កំពង់ចាម: ឯកឧត្តម គួច ចំរើន អភិបាល នៃគណៈអភិបាលខេត្តកំពង់ចាម បានអញ្ជើញជាអធិបតីភាពក្នុងពិធីប្រកាសចូលកាន់មុខតំណែង អភិបាលរង នៃគណៈអភិបាលស្រុកជេីងព្រៃ ដែលពិធីនេះត្រូវបានប្រារព្ធឡើងនាព្រឹកថ្ងៃទី៥ ខែមីនា ឆ្នាំ២០១៩ ដោយមានការអញ្ជើញចូលរួមពី លោក លោកស្រី អភិបាលរងខេត្ត មន្ទីរ អង្គភាពពាក់ព័ន្ធជុំវិញខេត្ត និងមន្ត្រីការិយាល័យជុំវិញស្រុក មេឃុំ មេភូមិ ជាច្រើនរូបផងដែរ។
ដោយលោក ជិន ហ៊ុ ត្រូវបានតែងតាំងជាអភិបាលរង នៃគណៈអភិបាលស្រុកជេីងព្រៃ ជំនួសលោក កិម នឿន ដែលត្រូវចូលនិវត្តន៍។ថ្លែងក្នុងពិធីនោះដែរ ឯកឧត្តម គួច ចំរើន អភិបាលខេត្តកំពង់ចាម បានកោតសរសើរចំពោះសកម្មភាពការងារដឹកនាំ និងការអភិវឌ្ឍលេីគ្រប់វិស័យនាពេលកន្លងមក ក្នុងការដោះស្រាយការងារនៅអង្គភាព ការផ្តល់សេវាសាធារណៈ សេវារដ្ឋបាល ជូនដល់បងប្អូនប្រជាពលរដ្ឋ ទទួលបានលទ្ធផលល្អប្រសើរ។
ជាមួយគ្នានោះ ឯកឧត្តមអភិបាលខេត្ត ក៏បានមានមតិផ្តាំផ្ញើដល់ អភិបាលរង ស្រុកជេីងព្រៃ ដែលទើបបានប្រកាសតែងតាំងថ្មីនេះ ឲ្យមានការសាមគ្គីភាពផ្ទៃក្នុង នៅក្នុងអង្គភាពរវាងថ្នាក់លើ និងថ្នាក់ក្រោម ព្រមទាំងត្រូវមានគំនិតផ្តួចផ្តើម មនសិការការងារខ្ពស់ ប្រកបដោយតម្លាភាព និងគណនេយ្យភាព ។ ឯកឧត្តម បន្តទៀតថា ត្រូវយកចិត្តទុកដាក់លើការសម្របសម្រួលដោះស្រាយបញ្ហការងារប្រកបដោយភាពឈ្លាសវៃ មានចក្ខុវិស័យ ទិសដៅ ផែនការច្បាស់លាស់ ព្រមទាំងត្រូវខិតខំបញ្ចេញឲ្យអស់ពីសមត្ថភាព លទ្ធភាពទេពកោសល្យ លើកគុណភាពការងារ ក្នុងស្មារតីយកចិត្តទុកដាក់ និងការទទួលខុសត្រូវខ្ពស់ចំពោះមុខថ្នាក់ដឹកនាំក្រសួងមហាផ្ទៃ និងចំពោះគណៈអភិបាលខេត្ត រដ្ឋបាលខេត្ត លើវិស័យការងារដែលខ្លួនបំពេញតួនាទីផងដែរ ៕
