កំពង់ធំ៖ សកម្មភាពមនុស្សធម៌ របស់ឯកឧត្តមឧត្ដមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជា ខេត្តកំពង់ធំ បានធ្វើឲ្យសប្បុរសជន ចូលរួម គាំទ្រ និងបានផ្តល់ អង្ករចំនួន២តោន ជូនបញ្ជាការដ្ឋានតំបន់ប្រតិបត្តិការសឹករងកំពង់ធំ ដើម្បីបំវិស័យមនុស្សធម៌ ដែលកំពុងតែជួបការលំបាកនិងខ្វះខាត ។
ជាក់ស្តែង លោកឆាង សារ៉ាត និងភរិយា ម្ចាស់សណ្ឋាគារ និងភោជនីយដ្ឋានអរគុណរះខេត្តកំពង់ធំបានជួយឧបត្ថម្ភអង្ករចំនួនមួយតោន និងលោកទុំ គឹមហឿន និងភរិយា កូនប្រុសឯកឧត្ដមណាំ ទុំ អតីតអភិបាលខេត្តកំពង់ធំ បច្ចុប្បន្នសមាជិកព្រឹទ្ធសភាបានជួយឧបត្ថម្ភអង្ករចំនួនមួយតោន សរុបចំនួន ២តោន ជូនដល់ថ្នាក់ដឹកនាំនៃអង្គភាពតំបន់ប្រតិបត្តិការសឹករងកំពង់ធំ សម្រាប់បម្រើឲ្យវិស័យមនុស្សធម៌ នៅព្រឹកថ្ងៃទី០៥ ខែមិនា ឆ្នាំ២០១៩ ។
សកម្មភាពរបស់ ឧត្ដមសេនីយ៍ទោសោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ និងសហការី កន្លងមកបានជួយដល់ការផ្គត់ផ្គត់ចង្ហាន់ព្រះសង្ឃ ដែលគង់រៀនសូត្រខ្វះខាតចង្ហាន់ប្រចាំថ្ងៃ ជួយដល់ប្រជាពលរដ្ឋទីទ័លក្រ និងអតីតយុទ្ធជនដែលមានជីវភាពលំបាកខ្វះខាត នៅគ្រប់ទីកន្លែងក្នុងខេត្តកំពង់ធំដែលជាការចូលរួម ចំណែកជួយដល់សង្គមជាតិ ក្នុងវិស័យមនុស្សធម៌ ។
មហាជនបានកោតសរសើរ សកម្មភាពការងារមនុស្សធម៌ របស់ឧត្ដមសេនីយ៍ទោសោម ស៊ុន ដែលជានិច្ចជាកាលតែងតែយកចិត្តទុកដាក់ជួយដោះស្រាយដល់ជីវភាពលំបាកខ្វះខាតជូនប្រជាជន និងអតីតយុទ្ធជន ដោយមិនគិតពីថ្ងៃឈប់សម្រាកឬការនឿយហត់ឡើយ ថ្នាក់ដឹកនាំទាំងអស់ បានប្តេជ្ញាចិត្តយកអំណោយស្បៀងអាហាររបស់សប្បុរសជននេះ ទៅបម្រើសេចក្តីត្រូវការរបស់ប្រជាជន និងអតីតយុទ្ធជនដែលមានជីវភាពលំបាកខ្វះខាតពិតប្រាកដនៅតាមមូលដ្ឋាននានានៅក្នុងខេត្តកំពង់ធំ ហើយសូមថ្លែងអំណរគុណដ៍ជ្រាលជ្រៅជាទីបំផុតចំពោះ សម្បុរសជន សូមបានប្រកបដោយពុទ្ឋពរទាំងបួនប្រការគឺអាយុ វណ្ណៈ សុខះ និងពលះ កុំបីឃ្លៀងឃ្លាតឡើយ ។
ដោយ ប៊ុន រដ្ឋា
