កំពង់ចាម: ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយអភិបាលរងខេត្ត និងមន្ត្រីពាក់ព័ន្ធ នាល្ងាចថ្ងៃទី២៥ ខែមករា ឆ្នាំ២០១៩នេះ បានអញ្ជើញជាអធិបតីក្នុងពិធីបើកការដ្ឋានសាងសង់ព្រះវិហារឥស្លាម ដែលស្ថិតនៅក្នុងភូមិព្រៃខ្ជាយ ឃុំបារាយណ៍ ស្រុកព្រៃឈរខេត្តកំពង់ចាម ព្រមទាំងបានពិសារអាហារសាមគ្គីជាមួយបងប្អូនខ្មែរឥស្លាម ផងដែរ។ 
លោក កេី ណិម៉ាត់ គណៈដឹកនាំ(ហាកឹម) បានឲ្យដឹងថា ក្នុងឆ្នាំ១៩៨២ វិហារនេះចាប់ផ្ដើម សាងសង់ឡើងអំពីឈើ ដំបូលប្រក់ក្បឿង លុះមកដល់ឆ្នាំ ១៩៨៧ បានធ្វើជាបេតុងវិញ ហើយដោយសារការសាងសង់ ពេលនោះខ្វះបច្ចេកទេស គ្មានគុណភាពធ្វើឲ្យឆាប់ទ្រុឌទ្រោម និងមានជ្រាបទឹកស្ទើរគ្រប់ទីកន្លែង ពេលមានភ្លៀងធ្លាក់ម្តងៗ បន្ទាប់មក ទើបមានការឯកភាពគ្នា សម្រេច រុះរើចេញ និងស្វែងរកជំនួយ ដើម្បីសាងសង់វិហារនេះឡើងវិញ រហូត មកដល់ពេលនេះ មានសប្បុរសជន នៃអង្គការមូលនិធិមូស្លីមកម្ពុជា បានជួយជ្រោមជ្រែង ដើម្បីសាងសង់ព្រះវិហារនេះឡើងវិញ ។
ថ្លែងក្នុងពិធីនោះដែរ ឯកឧត្ដម គួច ចំរើន អភិបាលខេត្តកំពង់ចាម បានលើកឡើងថា បន្ទាប់ពីប្រទេសកម្ពុជាយើង បានធ្លាក់ក្នុងភ្លើងសង្គ្រាម ជាពិសេសនៅជំនាន់ ប៉ុល ពត ៣ឆ្នាំ៨ខែ២០ថ្ងៃ ដែលមានតែការកាប់សម្លាប់ គឺគ្មានសេរីភាពក្នុងការរស់នៅ គោរពជំនឿសាសនា ហេីយព្រះវិហារព្រះពុទ្ធសាសនា និងព្រះវិហារឥស្លាម ក៏ដូចជាព្រះវិហារសាសនាដទៃទៀត ត្រូវបានបំផ្លិចបំផ្លាញចោលគ្មានសេសសល់ ដោយគុណបុណ្យថ្ងៃរំដោះ ៧ មករា ១៩៧៩ យើងមានជីវិតរស់រានឡើងវិញ ជាមួយនឹងសិទ្ធិសេរីភាព និងជំនឿសាសនា ក្រោមការដឹកនាំ របស់សម្ដេចតេជោ ហ៊ុន សែន បានធ្វើការអភិវឌ្ឍលើគ្រប់វិស័យ ជាបន្តបន្ទាប់ រហូតដល់មានការរីកចម្រើនដូចសព្វថ្ងៃនេះ។
ជាមួយគ្នានេះ ឯកឧត្តមអភិបាលខេត្ត ក៏បានចូលរួមត្រេកអរសាទរ ជាមួយការសាងសង់ព្រះវិហារថ្មីនេះ ដេីម្បីតំរូវការតាម ជំនឿបងប្អូនសាសនាអ៊ីស្លាម សម្រាប់គោរពបូជា ថ្វាយបង្គំ ផងដែរ ៕
