ក្រុមបាល់ទាត់មាន់គកបារាំងមានក្តីសង្ឃឹមថា ពួកគេនឹងអាចយកឈ្នះលើក្រុមឥន្ទ្រីដែកទ្វីបអាហ្វ្រិកនីហ្សេរីយ៉ាបានសម្រាប់ការប្រកួត World Cup វគ្គ១៦ក្រុមចុងក្រោយនៅយប់នេះ ។
ក្រុមទាំងពីរនឹងត្រូវជួបគ្នាក្នុងកីឡាដ្ឋាន Estádio Nacional de Brasília ដែលការប្រកួតនេះ គឺត្រូវកាត់សេចក្តី ដោយអាជ្ញាកណ្តាលសញ្ជាតិអាមេរិកគឺលោក Mark Geiger (ម៉ាក ហ្គីហ្គើ) ។ ក្រុមទាំងពីរនេះមានប្រវត្តិជួបគ្នាម្តងគត់ដែលកាលពីថ្ងៃទី២ខែមិថុនាឆ្នាំ២០០៩ នីហ្សេរីយ៉ាបានយកឈ្នះបារាំង១-០ក្នុងការប្រកួតជាលក្ខណៈមិត្តភាពអន្តរជាតិ ។ គ្រូបង្វឹកបារាំងលោក Didier Deschamps (ឌីឌីយ៉េ ដេសុំ) បាននិយាយថា “យប់នេះបារាំងនឹងលេងប្រព័ន្ធ ប្រយុទ្ធ ៤-៣-៣ ហើយក្រុមត្រៀមខ្លួនបានយ៉ាងល្អសម្រាប់ការប្រកួតនេះ” ។ គួរបញ្ជាក់ថា ក្រុមដែលឈ្នះក្នុងការប្រកួតនេះនឹងត្រូវទៅជួបជាមួយក្រុមដែលឈ្នះរវាងអាល្លឺម៉ង់និងអាល់ហ្សេរីនៅវគ្គ៨ក្រុមចុងក្រោយ ៕
