ខេត្តកំពង់ធំ៖ សកម្មភាពរបស់សមាគមអតីតយុទ្ធជនខេត្តកំពង់ធំ បានបន្តចុះសួរសទុក្ខគ្រួសារអតីតយុទ្ធជន និងប្រជាពលរដ្ឋ ដែលមានជីវភាពទីទ័លក្រលំបាក ខ្វះខាតនៅតាមមូលដ្ឋាន ក៏ដូចជាការចុះសិក្សាស្វែង យល់ពីសុខទុក្ខរបស់អតីតយុទ្ធជន ក្រោមការណែនាំ និងចង្អុលបង្ហាញពីសំណាក់ ឯកឧត្តមទេសរដ្ឋមន្រ្តី គន់ គីម អគ្គលេខាធិការសមាគមអតីតយុទ្ធជនកម្ពុជា បានជម្រុញឲ្យគណកម្មាធិការសមាគម ខេត្ត និង គណកម្មការសមាគមស្រុកក្រុង យកចិត្តទុកដាក់ពីសុខទុក្ខ ទ្វេរដងមកលើអតីតយុទ្ធជន និងប្រជាពរដ្ឋ ឲ្យសក្ក័សមនិងការតបស្នងសងគុណ ក្នុងអណត្តិទី៦នេះ ។
ដោយបានទទួលនិងបទបញ្ជា និងគោរពនូវការផ្តាំផ្ញើរពីសំណាក់ ឯកឧត្តមទេសរដ្ឋមន្រ្តី គន់ គីម ឯកឧត្តម ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ និងជាប្រធានសមាគមអតីតយុទ្ធជនកម្ពុជា ខេត្ត បានធ្វើសកម្មភាពដូចភ្ញៀងរលឹម មិនគិតពីថ្ងៃឈប់សម្រាក់ ឬថ្ងៃធ្វើការប្រចាំថ្ងៃក្តី បានឆ្លៀតឳកាស ចុះទៅតាមមូលដ្ឋាន ដើម្បីសំណេះសំណាលជាមួយគ្រួសារអតីតយុទ្ធជន និងប្រជាពលរដ្ឋ ដូចពាំនាំនូវការផ្តាំ ផ្ញើរសួរទុក្ខ និងថ្លែងអំណរគុណបងប្អូនប្រជាពលរដ្ឋ ដែលបានគាំទ្រឲ្យសម្តេចតេជោ ហ៊ុន សែន ប្រធានសមាគមអតិតយុទ្ធជនកម្ពុជា បន្តធ្វើជានាយករដ្ឋមន្រ្តីបន្តទៀត ។
ជាក់ស្តែងនៅ ថ្ងៃទី១៦ខែមករា ឆ្នាំ២០១៩ នេះឯកឧត្តម ឧត្តមសេនីយ៍ទោ សោម ស៊ុន បានដឹកនាំសហការី ចុះសួរសុខទុក្ខ គ្រួសារលោក ម៉េត សារំ អាយុ៥៩ឆ្នាំ មានភរិយាឈ្មោះ ភិន ហយ អាយុ៥៤ឆ្នាំ មានកូនចំនួន ៧នាក់ លោក ម៉េត សារំ ជាជនពិការ មិនអាចធ្វើការអ្វីបាន ដោយពឹងផ្អែកលើប្រពន្ធមើលថែ សព្វថ្ងៃមានមុខរបបដើរស៊ីឈ្នួលគេសម្រាប់ជីវភាពប្រចាំថ្ងៃ ។
លោក ម៉េត សារំ ជាអតីតយុទ្ធជន មានឋានៈនាយឯក ចូលបម្រើក្នុងជួរកងទ័ព នៅឆ្នាំ១៩៨៥ អង្គភាពកងអនុសេនាធំស៊ើបការ នៃយោធាខេត្តកំពង់ធំ បន្ទាប់មកក៏ត្រូវរបួស ពិការ នៅឆ្នាំ១៩៩៦ ក្នុងសមរភូមិ ក្នុងស្រុកសណ្ដាន់ ខណៈពេលជូនរត់ក្រោះទៅប្រគល់ឲ្យកងពលលេខ១២ ចាស់នៅតំបន់អូរចន្ទ្រាយ ព្រំប្រទល់ជាប់ស្រុករវៀង ខេត្តព្រះវិហារ និងស្រុកសណ្តាន់ ខេត្តកំពង់ធំ បច្ចុប្បន្នរស់នៅភូមិត្រពាំងផ្ដៀក ឃុំសាលាវិស័យ ស្រុកប្រាសាទបល្ល័ង ។ក្នុងឱកាសចុះសួរសុខទុក្ខនេះក្រុមការងារបានប្រគល់ជូននូវអំណោយរបស់សម្ដេចតេជោហ៊ុន សែន តាមរយឯកឧត្តមឧត្ដមសេនីយ៍ឯកហ៊ុន ម៉ាណែត អគ្គលេខាធិការរងសមាគមអតីតយុទ្ធជនកម្ពុជា មាន អង្ករចំនួន ៥០ គីឡូក្រាម មីយើងចំនួន២ កេស ទឹកត្រី ទឹកស៊ីអ៊ីវចំនួន២ យួរ និងថវិកាចំនួន១៦០,០០០ រៀល ។
ចំណែក ប្រជាពលរដ្ឋទីទ័លក្រមួយគ្រួសារ ទៀត ជាស្រ្តីមេម៉ាយ ឈ្មោះឡាយ សៀក អាយុ៤២ ឆ្នាំ ត្រូវបាន បែកបាក់ពីស្វាមី អស់រយៈពេល១៥ ដោយបន្សល់ទុកកូនកំព្រាឪពុកចំនួន៣ កូណប្រុសមានជម្ងឺសរសៃប្រាសាទ នៅសល់កូនស្រី២ នាក់ ប្រកបមុខរបរកម្មករស៊ីឈ្នួលគេ ក្រុមគ្រួសារនេះរស់នៅភូមិ ដងអន្ទាក់ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ និងបានទទួលនូវអំណោយរបស់សម្ដេចតេជោ មាន អង្ករចំនួន ៥០ គីឡូក្រាម មីយើងចំនួន២ កេស ទឹកត្រី ទឹកស៊ីអ៊ីវចំនួន២ យួរ និងថវិកាចំនួន១០០,០០០ រៀល ។ ដោយ ប៊ុន រដ្ឋា
