សៀមរាប ៖ នាព្រឹកថ្ងៃទី ២៨ ខែ មិថុនា ឆ្នាំ២០១៤នេះ បងប្អូនជាសមាជិកសមាជិកានៃគណបក្សប្រជាជនកម្ពុជា មកពីសង្កាត់ទាំង១៣ និង សាខាបក្ស ប្រមាណជាង ៥ពាន់នាក់ បានមកជួបជុំគ្នា ដើម្បីប្រារព្ធធ្វើមិទិ្ទញអបអរសាទរខួបលើកទី
៦៣ ថ្ងៃបង្កើតគណបក្ស ប្រជាជនកម្ពុជា នៅស្នាក់ការគណបក្សប្រជាជនកម្ពុជាខេត្តសៀមរាប ក្រោមវត្តមានដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រី ទៀ បាញ់ សមាជិកគណៈអចិន្ត្រៃយ៍ គណៈកម្មាធិការកណ្តាលនៃគណបក្សប្រជាជនកម្ពុជា និង ជាប្រធានក្រុមការងាររបស់ គណៈកម្មាធិការកណ្តាល ចុះជួយខេត្តសៀមរាប ព្រមទាំង ឯកឧត្តម លោកឧកញ៉ា លោកជំទាវ អស់លោក លោកស្រី ជាសមាជិក ក្រុមការងារគណៈកម្មាធិការកណ្តាល សមាជិកគណៈកម្មាធិការគណបក្សខេត្ត ក្រុង សង្កាត់ បាន ចូលរួមយ៉ាងច្រើនកុះករផងដែរ ។
ក្នុងកិច្ចស្វាគមន៍របស់ ឯ.ឧ ឃឹម ប៊ុនសុង ប្រធានគណៈកម្មាធិការនៃគណបក្សប្រជាជនកម្ពុជាខេត្តសៀមរាប បានធ្វើការបញ្ជាក់ថា ការរំលឹកខួបអនុស្សាវរីយ៍លើកទី៦៣ ថ្ងៃបង្កើតគណបក្សប្រជាជនកម្ពុជា ដើម្បីសម្តែងនូវកតញ្ញូតាធម៌ ចំពោះគណបក្ស ដែលជានិច្ចកាលប្រកាន់ ខ្ជាប់នូវគោលបំណង និង ឧត្តមគតិរបស់ខ្លួន ក្នុងការបម្រើផលប្រយោជន៍ដ៏ឧត្តុង្គឧត្តមរបស់ជាតិមាតុភូមិ និង ប្រជាជន ។
ឯកឧត្តមក៏បានគូសបញ្ជាក់ពីការពង្រឹង ពង្រីកនូវរចនាសម្ព័ន្ធខ្សែ រយៈអង្គការចាត់តាំង និង កសាងសមាជិក គណបក្សខេត្តសៀមរាប ព្រមទាំងបានលើកឡើងពីការធានានូវសន្តិសុខ សណ្តាប់ធ្នាប់សាធារណៈ ស្ថេរភាព សុវត្ថិភាពជូនសាធារណជនទូទៅ និង ភ្ញៀវទេសចរណ៍ជាតិ អន្តរជាតិ និង បង្កលក្ខណៈងាយស្រួល ក្នុងការបង្កើនទំនុកចិត្តដល់អ្នកវិនិយោគ និង ប្រជាពលរដ្ឋមានលទ្ធភាពប្រកបធ្វើអាជីវកម្ម បាន ធ្វើឲ្យសេដ្ឋកិច្ចគ្រួសារមានភាពប្រសើរឡើង ព្រមទាំងមានកិច្ចអភិវឌ្ឍន៍របស់ខេត្តលើគ្រប់វិស័យទៀតផង ។
