ភ្នំពេញៈ នាព្រឹកថ្ងៃទី៣០ ខែមិថុនា ឆ្នាំ២០១៤ លោក នុត ពុធដារ៉ា អភិបាលនៃគណៈអភិបាលខណ្ឌដង្កោ បានចូលរួមជាអធិបតីក្នុងពិធីបើកការដ្ឋានស្ថាបនាផ្លូវបេតុងចំនួន០២ខ្សែ ស្ថិតនៅក្នុងភូមិថ្មី និងភូមិបាគូ សង្កាត់ដង្កោ ដោយមានការអញ្ជើញចូលរួមពីលោកអភិបាលរង មន្ត្រីរាជការសាលាខណ្ឌ និងសង្កាត់ដង្កោ ជាច្រើនរូប ។
លោក នុត ពុធដារ៉ា បានធ្វើការសារទរចំពោះផ្លូវបេតុងថ្មីក្នុងមូលដ្ឋានសង្កាត់ដង្កោចំនួន០២ខ្សែ ដែលនេះគឺជាការអភិវឌ្ឍន៍ថ្មីទៀតដល់មូលដ្ឋាន ស្របនឹងការអភិវឌ្ឍន៍រីកចម្រើននៅទូទាំងប្រទេស ក្រោមការដឹកនាំរបស់រាជរដ្ឋាភិបាល ។ លោកអភិបាលក៏បានធ្វើការផ្តាំផ្ញើរដល់បងប្អូនប្រជាពលរដ្ឋទាំងអស់ដែលរស់នៅតាមបណ្តោយផ្លូវស្ថាបនា នាពេលខាងមុខនេះ ឲ្យមានការយោគយល់ដល់ផលប៉ះពាល់តិចតួច ដែលកើតមានឡើងដោយសារការស្ថាបនាផ្លូវបេតុងថ្មីនេះ និងជួយសម្រួលដល់ការស្ថាបនាឲ្យបានឆាប់រួចរាល់ បានប្រើប្រាស់ ហើយសូមឲ្យបងប្អូនត្រួតពិនិត្យមើលតាមដានលើការស្ថាបនា និងរាយការណ៍ដល់អាជ្ញាធរសង្កាត់ ខណ្ឌប្រសិនបើពិនិត្យឃើញថាមានកង្វះខាត ឬមានបញ្ហា ។ លោកអភិបាលក៏ណែនាំដល់ក្រុមហ៊ុនទទួលការសូមឲ្យអនុវត្តឲ្យបានល្អត្រឹមត្រូវ តាមលក្ខណៈបច្ចេកទេស និងអនុវត្តសមស្របតាមកិច្ចសន្យាទទួលការ ។
គួរបញ្ជាក់ថាៈ ផ្លូវបេតុងនេះជាផ្លូវគ្មានសសៃដែក មានប្រវែងសរុប ២៣៧ម៉ែត្រ ទទួលការដោយ ក្រុមហ៊ុនសំណង់ ផាត់ សុផល ស្ថិតក្នុងគម្រោងមូលនិធិអភិវឌ្ឍសង្កាត់ ឆ្នាំ២០១៤ ក្នុងនោះ៖ - ភូមិថ្មី មានប្រវែង ១២០ម៉ែត្រ ទទឹង ០៤ម៉ែត្រ និងកម្រាស់ ០,១៥ម៉ែត្រ - ភូមិបាគូ មានប្រវែង ១១៧ម៉ែត្រ ទទឹង ០៤ម៉ែត្រ និងកម្រាស់ ០,១៥ម៉ែត្រ ។
