` កំពង់ស្ពឺៈ បន្ទាប់ពីទទួលបានការទុកចិត្តពីប្រជាពលរដ្ឋ ក្នុងការបោះឆ្នោតនាខែកក្កដា ឆ្នាំមុន ឯឧ.ហ៊ុន ម៉ានី តំណាងរាស្ត្រមណ្ឌលកំពង់ស្ពឺ បានចូលរួមក្នុងសកម្មភាពសង្គមជាច្រើន និងលេចធ្លោ ជាច្រើនកន្លែង។ ជាក់ស្តែង បុត្រាសម្តេចតេជោរូបនេះ បានចូលរួម ជាអធិបតី និងកាត់ខ្សែបូក្នុងពិធីសម្ពោធសមិទ្ធផលនានានៅវត្តសុខារាម ស្ថិតក្នុងឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ នាថ្ងៃទី១ ខែកក្កដា ឆ្នាំ២០១៤នេះ។
ក្នុងពិធីសម្ពោធនេះ ដោយមានការចូលរួមពីក្រុមការងារ ក្រុមយុវជន ប្រជាពលរដ្ឋ ព្រះសង្ឃ ចាស់ព្រឹទ្ធាចារ្យ ជាពិសេសយុវជនកាកបាទក្រហមកម្ពុជា និងក្រុមកាយឬទ្ធិ សិស្សានុសិស្ស លោកគ្រូអ្នកគ្រូយ៉ាងច្រើនកុះករ។ ដូចរាល់ដងដែរ បន្ទាប់ពីសាកសួរសុខទុក្ខដល់លោកយាយ លោកតា ចាស់ព្រឹទ្ធាចារ្យ គណៈកម្មការ អាចារ្យ សិស្សានុសិស្ស ដោយភាពស្និទ្ធស្នាល និងនឹករឭកនោះ ឯឧ.ហ៊ុន ម៉ានី ក៏បានមានប្រសាសន៍ថ្លែងអំណរគុណដល់ពុកម៉ែបងប្អូនពូមីងអ៊ំយាយតា ដែលតែងតែចូលរួមគ្នាកសាងសមិទ្ធផលនានាយ៉ាងច្រើនសន្ធឹកសន្ធាប់ រាប់ទាំងផ្លូវពុទ្ធចក្រ និងអាណាចក្រ ហើយបន្ទាប់មកឯឧ.ហ៊ុន ម៉ានី ក៏បានកាត់ខ្សែបូសម្ពោធសមិទ្ធផលនានានៅវត្តសុខារាម ស្រុកឧដុង្គ ខេត្តកំពង់ស្ពឺ ដាក់ឲ្យប្រើប្រាស់ចាប់ពីពេលនេះតទៅ៕