ឧត្តរមានជ័យ. អភិបាលខេត្តឧត្តរមានជ័យ ឯកឧត្តម ស ថាវី និងឯកឧត្តម យឹម ធិន ប្រធានក្រុមប្រឹក្សាខេត្ត បានដឹកនាំមន្ត្រីគ្រប់ស្ថាប័នដូចជា មន្ត្រីសូរិយោដី មន្ត្រីរដ្ឋបាលព្រៃឈើ មន្ត្រីបរិស្ថាន និងអាជ្ញាធរមូលដ្ឋានស្រុក បានចុះទៅពិនិត្យជាក់ស្តែង ធ្វើការកំណត់ព្រំដីទីទួលសុវត្ថិភាព
របស់សម្តេចតេជោ ហ៊ុន សែន និងបែងចែកឱ្យបានច្បាស់លាស់នូវតំបន់ត្រួតស៊ីគ្នា រវាងក្រុមហ៊ុនសំរោងរ៉ាប់ប៊ើ នឹងដីព្រៃដីសហគមន៍ព្រៃឈើ ហើយក៏បានបញ្ឈប់ដល់ប្រជាពលរដ្ឋចំនួន៨១គ្រួសារ មិនឱ្យកាប់ទន្ទ្រានដីព្រៃសហគមន៍ ដោយរងចាំក្រុមការងារជំរឿនស្ថិតិមូលដ្ឋានកម្មរបស់ប្រជាពលរដ្ឋ ធ្វើការរៀបចំដីឱ្យ ដែលស្ថិតនៅចំណុចជប់ត្រកួន ជាប់ដែនព្រៃស្អាក់ ក្នុងស្រុកអន្លង់វែង ខេត្តឧត្តរមានជ័យ។ លោក គឹន កាណារិទ្ធ ជាអ្នកទទួលបន្ទុកធ្វើការឈូសឆាយ និងកំណត់ព្រំដីទីទួលសុវត្ថិភាពសម្តេចតេជោ បានឱ្យដឹងថា តំបន់ដីទីទួលសុវត្ថិភាពមានទំហំ
៦៤៤ហិចតា សំរាប់តម្រូវការប្រើប្រាស់នៅពេលមានសភាពការកើតឡើងចាំបាច់តាមបន្ទាត់ព្រំដែន និងគ្រោះមហន្តរាយផ្សេងៗដែលកើតឡើង។ តាមសំដីប្រជាពលរដ្ឋចំនួន៨១គ្រួសារ បានលើកឡើងថា ពួកគាត់បានមកស៊ីឈ្នួលកាប់ព្រៃឱ្យទាហានម្នាក់ឈ្មោះ សោម ហូវ បានជួលពួកគាត់ក្នុង១ហិចតា តំលៃ១០០$ នឹងឱ្យពួកគាត់បង្កបង្កើនផលចំនួន២ឆ្នាំ ហើយអ្នកណាកាប់ព្រៃបាន ៣ហិចតា នឹងចែកដីឱ្យ១ហិចតា នៅពេលដែលគាត់បានអាស្រ័យផលបាន១ឆ្នាំផង ក៏ស្រាប់ឈ្មោះសោម ហូវ បានទៅដេញពួកគាត់ចេញ ព្រមទាំងមិនឱ្យពួកគាត់រស់នៅ
លើ ១ហិចតាទៀត ហើយពេលនោះក៏មានឈ្មោះ សេង សេរីវុធ ហៅវ៉ា បានមកដាំកូនកៅស៊ូនៅលើដីពួកគាត់ ដោយខ្លាចមិនហ៊ានទៅរស់នៅលើដីរបស់ខ្លូនវិញ ពួកគាត់ក៏នាំគ្នាទៅលួចកាប់ព្រៃសហគមន៍ និងព្រៃទីទួលសុវត្ថិភាព។ លោក គឹន ណាការិទ្ធ បានបញ្ជាក់ថា នៅពេលចុះឈូសឆាយឃ្លុំដីបម្រុងរបស់ទីទួលសុវត្ថិភាព បានប៉ះពាល់លើដីប្រជាពលរដ្ឋមួយចំនួន ហើយខាងលោក បានកាត់ឃ្លាលដីចំនួន១៧០ហិចតា ប្រគល់ទៅឱ្យប្រជាពលរដ្ឋ។ ដោយឡែកសំរាប់តំណាងសហគមន៍សាមគ្គីព្រៃឈើបានលើកឡើងថា ដំបូងឡើយប្រជាពលរដ្ឋមានចំនួនតែ១៤
