រាជធានីភ្នំពេញៈ ឯឧ.ហ៊ុន ម៉ានី តំណាងរាស្ត្រមណ្ឌលកំពង់ស្ពឺ ដែលបានចូលរួមក្នុងសកម្មភាពសង្គមជាច្រើនយ៉ាសកម្មនោះបានថ្លែងអំណរគុណយ៉ាងជ្រាលជ្រៅដល់សមាជិកយុវជនគ្រប់ស្រទាប់ដែលបានចំណាយទាំងកម្លាំង កាយ ចិត្ត និងធនធានថវិកាក្នុងការជួយ
សម្រួលដល់ដំណើរវិលត្រឡប់មកកាន់មាតុភូមិកំណើតវិញរបស់បងប្អូនពលករចំណាកស្រុកមកពីប្រទេសថៃកន្លងមកនេះ។ នេះបើតាមបណ្តាញទំនាក់ទំនងសង្គមរបស់ខ្លួន កាលពីថ្ងៃទី២៣ មិថុនា ២០១៤ កន្លងទៅនេះ។ យើងសូមអនុញ្ញាតស្រង់យកខ្លឹមសារទាំងស្រុងមកចុះផ្សាយដូចតទៅ៖ តាងនាមឲ្យក្រុមគ្រួសារសហភាពសហព័ន្ធយុវជនកម្ពុជា (ស.ស.យ.ក.) ខ្ញុំសូមថ្លែងអំណរគុណដល់អ្នកស្ម័គ្រចិត្ត សសយក ទាំងអស់ ដែលបានចូលរួមជួយសម្រួលដល់កម្មករកម្មការិនីខ្មែរដែលត្រឡប់មកពីប្រទេសថៃវិញ ក្នុងរយៈពេលប៉ុន្មានសប្តាហ៍មកនេះ។
យុវជនស្ម័គ្រចិត្ត ស.ស.យ.ក. បានបង្ហាញឆន្ទៈច្បាស់លាស់ ការលះបង់ ការតាំងចិត្តខ្ពស់ ក្នុងការធ្វើជាប្រយោជន៍ដល់ សហគមន៍ សង្គម ប្រទេសជាតិ និងប្រជាជនរបស់យើង និងនៅពេលនេះ គឺក្នុងការផ្តល់ជំនួយដល់បងប្អូនកម្មករពេលខ្លះនៅក្រោមកម្តៅថ្ងៃ ពេលខ្លះក្រោមដំណក់ភ្លៀង ទោះជាមានភាពនឿយហត់ និងជម្ងឺ ។ ស.ស.យ.ក. ក៏សូមថ្លែងអំណរគុណដល់អាជ្ញាធរខេត្ត កងកម្លាំងប្រដាប់អាវុធ យុវជនកាយរឹទ្ធិ និងកាកបាទក្រហម អង្គការមិនមែនរដ្ឋាភិបាល និងជាពិសេសប្រជាជនទាំងអស់ ដែលបានអនុញ្ញាតឲ្យយើងខ្ញុំចូលរួមក្នុងការបំពេញភារកិច្ចដ៏ត្រចះនេះចំពោះប្រជាជន និងប្រទេស។
យុវជនស្ម័គ្រចិត្តរបស់យើងបានផ្តល់ជំនួយ និងជួយសម្រួលយ៉ាងសស្រាក់សស្រាំរបស់ខ្លួន នាពេលកន្លងមកនេះ ហើយដោយនៅពេលនេះ ចំនួនកម្មករដែលត្រឡប់មកវិញមានចំនួនតិច ស.ស.យ.ក. សូមបញ្ចប់ភារកិច្ចរបស់ខ្លួន និងត្រឡប់ទៅតាមមូលដ្ឋានខេត្តក្រុងរបស់ខ្លួនវិញនៅទូទាំងប្រទេស។ ស.ស.យ.ក. តែងតែត្រៀមខ្លួនរួចជាស្រេច ក្នុងករណីមានតម្រូវការឲ្យផ្តល់ជំនួយដល់បងប្អូនកម្មករដែលត្រឡប់មកវិញថែមទៀត។ ជាថ្មីម្តងទៀត ខ្ញុំមានមោទនភាពជាសមាជិកមួយរូបនៃក្រុមគ្រួសារ ស.ស.យ.ក. ហើយគ្រប់សកម្មភាពទាំងអស់ដែលផ្តល់ផលជាវិជ្ជមានដល់សហគមន៍ និងប្រទេសរបស់យើង គឺជាជោគជ័យរបស់ ស.ស.យ.ក.៕
