បន្ទាយមានជ័យ៖ ទិដ្ឋភាពកកស្ទះរបស់ពលករខ្មែរដែលសំរុកចូលទៅប្រទេសថៃវិញនៅពាសពេញទីក្រុងប៉ោយប៉ែតខេត្តបន្ទាយមានជ័យ ។ ការកកស្ទះនោះគឺបណ្តាលមកពីចំនួនពលករច្រើនបានសំរុកបុកវិលចូលទៅប្រទេសថៃដើម្បីស្វែងរកការងារធើ្វជាថ្មី ខណៈពួកគេអស់សង្ឃឹមនិងចំណាត់ការរដ្ឋាភិបាលកម្ពុជាក្នុងការធើ្វឲ្យពលករក្លាយជាពលករស្របច្បាប់ដើម្បីបំពេញការងារនៅក្រៅប្រទេសបាននោះ ។គួររំលឹកផងដែរថា៖ពលករទាំងនោះបន្ទាប់ពីពួកគេត្រូវបានកងយោធាថៃចាប់បញ្ជូនដាក់ឡានទ្រុងដឹកមកចាក់ចោលនៅតាមព្រំដែននានាជាពិសេសទីក្រុងប៉ោយប៉ែតកាលពីប៉ុន្មានថ្ងៃកន្លងទៅនេះ ។
យោងតាមការសួរព័ត៌មានពីពលករទាំងនោះបានឲ្យដឹងថា៖មូលហេតុដែលពួកគេសំរុកវិលទៅប្រទេសវិញជាបន្ទាន់នោះគឺដោយសារតែ ពួកគេអស់សង្ឃឹមថានឹងអាចរកការងារបានធើ្វនៅក្នុងប្រទេសកម្ពុជាដូចនៅក្នុងប្រទេសថៃ លើសពីនេះទៅទៀតនោះការងារនៅក្នុងប្រទេសកម្ពុជា មិនអាចឲ្យពួកគេសន្សំបានប្រាក់ជួយឧបត្ថម្ភដល់អ្នកផ្ទះបានដូចនៅប្រទេសថៃនោះទេ ។
កម្មករម្នាក់ក្នុងចំណោមកម្មករទាំងនោះបានឲ្យដឹងថា៖ កន្លងមករូបគេធ្លាប់បានធើ្វការក្នុងរោងចក្រផលិតស្បែកជើងនៅខេត្តព្រះសីហនុក្នុង១ខែរូបគេទទួលបានប្រាក់ខែគោលត្រឹមតែ៨០ដូល្លារបូកនិងប្រាក់ថែមម៉ោងទៀតគឺក្នុង១ខែបើកបានប្រាក់ត្រឹមតែ១០៥ដូល្លារប៉ុណ្ណោះ ។ពលករដដែលរូបនោះបានបន្តរទៀតថា៖ចំណែកការងារនៅក្នុងប្រទេសថៃយ៉ាងហោចណាស់ក៏រកកំរ៉ៃបានចាប់ពី៦០០០ប្រាក់បាតថៃទៅ៩០០០បាតដែរក្នុង១ខែៗដូច្នេះខ្លួនគេអាចជួយរកកំរ៉ៃសន្សំប្រាក់ផ្ញើមកឲ្យអ្នកផ្ទះដោះបន្ទុកបានទៀតផង ។
ចំណែកពលករម្នាក់ទៀតឈ្មោះសុខ សាវុធ ភេទប្រុសមានអាយុ២៧ឆ្នាំដើមកំណើតនៅខេត្តតាកែវបានប្រាប់ឲ្យដឹងនៅថ្ងៃសុក្រទី២៧ខែមិថុនាឆ្នាំ២០១៤នេះថា៖ដើម្បីចូលទៅប្រទេសថៃបានរូបគេបានស្នើសុំលិខិតឆ្លងដែននៅត្រឹមប៉ុស្តិ៍នគរបាលអន្តោប្រវេសន៏ក្រុងប៉ោយប៉ែតគឺធើ្វ(Border Pass)ក្នុងតម្លៃ៩០០បាតប្រាក់ថៃសម្រាប់១ច្បាប់ដូច្នេះរូបគេអាចឆ្លងដែនតាមច្រកព្រំដែនប៉ោយប៉ែតចូលទៅប្រទេសថៃវិញបាន ។
