មណ្ឌលគិរី ៖ បានប្រែក្លាយខ្លួន ទៅជាទីក្រុងដ៏ស្រល់ប្រឹមប្រិយ៏ មានទេសចរណ៏ជាតិ នឹង អន្តរ ជាតិ ចេញចូលជាប់ជាប្រចាំ។មិនតែប៉ុណ្ណោះក្រុងសែនមនោរម្យក៏មិនស្ងាប់ស្តាត់ទៀតដែរ ដោយក្នុងឆ្នាំ ២០១៤នេះប្រជាពលរដ្ឋ ដែលរស់នៅក្នុងក្រុងមានចំនួន ១ ២៥០០នាក់ ស្មើរនឹង ២៧៥៥ គ្រួសារ ភាគច្រើន សុទ្ឋសឹងជាមន្ត្រីរាជការ។ការផ្លាស់ប្តូរដ៏ឆាប់រហ័សនៃរបត់សង្គមរបស់ ខេត្តមណ្ឌលគិរី ក៏មានការប៉ះពាល់ខ្លះដែរទៅបញ្ហារស់នៅរបស់ពលរដ្ឋ។
បញ្ហាសុខមាលភាពប្រជាជនបញ្ហាសន្តិសុខសង្គមការអប់រំ ប្រព័ន្ឋផ្លូវ ថ្នល់។ ចំណែកការផ្គត់ផ្គង់ចំនីអាហារក៏ពុំទាន់គ្រប់គ្រាន់ទៅ តាមកំនើនរបស់ប្រជាជនដែរ ព្រោះផ្សារនៅ ទី រួម ខេត្តមណ្ឌលគិរីធំមិនស្មើរផ្សារតាមស្រុកមួយចំនួនរបស់ខេត្តផ្សេងផង។ ស្ត្រីមេផ្ទះម្នាក់ដែលដៃម្ខាងកំពុងយួរម្ហូបទើបចេញពីផ្សារបានរៀបរាប់ថា សព្វថ្ងៃគាត់មានការលំបាក ខ្លាំង ណាស់ ព្រោះម្ហូបនៅផ្សារខេត្តមណ្ឌលគិរីមានតម្លៃថ្លៃខ្លាំងណាស់ គ្រាន់តែសាច់គោក្នុងមួយគីឡូក្រាម ថ្លៃ ៤ ៥០០០៛ ហើយរាល់មុខទំនិញផ្សេងៗសុទ្ឋតែថ្លៃកប់ពពកទាំងអស់។ ស្ត្រីមេផ្ទះដដែលបានបន្តថា ទំនិញ ថ្លៃក៏ថ្លៃទៅចុះ អាចមកពីខេត្តមណ្ឌលគិរីមានចម្ងាយផ្លួវឆ្ងាយ តែអ្វីដែល កាន់តែពិបាកនោះគឺ ច្រកផ្លូវក្នុងផ្សារ ក្រុងសែនមនោរម្យ មានសភាពតូចចង្អៀតមានភក់ជ្រុំលិចកជើង សូម្បី កន្លែងផ្ញើរម៉ូតូក៏អត់មាន។
ដោយសារតែស្ថានភាពផ្សារក្រុងសែនមនោរម្យ របស់ខេត្តមណ្ឌលគិរី កាន់តែយ៉ាប់ យឺនពី មួយថ្ងៃ ទៅ មួយថ្ងៃ ទើបប្រជាពលរដ្ឋដែលបានចូលរួមក្នុងអង្គវេទិកាសាធារណៈកាលពីព្រឹកថ្ងៃទី២៤ មិថុនា ២០១៤ នៅ វត្តសែនមនោរម្យ ក្រុងសែនមនោរម្យ បានសួរទៅអាជ្ញាធរខេត្តថា ខេត្តមណ្ឌលគិរី គឺជាតំបន់ទេសចរណ៍បែបធម្មជាតិមួយក្នុងប្រទេសកម្ពុជា ប៉ុន្តែបើក្រឡេកទៅមើលផ្សារវិញគឺដូចជាមិនសមរម្យទាល់តែសោះ សព្វថ្ងៃផ្សារខេត្តមណ្ឌលគិរីគ្មានសណ្ដាប់ធ្នាប់ល្អទេ ដូចជាការសង់តូបលក់ រំលោភមកលើផ្លូវ ធ្វើឲ្យផ្លូវក្នុងផ្សារ តូចចង្អៀត ហើយនៅពេលមានភ្លៀងធ្លាក់វិញ ផ្លូវក្នុងផ្សារបែកភក់រអិល សំរាមទុកដាក់ក៏មិនបានត្រឹមត្រូវ ជះ ក្លិនមិនល្អ ដល់ប្រជាពលរដ្ឋដែលចូលទៅក្នុងផ្សាររកទិញឥវ៉ាន់ផ្សេងៗ ជាពិសេសគឺភ្ញៀវទេសចរណ៍ ។
បងប្អូនប្រជាពលរដ្ឋបានលើកឡើងជាសំណួរបន្ថែមទៀតថា ចំពោះផ្លូវនៅជុំវិញផ្សារមានភាពតូចចង្អៀត ផ្ទះខ្លះ បានចាក់សាប តយ៉ាប និងសាងសង់តូបលក់ រំលោភមកលើផ្លូវ ដែលធ្វើឲ្យផ្លូវជុំវិញផ្សារក្នុងក្រុង សែន មនោរម្យ មើលទៅហាក់បីដូចជាគ្មានសណ្ដាប់ធ្នាប់សោះ និងស្ទើតែគ្មានផ្លូវសម្រាប់រថយន្តធ្វើដំណើរ ។
តើអាជ្ញាធរក្រុង-ខេត្ត នឹងមានវិធានការយ៉ាងណា ? ជុំវិញការលើកឡើង របស់ប្រជាពលរដ្ឋ លោក ឡុង វិបុល អភិបាលស្ដីទីក្រុងសែនមនោរម្យបានមានប្រសាសន៍ថា ផ្សារ និងផ្លូវជុំវិញផ្សារគឺអាជ្ញាធរក្រុង បានចុះរៀប ចំ សណ្ដាប់ធ្នាប់ម្ដង ជាពីរដងមកហើយ ប៉ុន្តែក្រោយមកអាជីវករដែល រស់នៅក្នុងផ្សារ និងជុំវិញផ្សារ នៅ តែ ធ្វើ ដូចដើមដដែល ហើយមន្ត្រីសណ្ដាប់ធ្នាប់ផ្សារ គឺមានតែ២នាក់ ដូច្នេះការមើលខុសត្រូវ ចំពោះបញ្ហាសណ្ដាប់ ធ្នាប់គឺមិនបានគ្រប់ជ្រុងជ្រោយទេ ។
លោកបន្តថា អាជ្ញាធរខេត្តនឹងបង្កើតគណៈកម្មការផ្សារ ហើយ នឹងរៀបចំប្រព័ន្ធលូជុំវិញផ្សារក្នុងក្រុង សែនមនោរម្យ ។ មានការលើកឡើងថា ប្រសិនបើអាជ្ញាធរនៅតែបណ្តែតបណ្តោយមិនចាត់វិធានការ ឲ្យបានទាន់ពេលវេលានោះទេ នៅថ្ងៃក្រោយអាចនឹងកើតមានគ្រោះអកុសលជាក់ជាមិនខាន ព្រោះបច្ចុប្បន្នក្រុមអាជីវករបាននាំ គ្នាសាងសង់តូបលក់ដូរ ជាប់គ្នារដឹកស្ទើររកផ្លូវដើរមិនកើត។ប្រសិនបើនៅថ្ងៃណាមួយកើតមាន អគ្គីភ័យច្បាស់ ជាពុំអាចឲ្យរថយន្តដឹកទឹកជួយសង្គ្រោះបានឡើយ ព្រោះគ្មានផ្លូវចូល ៕