ក្នុងនោះឯ.ឧ ទៀ បាញ់ ក៏បានអាននូវសន្ទរកថារបស់សម្តេចមហាធម្មពោធិសាល ជា ស៊ីម ប្រធានគណបក្សប្រជាជនកម្ពុជា ដែលបានថ្លែងក្នុងពិធីមិទ្ទិញខួបលើកទី៦៣ ថ្ងៃបង្កើតគណបក្សប្រជាជនកម្ពុជា ដែលមានខ្លឹមសារ បានបញ្ជាក់ថា គណបក្សប្រជាជនកម្ពុជា ដែលដើមឡើយជាគណបក្សប្រជាជនបដិវត្តខ្មែរ បង្កើតឡើងដើម្បីផលប្រយោជន៍របស់ប្រជាជន ហើយមកដល់ថ្ងៃនេះ មានអាយុកាល ៦៣ឆ្នាំហើយ ដែលជាគណបក្សចាស់ទុំខាងនយោ បាយ និង បានចូលរួមតស៊ូរួមសុខរួមទុក្ខជាមួយប្រជាជនកម្ពុជា រំដោះជាតិឲ្យរួចផុតពីពួកអាណានិគម និង បានផ្តួលរំលំរបបកម្ពុជាប្រជាធិបតេយ្យប្រល័យពូជសាសន៍ នាថ្ងៃ៧ មករា ១៩៧៩ បានបើកឡើងនូវទំព័រថ្មីនៃ ប្រវត្តិសាស្ត្រ កសាងមាតុភូមិរបស់ប្រជាជាតិខ្មែរឡើងវិញ ។
ឯកឧត្តមក៏បានគូសបញ្ជាក់ថា រយៈពេលជិត៣៦ឆ្នាំ បន្ទាប់ពីថ្ងៃជ័យជំនះ ៧មករា ក្រោមកិច្ចដឹកនាំរបស់សម្តេចអគ្គមហាទាំងបី ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានធ្វើឲ្យសម្រេចជោគជ័យដ៏ធំធេងលើគ្រប់វិស័យ ។ ដើម្បីថែរក្សាការពាររាល់ សមទ្ធិផលនៃសង្គមជាតិឲ្យបានគង់វង្ស និង ដណ្តើមជោគជ័យធំៗ ក្នុងការកសាង និង អភិវឌ្ឍមាតុភូមិ និង លើកស្ទួយជីវភាពរបស់ប្រជាជន មិនដូចគណបក្សនយោបាយមួយ ដែលបង្កនូវភាពអសន្តិសុខដល់សង្គម និងប្រជាជនឡើយ ។
ឯ.ឧ ទៀ បាញ់ ក៏បានលើកឡើងពីគោលដៅ ចម្បងរបស់គណបក្សប្រជាជនកម្ពុជា ក្នុងការបន្តពង្រឹងសន្តិភាពស្ថិរភាព សន្តិសុខ និង សណ្តាប់ធ្នាប់សង្គម ឲ្យបានរឹងមាំ និងជម្រុញការកសាង អភិវឌ្ឍន៍ប្រទេសលើគ្រប់វិស័យ ប្រកបដោយនិរន្តរភាព ដែលជាសរសរស្តម្ភគ្រឹះដ៏រឹងមាំ ក្នុងការសម្រេចគោលដៅរបស់គណបក្សប្រជាជនកម្ពុជា ក្នុងរយៈពេល ០៥ឆ្នាំខាងមុខ ចាប់ពី ឆ្នាំ ២០១៣ ដល់ឆ្នាំ ២០១៨ ក្នុងការអភិវឌ្ឍន៍ បម្រើប្រទេសជាតិ ក្នុងការឆ្លើយតប ទៅនិងឆន្ទះម្ចាស់ឆ្នោត ។
ក្នុងខ្លឹមសារនៃសារលិខិតនោះដែរ ក៏បានធ្វើការវាយ តម្លៃខ្ពស់របស់រាជរដ្ឋាភិបាល ក្នុងការទទួលជូនដំណើរប្រជាពលករដែលវិលត្រឡប់មកពីប្រទេសថៃ បានវិលទៅដល់ លំនៅដ្ឋានប្រកបដោយសុវត្ថិភាព ព្រមទាំងផ្តល់សេវាការងារ និង បណ្តុះបណ្តាលជំនាញបច្ចេកទេស វិជ្ជាជីវៈជូនដល់ ពលករខ្មែរ ក្នុងការចៀសវាងការធ្វើចំណាកស្រុកខុសច្បាប់ ទៅក្រៅប្រទេស ។
