បាត់ដំបង៖ មន្ទីរទេសចរណ៍ខេត្តបាត់ដំបង ប្រចាំឆមាសទី១ ឆ្នាំ២០១៤ និងលើកទិសដៅបន្ត នៅក្នុងឆមាសទី១ឆ្នាំ២០១៤នេះ ចំនួនភ្ញៀវដែលមកទស្សនាកម្សាន្តក្នុងខេត្តបាត់ដំបង មានចំនួនសរុប២៥២.២១៧នាក់ មានការកើនឡើង ៨,៤១% បើប្រៀបធៀបទៅនឹងរយៈពេល៦ខែដើមឆ្នាំ២០១៣កន្លងទៅ នេះគឺជារបាយការណ៍គូសបញ្ជាក់របស់លោក អ៊ុចអ៊ុំ ភីនីស្សារ៉ា ប្រធានមន្ទីរទេស ចរណ៍ខេត្តបាត់ដំបង ដែលបានលើកឡើងក្នុង ពិធីសន្និបាតបូកសរុបការងារទេសចរណ៍ ប្រចាំឆមាស ទី១ ឆ្នាំ២០១៤ និងលើកទិសដៅបន្ត ដែលបានប្រារព្វធ្វើកាលពីព្រឹក នៅសាលប្រជុំសាលា ខេត្តបាត់ ដំបង ក្រោមអធិបតីភាព ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍។
ឯកឧត្តម ច័ន្ទ សុផល អភិបាលខេត្តបាត់ដំបង បានមានប្រសាសន៍ថា ក្រៅពីអំណោយផលសំរាប់ ផលិតផលនៃដំណាំកសិកម្មសព្វបែបយ៉ាង។ ជាពិសេសលើដំណាំស្រូវ និងជាខេត្តជង្រុកស្រូវផងនោះ ក្នុងនោះខេត្តបាត់ដំបង នៅមានភោគទ្រព្យសម្បត្តិធម្មជាតិ វប្បធម៌បុរាណជាច្រើន និងប្រាង្គប្រាសាទនានា ដែលបានបន្សល់ទុកពីបុព្វបុរសយើង ស្ថិតនៅរាយប៉ាយលើខ្នងភ្នំ លើទីទួល។ព្រមទាំង មានសំណង់អាគារស្ថាបត្យកម្មកម្រដែលមានលក្ខណៈជាប្រពៃណីយ៍និងសំណង់អាគារចាស់ដែលបន្សល់ទុកពីជំនាន់បារាំងសែស, ផ្ទះខ្មែរបូរាណ, ដងស្ទឹងបឹងបួរទន្លេ ព្រៃព្រឹក្សា ភ្នំ សត្វស្លាបនិងសត្វចតុបាទគ្រប់ ប្រភេទ ដែលបង្កបានជាលក្ខណៈរមណីយដ្ឋានទេសចរណ៍ វប្បធម៌ ប្រវត្តិសាស្ត្រ និងធម្មជាតិ។
តាមរបាយការណ៍ របស់មន្ទីរទេសចរណ៍ខេត្តបាត់ដំបង បានឲ្យដឹងថា៖ ចំនួនភ្ញៀវទេសជាតិដែលមកទស្សនាកំសាន្តក្នុងខេត្តមានចំនួនសរុប២០៨.៨៣០នាក់បើប្រៀបធៀបទៅនឹងរយៈពេល៦ខែដើមឆ្នាំ២០១៣ មានការកើនឡើង៩,២៦% និងភ្ញៀវទេសចរអន្តរជាតិមានចំនួន ៤៣.៣៨៧នាក់ មាន ការ កើនឡើង៤,៥២% បើប្រៀបធៀបរយៈពេល៦ខែដើមឆ្នាំ២០១៣។ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា៖ កម្ពុជារំពឹងថាក្នុង ឆ្នាំ២០១៤នេះ កម្ពុជានឹងទទួលបានភ្ញៀវទេសចរអន្តរជាតិ ចំនួនប្រមាណពី៤,៦ ទៅ៤,៧លាននាក់។
នៅឆ្នាំ២០១៥ ប្រមាណ៥លាននាក់ និង ឆ្នាំ២០២០ ប្រមាណពី៧,៥ ទៅ ៨លាននាក់។ ឯកឧត្តមក៏បានបន្តទៀតថាក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រាជរដ្ឋាភិបាលបានដាក់ចេញនូវចក្ខុវិស័យ និងយុទ្ធសាស្ត្រ ផែន ការអភិវឌ្ឍន៍វិស័យទេសចរណ៍កម្ពុជា២០១២-២០២០ ដោយជម្រុញឲ្យក្រសួង-មន្ទីរ ត្រូវយកចិត្តទុកដាក់អនុវត្តឲ្យមានប្រសិទ្ធិភាព ដែលក្នុងនោះ រួមមាន៖ ការអភិវឌ្ឍន៍ផលិតផលទេសចរណ៍, ការពង្រឹងការឃោសនានិងផ្សព្វផ្សាយទេសចរណ៍, ការអភិវឌ្ឍន៍ធនធានមនុស្សក្នុងវិស័យទេសចរណ៍, ការសម្រួលការធ្វើដំណើ និងដឹកជញ្ជូនទេសចរ, ការជម្រុញការតភ្ជាប់ក្នុងតំបន់(តាមផ្លូវគោក ទឹកនិងអាកាស), ការពង្រឹងយន្តការគ្រប់គ្រង និងការអនុវត្តច្បាប់ និងការពង្រឹងប្រព័ន្ធសន្តិសុខ និងសុវត្ថិភាពទេសចរណ៍។
នៅក្នុងឳកាសថ្លែងបិទអង្គសន្និបាតឆមាសទី១នៃមន្ទីរទេសចរណ៍ខេត្តបាត់ដំបង ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ក៏បានគូសបញ្ជាក់និងសង្កត់ធ្ងន់យ៉ាងច្បាស់ទៀតថា៖ ទាំងអាជ្ញាធរ, ទាំងក្រសួងទេសចរណ៍និងក្រសួងពាក់ព័ន្ធ កំពុងតែពិចារណាពីលទ្ធភាព ពីលក្ខណៈសម្បត្តិរបស់ ទីក្រុងបាត់ដំបងនៃខេត្តបាត់ដំបង ដើម្បីស្នើសុំអង្គការយូណេស្កូដាក់បញ្ចូលទីក្រុងបាត់ដំបង ជាទីក្រុង បិតិកភ័ណ្ឌពិភពលោក សំរាប់ទៅថ្ងៃអនាគត ប្រសិនបើការងារនេះទទួលបានជោគជ័យនោះ ៕
