ក្រចេះ: មន្ទីររៀបចំដែនដីនគរូបនីយកម្មសំណង់និងសុរិយោដីខេត្តក្រចេះ បានរៀបចំ សន្និបាតបូកសរុបលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ក្រោមអធិបតីភាពឯកឧត្តម ប៉ែន លីណាត អភិបាលរងខេត្តនិងឯកឧត្តម អ៊ឹម ចំរ៉ុង អនុរដ្ឋលេខាធិការតំណាងដ៏ខ្ពង់ខ្ពស់ឯកឧត្តម ជា សុផារ៉ាឧបនាយក រដ្ឋមន្ត្រីរដ្ឋមន្ត្រីរៀបចំដែនដីនគរូបនីយកម្មនិងសំណង់ដែលមានពីមន្ទីរអង្គភាពក្រុងស្រុកឃុំសង្កាត់គរុសិស្សនិងមន្ត្រីនៃមន្ទីររៀបចំដែនដី នគរូបនីយកម្មសំណង់និងសុរិយោដីប្រហែលជា២៥០នាក់។
តាមរបាយការណ៍ លោកបណ្ឌិត កៅ ម៉ាឌីឡែន ប្រធានមន្ទីររៀបចំដែនដីនគរូបនីយកម្មនិងសំណង់ បានអោយដឹងថាការងារមន្ទីរសម្រេចបាននូវសមិទ្ធផល រួមានការងាររៀបចំដែនដី និងនគរូបនីយកម្ម ការងារគ្រប់គ្រងសំណង់ ការងារសុរិយោដី ក្នុងគោលបំណងគ្រប់គ្រង និងប្រើប្រាស់ដីធ្លីឲ្យបានត្រឹមត្រូវ និងផ្តល់ប្រយោជន៍ជាអតិបរិមាដល់សង្គមជាតិហើយស្របតាមគោលការណ៍ច្បាប់កន្លងមកបានរៀបចំយុទ្ធសាស្រ្តគ្រប់គ្រងដីធ្លីដោយផ្តោតសំខាន់លើវិធានការពង្រឹងប្រព័ន្ធគ្រប់គ្រង ការលុបបំបាត់ភាពអនាធិបតេយ្យក្នុងការកាន់កាប់ដីរបស់រដ្ឋ។
ឯកឧត្តម ប៉ែន លីណាត អភិបាលរងខេត្ត បានថ្លែងអំណរគុណចំពោះមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តដែលបានរាយការណ៍អំពីសមិទ្ធផលសម្រេចបាន និងបញ្ហាប្រឈមរបស់មន្ទីរ ហើយក៏សូមថ្លែងអំណរគុណចំពោះឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ព្រមទាំងថា្នក់ដឹកនាំគ្រប់ជាន់ថ្នាក់របស់ក្រសួង ដែលតែងតែយកចិត្តទុកដាក់និងជួយជម្រុញការដោះស្រាយទំនាស់និងការបញ្ជូនគ្រូឧទ្ទេសដើម្បីបណ្តុះបណ្តាលដល់មន្ត្រីរបស់យើងដើម្បីបង្កើនសមត្ថភាព និងពង្រឹងប្រសិទ្ធភាពការងារបន្ថែមទៀត។
ឯកឧត្ដមអ៊ឹម ចំរ៉ុង អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ជា សុផារ៉ា ឧបនាយករដ្ឋមន្ត្រីរដ្ឋមន្ត្រីក្រសួងរៀបដែនដីនគរូបនីយកម្មនិងសំណង់ បានជម្រុញអោយមានការយកចិត្តទុកដាក់បន្តរសម្រាប់ការងារឆ្នាំ២០១៩ សុំពន្លឿនការងារចុះបញ្ជីដីធ្លីចុះបញ្ជីដីរដ្ឋដីសមូហភាពរបស់បងប្អូនជនជាតិដើមភាគតិច ដោយធ្វើការសម្របសម្រួលជាមួយអាជ្ញាធរភូមិឃុំស្រុកនៃតំបន់វិនិច្ឆ័យ ដើម្បីជៀសវាងការថ្នាំងថ្នាក់ពីប្រជាពលរដ្ឋព្រមទាំងខិតខំដោះស្រាយវិវាទជូនប្រជាពលរដ្ឋឲ្យបានទាន់ពេលវេលានិងប្រកបដោយប្រសិទ្ធភាព ។
ក្នុងនោះឯកឧត្ដមស្នើអោយអាជ្ញាធរខេត្ត សុំឲ្យបន្តតាមដានត្រួតពិនិត្យនិងធ្វើស្ថិតិប្រជាពលរដ្ឋដែលបានមករស់នៅ ធ្វើកាន់កាប់ដីសម្បទានសង្គមកិច្ចស្ថិតនៅក្នុងស្រុក ព្រមទាំងបន្តការសិក្សាស្រាវជ្រាវប្រជាពលរដ្ឋដែលខ្វះដី គ្មានដីនិងមានតម្រូវការដីពិតប្រាកដដើម្បីសាងសង់លំនៅឋាន និងធ្វើកសិកម្មជាលក្ខណៈគ្រួសារ ។ និងសូមឲ្យមន្ទីរបន្តខិតខំយកចិត្តទុកដាក់លើការងារត្រួតពិនិត្យសំណង់ និងលក្ខណៈបច្ចេកទេសសំណង់ព្រមទាំងសោភណ្ឌភាព សណ្តាប់ធ្នាប់នៃសំណង់និងបន្តត្រួតពិនិត្យសំណង់ខុសច្បាប់ដោយផ្សារភ្ជាប់ជាមួយការងារផ្សព្វផ្សាយលិខិតបទដ្ឋានគតិយុត្តជាធរមាន៕ដោយប៊ុន មនោ