ពាក់ពន្ធ័និងការវិលត្រឡប់របស់ពលករខ្មែរទៅកាន់ប្រទេសថៃវិញនោះ មន្ត្រីការិយាល័យទំនាក់ទំនងព្រំដែនកម្ពុជាថៃ បានបញ្ជាក់ឲ្យដឹងផងដែរថា៖នៅព្រំដែនអន្តរជាតិច្រកក្លងឡឹកប្រឈមនិងច្រកអន្តរជាតិប៉ោយប៉ែត ខាងភាគីថៃបានចុះមកធើ្វលិខិតបញ្ជាក់សម្រាប់ជនអន្តោប្រវេសន៏ជូនដល់ពលករខ្មែរ លោកថា៖នៅក្នុងខ្លឹមសារនៃប័ណ្ណអន្តោប្រវេសន៏នោះថៃគេបានឲ្យពលករខ្មែរប្រាប់ពីទីកន្លែងបំពេញការងារនិងឈ្មោះក្រុមហ៊ុនឬថៅកែ ។បន្ទាប់មកទៀត គេថតរូបពលករហើយចេញប័ណ្ណឲ្យភ្លាមៗតែម្តង មិនមានភាពយឺតយ៉ាវនោះទេតែត្រូវបង់ប្រាក់ចំនួន៨០បាតសម្រាប់ពលករម្នាក់ៗ ។
ពាក់ពន្ធ័និងបញ្ហាខាងលើនេះ លោក គោស៊ុម សារឿត អភិបាលខេត្តបន្ទាយមានជ័យបានឲ្យភ្នាក់ងារសារព័ត៌មានយើងដឹងនៅថ្ងៃនេះថា៖ពាក់ពន្ធ័និងកិច្ចការរដ្ឋាបាលរបស់ប្រទេសថៃក្នុងការសម្រួលដល់ពលករខ្មែរយើងនោះលោកមិនទាន់បានជ្រាបព័ត៌មាននេះជាផ្លូវការនៅឡើយទេប៉ុន្តែលោកបានដឹងតាមរយៈការរាយការណ៏របស់លោកង៉ោម៉េងជ្រួនអភិបាលក្រុងប៉ោយប៉ែតថាថៃបានសម្រួលដល់ពលករខ្មែរដែលមានបំណងវិលចូលទៅធើ្វការនៅក្នុងប្រទេសថៃវិញ ហើយរឿងនេះលោកមិនទាន់ចាត់ទុកជាផ្លូវការទេ ព្រោះគេមិនជូនដំណឹងមកលោក ។
បើទោះជាយ៉ាងនេះក្តីអ្វីដែលត្រូវកត់សម្គាល់ទៀតនោះ គឺគេបានឃើញសកម្មភាពពពាក់ពពួនរបស់កម្លាំងពលករចេញទៅប្រទេសថៃនាពេលយប់តាមច្រករបៀងមួយចំនួននក្នុងទឹកដីខេត្តបន្ទាយមានជ័យ និងខ្លះទៀតតាមច្រកទ្វារអន្តរជាតិប៉ោយប៉ែតតែម្តង ។ សកម្មភាពដែលនាំពលករចេញតាមច្រករបៀងខុសច្បាប់ទាំងនោះ គឺពលករភាគច្រើនត្រូវបានក្រុមមេខ្យល់អូសទាញ ចំណែកសមត្ថកិច្ចពាក់ពន្ធ័នៅតាមព្រំដែន ហាក់កំពុងតែទទួលបានលាភសក្ការៈពីការបើកដៃឲ្យមេខ្យល់ទាំងនោះជាអ្នកប្រព្រឹត្តអំពើជួញដូរ ។ចំណែកមន្ត្រីអ្នកច្បាប់មួយចំនួនហាក់គ្មានសុឆន្ទៈរារាំងនិងទស្សនវិស័យរបស់ក្រុមមេខ្យល់ទាំងនោះនៅឡើយទេ ។ 
