក្នុងប្រតិបត្តិការបង្ក្រាបការភ្នាល់បាល់ខុសច្បាប់នេះ ប៉ូលិសបានដកហូតបណ្ណភ្នាល់បាល់ច្រើនសន្លឹក ដែលមានតម្លៃរហូត៣សែន៨ម៉ឺន៥ពាន់អឺរ៉ូឯណោះ។ ក្រៅពីប្រតិបត្តិការចាប់ខ្លួនជនល្មើស របបសឹកថៃក៏បិទមិនអោយមានការភ្នាល់ល្បែងតាមអ៊ីនថឺនេតផងដែរ។ គួររំលឹកថា ក្នុងពេលមានការប្រកួតបាល់ទាត់ពិភពលោក ឆ្នាំ២០១០ ប៉ូលិសថៃបានចាប់ខ្លួនមនុស្សសន្ធឹកសន្ធាប់រហូត៣ពាន់៨រយនាក់ ពីបទភ្នាល់ល្បែងខុសច្បាប់៕