កំពង់ចាម: ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជើញជាអធិបតីក្នុងអង្គសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡា ឆ្នាំសិក្សា ២០១៧-២០១៨ និងលើកទិសដៅឆ្នាំសិក្សា ឆ្នាំ២០១៨-២០១៩ ដែលពិធីនេះត្រូវបានប្រារព្ធឡើងនារសៀលថ្ងៃទី២៥ ខែមករា ឆ្នាំ២០១៩ នៅសាលសន្និសីទសាលាខេត្តកំពង់ចាម ដោយមានការអញ្ជេីញចូលរួមពីឯកឧត្តម អភិបាលរងខេត្ត និងមន្ទីរអង្គភាពពាក់ព័ន្ធជុំវិញខេត្ត ព្រមទាំងលោកគ្រូ អ្នកគ្រូប្រមាណជាង៦០០នាក់ ផងដែរ។
ថ្លែងក្នុងពិធីនោះ ឯកឧត្ដម គួច ចំរើន អភិបាលខេត្តកំពង់ចាម បានលើកឡើងថា កន្លងមកលោកគ្រូ អ្នកគ្រូទាំងអស់បានយកកម្លាំងកាយចិត្តគំនិតបញ្ញាស្មារតី ឆន្ទៈ មនសិការ បង្រៀនបណ្ដុះបណ្ដាលសិស្សឲ្យទទួលចំណេះដឹង ចំណេះធ្វើ សីលធម៌ និងចេះរស់នៅបានល្អ និងអប់រំសិស្សឲ្យក្លាយទៅជាកូនល្អ មិត្តល្អ និងពលរដ្ឋល្អ ដែលជាធនធានមនុស្ស ដ៏សំខាន់របស់ជាតិ ក្នុងការបន្តវេន កសាងជាតិឲ្យរីកចម្រើនដើរទាន់សម័យកាលទំនើប នៃបចេ្ចកវិទ្យាថ្មីរបស់ពិភពលោក។ ដូច្នេះលោកគ្រូ អ្នកគ្រូ ក៏ដូចជាមន្ត្រីពាក់ព័ន្ធទាំងអស់ មិនថានៅតំបន់ទីប្រជុំជន ឬតំបន់ដាច់ស្រយាលនោះទេ គឺត្រូវបន្តខិតខំកសាងសាលារៀន ឲ្យមានគុណភាពខ្ពស់ និងស្វែងរកកុមារឲ្យចូលរៀនផងដែរ។
ជាមួយគ្នានោះ ឯកឧត្តមអភិបាលខេត្ត ក៏បានជំរុញដល់លោកគ្រូ អ្នកគ្រូ និងមន្ត្រីពាក់ព័ន្ធទាំងអស់ ត្រូវជួយផ្សព្វផ្សាយ អំពីគ្រោះរាំងស្ងួតដែលនឹងកេីតមានឡើងនារដូវប្រាំងឆ្នាំ២០១៩នេះ គឺសូមឲ្យប្រជាពលរដ្ឋ គួរកុំបន្តធ្វើការសាបព្រួសស្រូវប្រាំជាលើកទី២ ព្រោះមិនមានទឹកគ្រប់គ្រាន់សម្រាប់ស្រោចស្រពនោះទេ ហើយថែមទាំងអាចខ្វះខាតទឹក ដែលនឹងប៉ះពាល់ដល់សត្វចិញ្ចឹម និងសត្វព្រៃទៀតផង។ ជាពិសេសត្រូវជំរុញដល់សេវាក ត្រូវខិតខំតបណ្ដាញទឹក ទៅដល់តំបន់ដែលមិនទាន់មានទឹក ឲ្យបានឆាប់រហ័សផងដែរ ៕