កំពង់ធំ៖ អតីតយុទ្ធជនពិការ០១ គ្រួសារ ត្រូវបានយកចិត្តទុកដាក់ ពីសំណាក់ ឯកឧត្តម ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធកម្ពុជា ខេត្តកំពង់ធំ បានដឹកនាំសហការី និង អាជ្ញាធរដែនដីចុះសួរសុខទុក្ខ ក្រុមគ្រួសារអតីតយុទ្ធជនពិការ ដែលមានជីវភាពខ្វះខាត រស់នៅស្រុកកំពង់ស្វាយ ខេត្តកំពង់ធំ នៅល្ងាចថ្ងៃសៅរ៍ ទី១៩ ខែមករា ឆ្នាំ២០១៩។
អតីតយុទ្ធជន លោក ចាន់ រ៉ាវី អាយុ ៥៨ ឆ្នំា បានរៀបរាប់ថា ពីមុនជាយោធានៅខេត្តរតនគីរី ជាស្រុកកំណើត ជនជាតិភាគតិច ក្នុងអំឡុងឆ្នាំ១៩៨៥ និបានចូលរួមជាមួយកងទ័ពស្ម័គ្រចិត្តវៀតណាម មកធ្វើសកម្មភាពនៅតំបន់ស្រុកជាំក្សាន្ត ខេត្តព្រះវិហារ ត្រូវរបួសដោយសារផ្ទុះមីននៅឆ្នាំ១៩៨៧-១៩៨៨ ក្រោយមក នៅអង្គភាពវិស្វកម្ម នៅឃុំផ្អាវ ស្រុកជើងព្រៃ ខេត្តកំពង់ចាមភរិយាឈ្មោះ ហ៊ឺម លួន អាយុ ៤៦ ឆ្នំា មានកូនចំនួន ០៦ នាក់ បច្ចុប្បន្នរស់នៅភូមិត្រពាំងចំបក់ ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំដោយស្ថានភាពជំងឺរបួសលោក ចាន់ រ៉ាវី មិនមានប្រកបមុខរបរអ្វីបានទេ ត្រូវបានកូនប្រុសម្នាក់ ចិញ្ចឹមឪពុកម្ដាយ និងប្អូនៗ រស់នៅក្នុងខ្ទមធ្លុះធ្លាយបែកបាក់តូចចង្អៀតនេះ នឹងពុំអាចសម្រានបាននៅពេលមានភ្លៀងម្ដងៗ។
ឯកឧត្តម សោម ស៊ុន បានពាំនាំការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា ឯកឧត្តម បានពាំនាំការថ្លែងអំណរគុណពីសំណាក់សម្តេចតេជោ ដល់បងប្អូនអតីតយុទ្ធជនយើងទាំងអស់ ដែលបានបំពេញកាតព្វកិច្ចជាពលរដ្ឋដ៏ល្អក្នុងការចូលរួមបោះឆ្នោតគាំទ្រសម្តេចអគ្គមហាសេនាបតីតេជោ ហ៊ុន សែន បន្តធ្វើជានាយករដ្ឋមន្ត្រី នៅអាណត្តិទី៦នេះ ដើម្បីប្រទេសជាតិមានសន្តិភាព និងការអភិវឌ្ឍ ។
ក្នុងឱកាសសំណេះសំណាលសាកសួរសុខទុក្ខ និងស្វែងយល់ពីជីវភាពរស់នៅរបស់គ្រួសារអតីតយុទ្ធជននេះ ឯកឧត្តម សោម ស៊ុន និង ក្រុមការងារសមាគមអតីតយុទ្ធជន ខេត្តកំពង់ធំ បានពាំនាំនូវអំណោយរបស់សម្ដេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា តាមរយៈ ឯកឧត្តម ឧត្ដមសេនីយ៍ឯក បណ្ឌិត ហ៊ុន ម៉ាណែត អគ្គលេខាធិការរង សមាគមអតីតយុទ្ធជនកម្ពុជា ផ្ដល់ជូនគាត់នូវ អង្ករ ចំនួន ៥០ គីឡូក្រាម , មីយើងចំនួន ០២ កេស , ទឹកត្រីទឹកស៊ីអ៊ីវ ចំនួន ០២ យួរ និងថវិកាចំនួន ១០០,០០០ រៀល ។អាជ្ញាធរដែនដី ប្រជាពលរដ្ឋ និងក្រុមគ្រួសារអតីតយុទ្ធជន ពិតជាមានសេចក្តីត្រេកអរយ៉ាងខ្លាំង ដោយជានិច្ចកាល សម្តេចតេជោតែងតែផ្តល់ភាពកក់ក្តៅដល់បងប្អូនអតីតយុទ្ធជន តាមរយៈ ប្រធានសមាគមអតីតយុទ្ធជនកម្ពុជា ខេត្តនីមួយៗនៅទូទាំងប្រទេសកម្ពុជា និងសូមគោរពជូនពរដល់សម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំង បុត្រា-បុត្រី ចៅប្រុស-ចៅស្រី សូមជួបប្រទះតែនូវពុទ្ធពរទាំងឡាយ បួន ប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។
ដោយ ប៊ុន រដ្ឋា
