កំពង់ធំ៖អដ្ឋិធាតុចំនួន១៨ ដែលបានជីករុករកឃើញដោយ ក្រុមបច្ចេកទេសជីករុករកអដ្ឋិធាតុការ៧២(K72) សហការជាមួយ កម្លាំងបញ្ជាការដ្ឋានតំបន់ប្រតិបត្តិការសឹករងកំពង់ធំ នៅជំហានទី១ ដំណាក់កាលទី១៨ រដូវប្រាំងឆ្នាំ២០១៨-២០១៩ នៅក្នុងភូមិសាស្ត្រខេត្តកំពង់ធំ ត្រូវបានធ្វើមាតុភូមិនិវត្តន៍ ទៅកាន់ប្រទេសវៀតណាម ដែលជាប្រទេស កំណើតវិញ នៅរសៀលថ្ងៃទី ១៨ ខែមករា ឆ្នាំ ២០១៩ ។
ពិធីប្រគល់អដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតនាសម័យសង្រ្គាម វាយរំដោះប្រជាពលរដ្ឋខ្មែរ និងបានពលីជីវិតក្នុងភូមិសាស្រ្តខេត្តកំពង់ធំ ត្រូវបានពិធីចុះហត្ថលេខាផ្ទេរ ប្រគល់អដ្ឋិធាតុកងទ័ពស្ម័គ្រចិត្តវៀតណាមចំនួន១៨អដ្ឋិធាតុ នៅបញ្ជាការដ្ឋានតំបន់ប្រតិបត្តិការសឹករងកំពង់ធំ ក្រោមអធិបតីភាព ឯកឧត្តម ឧត្តមសេនីយ៍ទោ សោម ស៊ុន មេបញ្ជាការងយោធភូមិភាគទី៤ មេបញ្ជាការតំបន់ប្រតិបត្តិការសឹក រងកំពង់ធំ និងភាគីថ្នាក់ដឹកនាំបញ្ជាការដ្ឋានយោធាខេត្តប៊ិញភឿក នៃសាធារណៈរដ្ឋសង្គមនិយមវៀតណាមរួមជាមួយក្រុមបច្ចេកទេសជីករុករកអដ្ឋិធាតុការ៧២(K72)ចំនួន ២២ នាក់។
ឧត្តមសេនីយ៍ទោ សោម ស៊ុន បានបញ្ជាក់ថា អដ្ឋិធាតុកងទ័ពស្ម័គ្រចិត្តវៀតណាមដែលកងកម្លាំង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ សហការជាមួយ ក្រុមបច្ចេកទេស(K70+K72) រួមជាមួយអាជ្ញាធរដែនដី ប្រជាពលរដ្ឋ នៅទូទាំងខេត្តកំពង់ធំបានជីករុករកឃើញតាំងពីឆ្នាំ២០០៣ រហូតមកដល់ពេលនេះមានចំនួន ១,១០០ អដ្ឋិធាតុរួចហើយដែលបានធ្វើមាតុភូមិនិវត្តន៍ (ក្នុងនោះសហការជីកយកបាននៅក្រៅខេត្តកំពង់ធំចំនួន០៨អដ្ឋិធាតុ ផងដែរ ហើយយើងនិងបន្តសហការជីករុករកបន្តអដ្ឋិធាតុដែលនៅសេសសល់ប្រមាណ៣៥ ទៅ ៤០ អដ្ឋិធាតុទៀត នៅជំហានទី២ ដំណាក់កាលទី១៨ រដូវប្រាំងឆ្នាំ២០១៨-២០១៩ នៅពេលខាងមុខនេះ។
ឯកឧត្តម ឧត្តមសេនីយ៍ទោ សោម ស៊ុន បានកោតសរសើរ ចំពោះការខិតខំប្រឹងប្រែង រួមទាំងកិច្ចសហប្រតិ បត្តិការល្អ រវាងបញ្ជាការដ្ឋានតំបន់ប្រតិបត្តិការសឹករងកំពង់ធំ និង ក្រុមបច្ចេកទេស(K70+K72) និងសូមថ្លែង អំណរគុណ ចំពោះអាជ្ញាធរដែនដី និងប្រជាពលរដ្ឋ ទាំងអស់ដែលមានទឹកចិត្តល្អប្រពៃ ជួយប្រាប់ទីតាំងកប់ សាកសព នៅតាមទីតាំងផ្សេងៗ ទើបធ្វើឲ្យការងារជីករុករកអដ្ឋិធាតុការ ទទួលបានលទ្ធលល្អប្រសើរ នេះបានបញ្ជាក់ឲ្យឃើញថា បងប្អូនប្រជាពលរដ្ឋខ្មែរ នៅតែមានទឹកចិត្តសណ្តោសប្រណី មេត្តាធម៌ ដឹងគុណចំពោះការបូជាជីវិតដើម្បីប្រជាជនខ្មែរ ពីសំណាក់កងទ័ពស្ម័គ្រចិត្តវៀតណាម និងសូមបួងសួងឲ្យ វិញ្ញាណ ក្ខនរបស់កងទ័ពស្ម័គ្រចិត្តវៀតណាម វិលត្រឡប់ទៅកាន់ស្រុកកំណើត ដើម្បីឲ្យសាច់ញាតិបងប្អូន បានប្រកប ពិធីបុណ្យតាមប្រពៃណីសាសនា នៃប្រជាជនវៀតណាម។ដោយ ប៊ុន រដ្ឋា