គ្រួសារប៉ុណ្ណោះ ដែលមកកាប់ព្រៃនៅចំណុចជប់ត្រកួននេះ(ដែលបច្ចុប្បន្នឈ្មោះ សេង សេរីវុធ ហៅវ៉ា កំពុងដាំកូនកៅស៊ូលើផ្ទៃ ១៧០ហិចតា) តែខាងសហគមន៍មិនបានឃាត់សួរនាំទេ ព្រោះនៅក្រៅដែនរបស់ខ្លួន ហើយនៅពេលកាប់ព្រៃវាលអស់ ពួកគាត់១៤គ្រួសារបានមកលួចកាប់រុករានដីព្រៃសហគមន៍ តែតំណាងសហគមន៍ឃាត់សួរនាំ ពួកគាត់ឆ្លើយថា ដីកំពុងរស់នៅ ត្រូវឈ្មោះ សោម ហូវ បានមកដេញពួកគាត់ចេញ ហើយក្នុងករណីនេះប្រជាពលរដ្ឋក៏បានឆ្លើយសារភាពថា ពួកគាត់បានទៅលួចកាប់ព្រៃសហគមន៍ពិតមែន ដោយឡែកចាប់តាំងពីឈ្មោះ
សេង សេរីវុធ ហៅវ៉ា បានមកដាំកូនកៅស៊ូនៅលើដីប្រជាពលរដ្ឋចំនួន១៤គ្រួសារ ហើយប្រជាពលរដ្ឋមានការកើនឡើងរហូតដល់ចំនួន៨១គ្រួសារ ដែលក្នុងនោះបានបូករួមទាំងកម្មករកៅស៊ូផងដែរ។ បន្ទាប់មកឯកឧត្តម ស ថាវី បានធ្វើការសំណូមពរដល់ប្រជាពលរដ្ឋឱ្យឈប់កាប់ទន្ទ្រានព្រៃឈើព្រៃសហគមន៍ តទៅទៀត ហើយប្រជាពលរដ្ឋចំនួន ៨១គ្រួសារ មិនថាតែប្រជាពលរដ្ឋមកពីណានោះឡើយ ឯកឧត្តមនឹងធ្វើឱ្យក្រុមការងារធ្វើស្ថិតិមូលដ្ឋានអចិន្ត្រៃយ៍លើដីឱ្យបានពិតប្រាកដ ជាការឆ្លើយតបដោះស្រាយដីឱ្យបានគ្រប់ៗគ្នា ក្នុងនោះគ្រួសារកងទ័ពចំនួន៣៤
គ្រួសារ នៃអង្គភាពកងពលតូចអន្តរាគមន៍លេខ៥ ឯកឧត្តមក៏បានសន្យាដោះស្រាយរួមជាមួយ៨១គ្រួសារដែរ។ ហើយឯកឧត្តមបានលើឡើងថា សូមកុំជឿទៅតាមការឃោសនារបស់ជនអគតិមួយចំនួន ហើយបើប្រជាពលរដ្ឋណាមានដីបង្កបង្កើនផល កាន់កាប់រាប់ឆ្នាំហើយនៅត្រឹមណា ត្រូវបោះបង្គោលព្រំរបស់ខ្លួនឱ្យច្បាស់លាស់ ហាមលុកចូលទៅកាប់ដីព្រៃផ្សេងទៀត ជាពិសេសអាជ្ញាធរមូលដ្ឋាន កងកម្លាំងប្រដាប់អាវុធ និងស្ថាប័នពាក់ព័ន្ធនានា ត្រូវចុះទៅហាមឃាត់រាល់សកម្មភាពកាប់ទៅទន្ទ្រានដីទីទួលសុវត្ថិភាព ឬព្រៃសហគមន៍ រក្សាបម្រុងរបស់រដ្ឋ ទាំងរូបភាពផ្សេងៗ ដែលរក្សាទុករបស់ខេត្តឧត្តរមានជ័យ។
