កំពង់ចាម: ខណៈពេលដែលប្រជាពលរដ្ឋ មានក្តីកង្វល់ជុំវិញបញ្ហាបាក់ច្រាំងទន្លេ ដោយសង្ស័យមកពីមានការធ្វើអាជីវកម្មបូមយកខ្សាច់លក់នោះ នាព្រឹកថ្ងៃទី១៨ ខែតុលា ឆ្នាំ២០១៨នេះ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម និងឯកឧត្ដម ឌិត ឌីណា រដ្ឋលេខាធិការក្រសួងរ៉ែ និងថាមពល រួមនឹងមន្ត្រីជំនាញពាក់ព័ន្ធជាច្រើនរូបទៀត បានអញ្ជើញចូលរួមបើកវេទិកាសាធារណៈ ដើម្បីពិគ្រោះយោបល់ និងផ្សព្វផ្សាយដល់បងប្អូនប្រជាពលរដ្ឋ ពាក់ព័ន្ធទៅនឹងការធ្វើអាជីវកម្មខ្សាច់នៅតាមដងទន្លេមេគង្គលើ នៅឃុំរកាអារ និងឃុំខ្ចៅ ស្រុកកងមាស ខេត្តកំពង់ចាម ដែលមានប្រជាពលរដ្ឋចូលរួមប្រមាណជា៤០០នាក់។
បើយោងតាមរបាយការណ៍ របស់លោក មឿន ផា អភិបាលស្រុកកងមាស បានលើកឡើងថា នៅក្នុងភូមិសាស្ត្រ ស្រុកកងមាស គឺមានក្រុមហ៊ុន និងសហគ្រាស ចំនួន៧ ដែលបានធ្វើសកម្មភាពបូមយកខ្សាច់លក់ ដោយមានអាជ្ញាប័ណ្ណត្រឹមត្រូវតាមច្បាប់កំណត់។
ឯកឧត្ដម គួច ចំរើន អភិបាលខេត្តកំពង់ចាម បានថ្លែងថា យើងមិនអាចហាមឃាត់ទឹកទន្លេមិនឲ្យឡើង ឬក៏ហាមឃាត់មិនឲ្យមានការបាក់ច្រាំងបានដែរ ប៉ុន្តែយើងអាចរិះរកមធ្យោបាយ ដើម្បីដោះស្រាយបញ្ហាបាន ដោយមានស្ថាប័នជំនាញចុះធ្វើការសិក្សាស្រាវជ្រាវយ៉ាងយកចិត្តទុកដាក់បំផុត។ បន្ទាប់ពីស្តាប់ការធ្វើបទបង្ហាញអំពីលក្ខណៈបច្ចេកទេស និងមូលហេតុដែលក្រសួងចេញអាជ្ញាបណ្ណជូនក្រុមហ៊ុន ក្នុងការបូមស្ដារបាតទន្លេ ដើម្បីសម្រួលចរន្តទឹកហូរ ឲ្យចំកណ្ដាលទន្លេ ដើម្បីបញ្ចៀសការបាក់ច្រាំង រួចមក បងប្អូនប្រជាពលរដ្ឋក៏បានឡើងបញ្ចេញមតិយោបល់ ដោយមានការយល់ស្រប និងអស់ក្តីកង្វល់ផងដែរ។
ជាមួយគ្នានោះ ឯកឧត្ដមអភិបាលខេត្ត ក៏បានដឹកនាំមន្ត្រីពាក់ព័ន្ធ ចុះពិនិត្យកំពង់ចំលងស្វាយស្រណោះ ដោយកំណត់ត្រឹមថ្ងៃទី៣០ ខែតុលា នេះ គឺឲ្យម្ចាស់អាជីវកម្ម កំពង់ចំលង ធ្វើយ៉ាងណា ត្រូវសម្រួលផ្លូវចុះកំពង់ចំលងឲ្យបានស្រួល ចៀសវាងមានគ្រោះថ្នាក់ដល់ប្រជាពលរដ្ឋអ្នកធ្វើដំណើរជាដាច់ខាត ហើយឯកឧត្ដមក៏បានបន្តដំណើរដោយស្មើជើងប្រមាណជាង៣គីឡូម៉ែត្រ ដើម្បីចុះពិនិត្យតាមដងទន្លេមេគង្គផងដែរ។
ដោយឡែក នារសៀលថ្ងៃទី១៨ ខែតុលា ដដែលនេះដែរ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម និងឯកឧត្ដម ឌិត ទីណា រដ្ឋលេខាធិការក្រសួងរ៉ែនិងថាមពល រួមនឹងមន្ត្រីជំនាញពាក់ព័ន្ធ បានអញ្ជើញបើកវេទិកាសាធារណៈ ដើម្បីពិគ្រោះយោបល់ និងផ្សព្វផ្សាយដល់ប្រជាពលរដ្ឋពាក់ព័ន្ធទៅនឹងការធ្វើអាជីវកម្មខ្សាច់តាមដងទន្លេមេគង្គលើ ស្ថិតនៅក្នុងឃុំពាមជីកង និងឃុំរកាគយ ស្រុកកងមាស ខេត្តកំពង់ចាម ដែលមានការចូលរួមពីបងប្អូនប្រជាពលរដ្ឋដែលរស់នៅក្នុងតំបន់នោះប្រមាណជាង៣០០នាក់ ដោយមានការបញ្ចេញមតិយោបល់ និងការបកស្រាយពីស្ថាប័នជំនាញ ហើយក៏មានការយល់ជ្រាបពីបងប្អូនប្រជាពលរដ្ឋផងដែរ។ បន្ទាប់មកឯកឧត្ដមអភិបាលខេត្ត ក៏បានដឹកនាំមន្ត្រីពាក់ព័ន្ធចុះពិនិត្យការបាក់ច្រាំងទន្លេ នៅក្រោយវត្តរកាគយ ដើម្បីរកវិធីជួសជុលឡើងវិញ ៕