ខេត្តកំពង់ឆ្នាំង ៖ ឧប្បត្តិហេតុគ្រោះថ្នាក់ចរាចរណ៍មួយ បណ្តាលអោយក្មេងប្រុសម្នាក់រងរបួសធ្ងន់ នៅចំណុចផ្លូវកែង មុខហាងស៊ុបថ្មីដំរី-ស ស្ថិតក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង បង្កដោយម៉ូតូឌ្រីមសង់ ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ កំពង់ឆ្នាំង 1E-0051 ។
ប្រភពពីនគរបាលនៅកន្លែងកើតហេតុ បានអោយដឹងថា មុនពេលកើតហេតុ ម៉ូតូខាងលើ ជិះពីចំណុចដំរី-ស បត់ចូលផ្លូវកែង ជិះដោយល្បឿនលឿន ហើយអ្នកបើកបរជិះម៉ូតូក្នុងអាការៈស្រវឹង ជោគជាំ មកដល់កន្លែងកើតហេតុ មានក្មេងប្រុសម្នាក់ កំពុងអង្គុយលេងទឹកភ្លៀង នៅចិញ្ចើមផ្លូវ ក៍បុកពេញទំហឹងតែម្តង បណ្តាលអោយរងរបួសធ្ងន់ ក្រោយពីបុកក្មេងរួច អ្នកបើកបរខាងលើ ក៍បានជ្រុលទៅបុកស្លាកយីហោហាងស៊ុប ពេញមួយទំហឹង បណ្តាលអោយសន្លប់ស្តូកស្តឹង នៅកន្លែងកើតហេតុ ។
អ្នកបើកបរម៉ូតូខាងលើឈ្មោះ រាជ សុគា ភេទប្រុស អាយុ២២ឆ្នាំ មានទីលំនៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង រីឯក្មេងប្រុសរងគ្រោះឈ្មោះ យ៉ាន សុភក្តិ អាយុ៥ឆ្នាំ មានទំនៅក្នុងភូមិឃុំកើតហេតុខាងលើ ។
ក្រោយកើតហេតុ ម្ចាស់ម៉ូតូ នឹងក្មេងប្រុសរងគ្រោះ ត្រូវបានដឹកបញ្ជូនទៅសង្គ្រោះជាបន្ទាន់ នៅមន្ទីរពេទ្យបង្អែកខេត្តកំពង់ឆ្នាំង រីឯម៉ូតូត្រូវបានកម្លាំងសមត្ថកិច្ច យកទៅរក្សាទុកនៅអធិការដ្ឋាន នគរបាលក្រុងកំពង់ឆ្នាំង ដើម្បីរងចាំការដោះទៅតាមផ្លូវច្បាប់នៅពេលក្រោយ ៕