ពោធិសាត់៖ ឯកឧត្តម ម៉ៅ ធនិន អភិបាលនៃគណះអភិបាល ខេត្តពោធិ៍សាត់ រួមដំណើរដោយសមាជិក ក្រុម ប្រឹក្សាខេត្ត លោក លោកស្រីអភិបាលរងខេត្ត មេបញ្ជាការកងកម្លាំងប្រដាប់អាវុធ និងថ្នាក់ដឹកនាំ មន្ទីរ នានាក្នុងខេត្ត បានអញ្ជើញទៅសួរសុខទុក្ខកម្មករ កម្មការិនី រោងចក្រ
កាត់ដេរ ថៃអ៊ីស៊ី អិនធឺណាស់ សិន ណល ខូអិលធីឌី ដែលមានទីតាំងនៅភូមិប៉ប៉ិត ឃុំអន្លង់ត្នោត ស្រុកក្រគរ ។
លោកតំណាងក្រុមហ៊ុន បានជំរាបជូនថា ក្រុមហ៊ុនថៃអ៊ីស៊ី អិនធឺណាស់សិនណល ខូអិលធីឌីនេះ ជាក្រុមហ៊ុនវិនិយោគដោយប្រទេសចិន ទើបតែដំណើរការបានប្រហែលជាងមួយឆ្នាំនេះទេ ,មានផ្ទៃដីសរុប១៣០ហិកតា កំពុងដំណើរការកាត់សម្លៀកបំពាក់គ្រប់ម៉ូត ទាំងបុរសនារីនិងកូនក្មេង ហើយកំពុងតែសាងសង់អគារបន្ថែម ។ មកដល់ពេលនេះ មានកម្មករបំរើការងារក្នុងរោងចក្រ ៧០០០នាក់ ក្នុងនោះស្រី៦០០០នាក់ និងកំពុងតែជ្រើសរើសបន្តទៀត ដើម្បីគម្រប់តម្រូវការ២៥.០០០នាក់ ។
កម្មករកម្មការិនីម្នាក់ៗ ទទួលបានប្រាក់ខែគោលចំនួន១០០ដុល្លា និងមានប្រាក់ម៉ោងបន្ថែមតាមជំនាញជិត១០០ដុល្លាទៀត ទៅតាមបុគ្គលដែលព្យាយាមតស៊ូ ។ សព្វថ្ងៃនេះរោងចក្រខ្វះកម្មករ កម្មការិនីធ្វើការច្រើន ហើយកំពុងតែជ្រើសរើសបន្ថែមរាល់ថ្ងៃ ដែលគ្រាន់តែដាក់ពាក្យចូលមិនទាន់បានធ្វើការផង ក៍ក្រុមហ៊ុនគិតឲ្យម្នាក់មួយដុល្លាដែរក្នុងមួយថ្ងៃ ។ ក្រុមហ៊ុនអនុវត្តន៍ទៅតាមច្បាប់ការងារ មិនធ្វើអ្វីឲ្យប៉ះពាល់ដល់សិទ្ធិកម្មករ កម្មការិនីនោះទេ ។
ឯកឧត្តម ម៉ៅ ធនិន អភិបាលនៃគណះអភិបាលខេត្ត បានសំដែងការរីករាយ ដែលខេត្តពោធិ៍សាត់ មានរោងចក្រកាត់ដេរដ៍ធំមួយ ស្រូបយកកម្មករ កម្មការិនីដែលជាកូនចៅរបស់ប្រជាពលរដ្ឋក្រីក្រ នៅតាមជនបទ ដែលខ្លះមិនបានរៀនសូត្រជ្រៅជ្រះ និងខ្លះគ្មានការងារធ្វើ បានមកធ្វើការនៅទីនេះ ទទួលបានប្រាក់កំរ៉ៃចិញ្ចឹមជីវិត សំរាប់អនាគតរបស់ពួកគេ ។ ទាំងនេះក៍ដោយសាររាជរដ្ឋាភិបាល ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជជាណាចក្រកម្ពុជា មានទំនាក់ទំនងល្អជាមួយបរទេស បើកទ្វាឲ្យគេចូលមកធ្វើការ វិនិយោគក្នុងប្រទេសកម្ពុជាយើង ។
ឯកឧត្តមសូមឲ្យថៅកែរោងចក្រកាត់ដេរ ជ្រើសរើសកម្មករបុរស នារីឲ្យស្មើគ្នាកុំឲ្យយកតែនារីៗ ព្រោះបុរសក៍គ្មានការងារធ្វើច្រើនដែរ ។ ឯកឧត្តមអភិបាលខេត្ត បានផ្ដាំផ្ញើឲ្យកម្មករ កម្មការិនីទាំងអស់ ខិតខំធ្វើការ គោរពវិន័យការងារ ប្រកាន់ខ្ជាប់នូវប្រពៃណីខ្មែរ និងបានអំពាវនាវដល់កូនចៅប្រជាពលរដ្ឋផ្សេងទៀត នាំគ្នាមកដាក់ពាក្យចូលបំរើការងារនៅក្នុងរោងចក្រកាត់ដេរ នៅស្រុកក្រគរនេះឲ្យបានច្រើន ព្រោះក្រុមហ៊ុនតម្រូវការដល់ទៅ២៥.០០០នាក់ឯណោះ ឥឡូវទើបតែបាន៧០០០នាក់ទេ ។ ទោះបីប្រាក់ខែតិចជាងក្រៅប្រទេស ប៉ុន្តែនៅជិតផ្ទះជួបជុំឪពុកម្ដាយបងប្អូន ចៀសវាងទៅធ្វើពលករនៅប្រទេសគេ ត្រូវគេមើលងាយមើលថោក និង វាយធ្វើបាបដូចសត្វធាតុ ហើយមិនប្រាកដថា ពេលត្រឡប់មកវិញ សល់លុយច្រើនជាងអ្នកនៅក្នុងស្រុកនោះដែរ ៕