កំពង់ធំ៖ នៅបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្រជុំពង្រឹងតួរនាទីភារកិច្ចរបស់កងកម្លាំងដើម្បីបំពេញភារកិច្ចសហការជាមួយរដ្ឋបាលព្រៃឈើ តាមការស្នើសុំពីស្ថាប័នជំនាញ និងមានការឯកភាពពីគណបញ្ជាការឯកភាពរដ្ឋបាលខេត្តកំពង់ធំ ដើម្បីបង្រ្កាបបទល្មើសដែលកំពុងតែធ្វើសកម្មភាព នៅក្នុងខេត្តកំពង់ធំ ដែលពិធីប្រជុំនេះ បានធ្វើឡើងនៅ វេលាម៉ោង៨,៣០ នាទីព្រឹកថ្ងៃទី២៩ ខែមករា ឆ្នាំ២០១៩។
ក្នុងកិច្ចប្រជុំនេះ ដោយបានអនុវត្តន៍នូវបទបញ្ជាយ៉ាងម៉ឺងម៉ាត់របស់សម្តេចអគ្គមហាសេនាបតីតេជោនាយឧត្តមសេនីយផុតលេខផ្កាយមាស៥ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា និងបទបញ្ជារបស់គណបញ្ជាការឯកភាពរដ្ឋបាលខេត្តកំពង់ធំ នៅសាលប្រជុំ មានសមាសភាពចូលរួមចំនួន ៤៦នាក់ ដែលជាកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងការចូលរួមជាមួយកងកម្លាំងគណបញ្ជាការឯកភាពរដ្ឋបាលខេត្ត ស្រុក ដើម្បីសហការបង្ក្រាបបទល្មើសព្រៃឈើ និងធនធានធម្មជាតិ ។
ឧត្ដមសេនីយ៍ទោសោម ស៊ុន មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ បានដាស់តឿនកងកម្លាំង នៅក្នុងអង្គប្រជុំថា កងកម្លាំងត្រូវបំពេញតួនាទីក្នុងកិច្ចការការពារសន្តិសុខ សុវត្ថិភាព ជូនសមត្ថកិច្ចជំនាញក្នុងការអនុវត្តន៍ច្បាប់ស្ដីពីព្រៃឈើ-មិនត្រូវពាក់ព័ន្ធឃុបឃិត ជាមួយអ្នប្រព្រឹត្តិបទល្មើសព្រៃឈើជាដាច់ខាត រួមសហការជាមួយអាជ្ញាធរដែនដី ប្រជាពលរដ្ឋ ដើម្បីផ្តល់ព័ត៌មានជូនសមត្ថកិច្ចជំនាញ ចំពោះអ្នកប្រព្រឹត្តិបទល្មើសព្រៃឈើ ដើម្បីចូលរួមក្នុងកិច្ចការពារធនធានធម្មជាតិ ។
ឧត្ដមសេនីយ៍ទោសោម ស៊ុន បានបញ្ជាក់ថា បើមានយោធិនណាម្នាក់ប្រព្រឹត្តិបទល្មើសដែលពាក់ព័ន្ធនឹងព្រៃឈើ និងធនធានធម្មជាតិ ត្រូវទទួលទោសតាមច្បាប់ និងវិន័យរបស់កងយោធពលខេមរភូមិន្ទ ដោយគ្មានការយោគយល់ឡើយ និងត្រូវខឹតខំថែរក្សាកិត្តិយស និងសេចក្ដីថ្លៃថ្នូររបស់កងយោធពលខេមរភូមិន្ទ ។ដោយ ប៊ុន រដ្ឋា
