កំពង់ចាម៖ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម និងជាអនុប្រធានកិត្តិយសសាខាកាកបាទក្រហមកម្ពុជាខេត្តកំពង់ចាម អមដំណើរដោយមន្ត្រីពាក់ព័ន្ធ នាព្រឹកថ្ងៃទី២២ ខែមករា ឆ្នាំ២០១៩នេះ បាននាំយកអំណោយ សម្ដេចគតិព្រឹទ្ធិបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ទៅចែកជូនប្រជាពលរដ្ឋដែលរងគ្រោះដោយការបាក់ច្រាំងទន្លេ ចំនួន៣គ្រួសារ ដែលរស់នៅក្នុងភូមិព្រែកស្តី ឃុំព្រះអណ្តូង និងបន្តដំណើរចុះពិនិត្យស្ថានភាពបាក់ច្រាំងទន្លេក្រោយផ្ទះកំណើតរបស់ សម្តេចនាយករដ្ឋមន្ត្រី ហ៊ុន សែន នៅភូមិពាមក្រៅ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម ដែលកំពុងទទួលរងការគំរាមកំហែងដោយគ្រោះធម្មជាតិ ផងដែរ។
ថ្លែងក្នុងពិធីសំណេះសំណាល និងចែកអំណោយនោះ ឯកឧត្ដម គួច ចំរើន អភិបាលខេត្តកំពង់ចាម បានពាំនាំនូវប្រសាសន៍ផ្ដាំផ្ញើ សាកសួរសុខទុក្ខ ពីសំណាក់ប្រមុខរាជរដ្ឋាភិបាលកម្ពុជា សម្ដេចកិតិតព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងឯកឧត្ដម ហ៊ុន ណេង ប្រធានកិត្តិយសសាខាកាកបាទក្រហមកម្ពុជាខេត្ត និងអ្នកតំណាងរាស្ត្រមណ្ឌលកំពង់ចាម ផងដែរ។
ឆ្លៀតក្នុងឱកាសនោះ ឯកឧត្តមអភិបាលខេត្ត បានលើកឡើងថា ចំពោះមូលហេតុនៃការបាក់ច្រាំងទន្លេនេះ គឺបណ្ដាលមកពីកត្តាធម្មជាតិ ជាក់ស្ដែងដូចដែលបងប្អូនដឹងស្រាប់ហើយ គឺនៅតំបន់នេះ បេីទោះជាគ្មានការបូមខ្សាច់ទេ ក៏នៅតែមានការបាក់ច្រាំងជាបន្តបន្ទាប់ដែរ ព្រោះវាអាស្រ័យលើចរន្តទឹក បេីទឹកហូរខ្លាំងបុកប៉ះចំត្រេីយខាងណាមួយ តំបន់នោះនឹងត្រូវរងការបាក់ស្រុតជាមិនខាន ទោះបេីដីផ្ទះកំណើតសម្តេចនាយករដ្ឋមន្ត្រី យេីងបច្ចុប្បន្ននេះ រងការបាក់ស្រុតជិតដល់ផ្ទះហើយដែរ។
ជាមួយគ្នានោះ ឯកឧត្តមអភិបាលខេត្ត ក៏បានជំរុញដាក់ផែនការឲ្យមន្ទីរធនធានទឹកនិងឧតុនិយម ត្រូវប្រមូលទិន្នន័យឲ្យបានគ្រប់ជ្រុងជ្រោយផងដែរ ដេីម្បីឈានទៅដល់បង្កើតផែនការដោះស្រាយបញ្ហាចំពោះមុខ ព្រោះក្នុង១ឆ្នាំៗ មានប្រជាពលរដ្ឋជាច្រើនគ្រួសារ ត្រូវប្រឈម និងរងគ្រោះដោយការបាក់ច្រាំង ជាបន្តបន្ទាប់។
សូមបញ្ជាក់ផងដែថា អំណោយដែលត្រូវចែកជួនប្រជាពលរដ្ឋ ទាំង៣គ្រូសារនេះគឺ ក្នុងមួយគ្រួសារៗទទួលបានអង្ករ៥០គីឡូក្រាម ត្រីខកំប៉ុង២យួរ មីចំនួន២កេសតូច ទឹកត្រី២យួរ ទឹកស៊ីអ៊ីវ ២យួរ និងថវិកា២០ម៉ឺនរៀល ផងដែរ ៕