កំពង់ចាម: អភិបាលរង នៃគណៈអភិបាលខេត្តកំពង់ចាម ថ្មីមួយរូបទៀត ត្រូវបានប្រកាសចូលកាន់មុខតំណែង នាព្រឹកថ្ងៃទី៣០ ខែមករា ឆ្នាំ២០១៩ ក្រោមអធិបតីភាពឯកឧត្តម លេង វី រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រីក្រសួងមហាផ្ទៃ ឯកឧត្តមខ្លូត ផន ប្រធានក្រុមព្រឹក្សាខេត្ត និងឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម ដោយពិធីនេះក៏មានការអញ្ជើញចូលរួមពីលោក លោកស្រី មន្ទីរអង្គភាពពាក់ព័ន្ធជុំវិញខេត្ត និងអភិបាល អភិបាលរងក្រុង-ស្រុក ថ្នាក់ដឹកនាំកងកម្លាំងប្រដាប់អាវុធទាំង១០ក្រុង-ស្រុកផងដែរ។
ដោយលោកស្រី ប៉ាង ដានី មកពីមន្ទីរសុខាភិបាលខេត្តកំពង់ចាម ត្រូវទទួលតំណែងជាអភិបាលរង នៃគណៈអភិបាលខេត្តកំពង់ចាម ជំនួយលោកជំទាវ ស្រី គីមឆយ ដែលត្រូវជ្រេីសតាំងជាតំណាងរាស្ត្រ។
ថ្លែងក្នុងពិធីនោះ ឯកឧត្តម គួច ចំរើន អភិបាលខេត្តកំពង់ចាម បានជំរុញដល់មន្ត្រីពាក់ព័ន្ធ ក៏ដូចជាអាជ្ញាធរមូលដ្ឋានទាំងអស់ ត្រូវជួយធ្វើការផ្សព្វផ្សាយ សូមឲ្យប្រជាពលរដ្ឋ កុំបន្តធ្វើការសាបព្រោះស្រូវប្រាំជាលើកទី២ ព្រោះគ្រោះរាំងស្ងួតនឹងកេីតមានឡើងក្នុងខែមេសានិងឧសភា ខាងមុខនេះ ដែលនឹងមិនមានទឹកគ្រប់គ្រាន់សម្រាប់ស្រោចស្រពដំណាំកសិផលនោះទេ ហើយថែមទាំងអាចខ្វះខាតទឹក ហេីយប៉ះពាល់ដល់សត្វចិញ្ចឹម និងសត្វព្រៃទៀតផង។
ជាមួយគ្នានោះ ឯកឧត្តមអភិបាល ក៏បានរំលឹកថា យើងធ្លាប់ប្រទះគ្រោះរាំងស្ងួតម្តងរួចមកហើយ កាលពីឆ្នាំ២០១៦កន្លងទៅ ដោយមានការគាំទ្រពីក្រសួងកសិកម្ម រុក្ខាប្រមាញ់ និងនេសាទ និងដៃគូអភិវឌ្ឍន៍នានា បានជីកអណ្តូងទឹកជាច្រើនកន្លែង ដូច្នេះសូមឲ្យមន្ត្រីយេីងចុះទៅពិនិត្យមើល តើវាមានការខូចខាតអស់ប៉ុន្មាន ហេីយនៅសេសសល់ប៉ុន្មានអណ្តូង ត្រូវប្រមូលទិន្នន័យឲ្យបានច្បាស់លាស់ ដើម្បីធ្វើការស្តាឡើងវិញ ទុកជូនប្រជាពលរដ្ឋប្រេីប្រាស់។ ជាពិសេសទៀតនោះ គឺត្រូវជំរុញដល់សេវាក ត្រូវខិតខំតបណ្ដាញទឹក ទៅដល់តំបន់នានាដែលមិនទាន់មានទឹក ឲ្យបានឆាប់រហ័សផងដែរ។
ឯកឧត្តម លេង វី រដ្ឋលេខាធិកាក្រសួងមហាផ្ទៃ បានថ្លែងផ្តាំផ្ញេីរ ដល់លោកជំទាវអភិបាលរងខេត្ត ដែលទេីបតែទទួលតំណែងថ្មី ត្រូវយកចិត្តទុកដាក់ ក្នុងការបំពេញភារកិច្ច បម្រេីប្រជាពលរដ្ឋ ឲ្យបានល្អប្រសេីរ ផងដែរ ៕