ក្នុងសាលិខិតក៏បានធ្វើការអំពាវនាវ ដល់ជនរួមជាតិគ្រប់គណប្សនយោបាយ និង មជ្ឈដ្ឋានទាំងឡាយ សូមជៀសវាងនូវអំពើដែលនាំឲ្យបែកបាក់សង្គមជាតិ គឺធ្វើសកម្មភាពរួមគ្នាក្រោមដំបូលរដ្ឋធម្មនុញ្ញតែមួយ ដើម្បីសង្គមជាតិខ្មែរទាំងមូល ព្រមទាំងរក្សាខ្ជាប់នូវឧត្តម គតិស្នេហាជាតិ ស្រឡាញ់ប្រជាជន ពង្រឹងសាមគ្គីភាព ធ្វើតែអំពើល្អ និង ជៀសវាងនូវរាល់ទង្វើមិនត្រឹមត្រូវ ដោយ បំពានលើគោលការណ៍គណបក្ស ច្បាប់រដ្ឋ ដែលធ្វើឲ្យប៉ះពាល់ដល់សិទ្ធិ និង ផលប្រយោជន៍របស់ប្រជាជន ។
ក្នុងនោះដែរក៏មានតំណាងសមាជិកសមាជិការ នៃអង្គមិទ្ទិញក៏បានឡើងមានចំណាប់អារម្មណ៍ និង ប្តេជ្ញាចិត្ត គាំទ្រ នូវស្មាតី នៃខ្លឹមសារខួបអនុស្សាវរីយ៍លើកទី៦៣ ថ្ងៃបង្កើតគណបក្សប្រជាជនកម្ពុជា ព្រមទាំងប្រឆាំងដាច់ខាត នូវគ្រប់រាល់ឧបាយកលរបស់គណបក្សនយោបាយណា និង មជ្ឈដ្ឋានណា ដើម្បីបម្រើផលប្រយោជន៍របស់ខ្លួន ៕ ដោយឡែកនៅព្រឹកក្នុងថ្ងៃខែឆ្នាំដ៏ដែលនេះនៅស្នាក់ការគណបក្សប្រជាជនកម្ពុជាស្រុកជីក្រែងខេត្តសៀមរាប ឯ.ឩ ង៉ែត នរិន្ទ ប្រធាន កត្តិយស គណះបក្សប្រជាជនកម្ពុជា ចុះជួយស្រុកជីក្រែងនិង ឯ.ឩ សត ណាឌី សមាជិកអចិន្ត្រៃយ៍គណះកម្មាធិការនៃគណះបក្សប្រជាជនខេត្តនិងជាប្រធាន ក្រុមការងារខេត្តចុះជួយស្រុកជីក្រែង ខេត្តសៀមរាប។
បានអញ្ជើជាអធិបតីក្នុងមិទិ្ទញអបអរសាទរខួបលើកទី៦៣ ថ្ងៃបង្កើតគណបក្ស ប្រជាជនកម្ពុជានៅស្នាក់ការគណបក្សប្រជាជនកម្ពុជាស្រុកជីក្រែងខេត្តសៀមរាប ដោយមានសមាសភាពក្រុមការងារគណះបក្សប្រជាជនកម្ពុជាខេត្តចុះជួយស្រុកជីក្រែង និង សមាជិក សមាជិកា ក្នុងស្រុកជីក្រែង ចំនួន៥២៥ នាក់ បានចូលរួមនៅក្នុងមិទិ្ទញអបអរសាទរខួបលើកទី៦៣ ថ្ងៃបង្កើតគណបក្ស ប្រជាជនកម្ពុជាផងដែរ ៕ រូបភាព និង អត្ថបទ លោក ខេង ខេមរា