ខេត្តត្បូងឃ្មុំ៖ នៅវត្តអម្ពវ័នឃុំជំនីក ស្រុកក្រូចឆ្មារ ខេត្តត្បូងឃ្មុំ បានប្រារព្ធមីទ្ទីញរំលឹកខួបលើកទី៦៣ នៃការបង្កើតគណៈ បក្សប្រជាជនកម្ពុជា (២៨.០៦.១៩៥១-២៨.០៦.២០១៤) ក្រោមអធិបតីភាព ឯកឧត្ដម ថេង ច័ន្ទសង្វារ អនុរដ្ឋលេខាធិការក្រសួងអភិវឌ្ឍន៍ជនបទ និងអនុប្រធានក្រុមការងារ ចុះជួយស្រុកក្រូចឆ្មារ និងមានការអញ្ជើញចូលរួម ពីតំណាងគណៈកម្មាធិការបក្ស នៃគណៈបក្សប្រជាជន គ្រប់លំដាប់ថ្នាក់ សមាជិក សមាជិកា គណៈបក្សប្រជាជនកម្ពុជាឃុំជំនីក និងឃុំរការខ្នុរ ប្រមាណជាជាង៥០០នាក់ ។
បន្ទាប់ពីសុន្ទរកថា ពីតំណាងបក្សឃុំ និងចំណាប់អារម្មណ៍ របស់តំណាងសមាជិក គណៈបក្សប្រជាជនរួចមក ឯកឧត្ដម ថេង ច័ន្ទសង្វារ បានឡើងអានសុន្ទរកថា សម្ដេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា ប្រធានគណៈបក្សប្រជាជនកម្ពុជា ថ្លែងក្នុងមីទ្ទីញរំលឹកខួបអនុស្សាវរីយ៍ លើកទី៦៣ ថ្ងៃបង្កើតគណៈបក្សប្រជាជនកម្ពុជា (១៩៥១-២០១៤) បានគូសបញ្ជាក់ថា ថ្ងៃទី២៨ ខែមិថុនា ឆ្នាំ២០១៤ ទិវាគម្រប់ខួប៦៣ឆ្នាំ នៃការបង្កើតគណៈបក្សប្រជាជនកម្ពុជា ដែលនៅគ្រាដំបូងមានឈ្មោះថា «បក្សប្រជាជនកបដិវត្តន៍ខ្មែរ» ដើម្បីដឹកនាំការតស៊ូរំដោះជាតិ ពីពួកអាណានិគមនិយម ដណ្ដើមឯករាជ្យជូនមាតុភូមិ ។
ចាប់តាំងពីពេលបដិសន្ធិមក គណៈបក្សប្រជាជនកម្ពុជា បានរក្សាខ្ជាប់ឥតប្រែប្រួល នូវឧត្ដមគតិរបស់ខ្លួន គឺរួមសុខរួមទុក្ខ ជាមួយប្រជាជន ពុះពារធ្វើពលិកម្មឥតរួញរា ដើម្បីប្រជាជាតិកម្ពុជា ឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម ។
មួយចំណែកទៀត យើងប្ររព្ធពិធីនេះឡើង ក្នុងស្មារតីគោរព ដឹងគុណយ៉ាងជ្រាលជ្រៅបំផុត ចំពោះយុទ្ធជន យុទ្ធនារី និងអ្នកស្នេហាជាតិខ្មែរគ្រប់ជំនាន់ ដែលបានតស៊ូប្រយុទ្ធយ៉ាងប្ដូរផ្ដាច់ ហ៊ានលះបង់នូវសាច់ឈាម និងអាយុជីវិត ប្រកបដោយវីរភាពខ្ពង់ខ្ពស់ ដើម្បីបុព្វហេតុជាតិ និងប្រជាជន ។ ខួបអនុស្សាវរីយ៍នេះ ប្រារព្ធឡើងក្នុងសភាពការណ៍ ដែលប្រជាជនកម្ពុជាសម្រេចសមិទ្ធិផលថ្មីៗថែមទៀត លើគ្រប់វិស័យក្នុងដំណើរការអភិវឌ្ឍន៍សេដ្ឋកិច្ច សង្គម រយៈពេល៦ខែ ដើមឆ្នាំ២០១៤នេះ ទោះបីជានៅមានបញ្ហាស្មុគ្រស្មាញខ្លះក្ដី ។
រយៈពេល ៦៣ឆ្នាំកន្លងទៅនេះ គណៈបក្សប្រជាជនបានឆ្លងកាត់ ដំណាក់កាលជាប្រវត្តិសាស្ត្រជាច្រើន ប្រកបដោយមោទនភាព ដោយបានរក្សានូវសារជាតិ និងប្រពៃណីដ៏ថ្លៃថ្លា ដ៏ល្បីរន្ទៅរបស់ខ្លួន ។ គណៈបក្សបានដឹកនាំចលនាបដិវត្តន៍រំដោះជាតិខ្មែរទាំងមូល ដើម្បីដណ្ដើមឯករាជ្យពីពួកអាណានិគមនិយម នៅឆ្នាំ១៩៥៣ ជាបន្តបន្ទាប់មកគណៈបក្សកម្ពុជា បានរួបរួមក្រោមទង់សរណសិរ្សសាមគ្គីសង្គ្រោះជាតិកម្ពុជា ផ្ដួលរំលំរបបដ៏យង់ឃ្នង់ ប៉ុល ពតថ្ងៃជ័យជំនះ ៧មករា ១៩៧៩ ។
ក្នុងរយៈពេល ៣៦ឆ្នាំ ក្រោយថ្ងៃជ័យជម្នះ ៧មករា ជាមួយការដឹកនាំរបស់គណៈបក្សប្រជាជនកម្ពុជា បានឆ្លងកាត់ឧបសគ្គ ការលំបាកលំបិនជាទីបំផុត ប្រកបដោយជោគជ័យ និងកិត្តិយសបង្កើតបានសិមទ្ធិផលធំៗ ជាប្រវត្តិសាស្ត្រ ហើយបានប្រែក្លាយពីទឹកដីមួយមកជាទឹកដីប្រកបដោយសន្តិភាព ស្ថិរភាព និងកំពុងមានការអភិវឌ្ឍន៍លើគ្រប់វិស័យ ដូចបច្ចុប្បន្ននេះ ។
ក្នុងឱកាសដ៏ថ្លៃថ្លានេះ ខ្ញុំសូមសម្ដែងនូវការគោរព និងការដឹងគុណ ដ៏ជ្រាលជ្រៅបំផុត ចំពោះជនរួមជាតិនៅគ្រប់ទិសទី ដែលបានជឿជាក់លើការដឹកនាំរបស់គណៈបក្សប្រជាជនកម្ពុជា ហើយសូមសន្យាជាឱឡារិកថា គណៈបក្សនឹងបន្តពុះពារអនុវត្តឲ្យបានជោគជ័យ នូវកម្មវិធីនយោបាយ របស់ខ្លួនឆ្លើយតបទៅនឹងបំណងប្រាថ្នា ដ៏ពិសិដ្ឋរបស់ប្រជាជន ។
ដោយឡែក ឆ្លៀតក្នុងឱកាសថ្ងៃដដែលនោះដែរ ឯកឧត្ដម ថេង ច័ន្ទសង្វារនិងប្រតិភូអមដំណើរ ក៏បាននាំយកទៀតវស្សា និងទ័យទាន រួមមាន ៖ ទៀនព្រះវស្សា ប្រេងកាត អង្ករ ទឹកក្រូច ទឹកបរិសុទ្ធ មី ទៅប្រគេនដល់ព្រះសង្ឃ គង់ចាំព្រះវស្សា ស្ថិតនៅក្នុងវត្តលួងកណ្ដាល និងវត្តរការខ្នុរ ស្រុកក្រូចឆ្មារ ដើម្បីអុធបំភ្លឺ ផងដែរ ៕