ភ្នំពេញ៖អត្ថបទដោយៈនៅ នីតា រូបភាពដោយៈ វ៉ាន់ ណារិទ្ធិ(ក្រុមទី៥) រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ច បានអំពាវនាវឲ្យមន្ត្រីរបស់ ក្រសួងជម្រុញការអនុវត្តការងារ សម្រាប់ឆមាសទី ០២ នៃឆ្នាំ ២០១៤ ឲ្យមានប្រសិទ្ធភាព និង បង្កើនស្មារតីយកចិត្តទុកដាក់ខ្ពស់ ។ ការថ្លែងបែបនេះគឺធ្វើឡើងតាមរយៈ កិច្ចប្រជុំត្រួតពិនិត្យការងាររយៈពេល ០៦ ខែ របស់ក្រសួង ទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ច ដែលធ្វើឡើងនៅរសៀលថ្ងៃទី ០៣ ខែកក្កដានេះ នៅទីស្តីការក្រសួង ។
លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនង ជាមួយរដ្ឋសភា-ព្រឹទ្ធសភា និង អធិការកិច្ច បានលើកឡើងនៅក្នុងអង្គប្រជុំថា កិច្ចប្រជុំនេះធ្វើឡើងដើម្បីរួមគ្នាត្រួតពិនិត្យ និង ធ្វើការបូកសរុបលទ្ធផលការងារ ដែលបានអនុវត្តក្នុងរយៈពេលមួយឆមាសកន្លងមក និង ដើម្បីពិភាក្សា និង ផ្លាស់ប្តូរយោបល់ ។ លោកជំទាវបានថ្លែងឲ្យដឹងទៀតថា ក្នុងរយៈពេលមួយឆមាសកន្លងមកនេះ ក្រសួងបានសម្រេចលទ្ធផលគួរឲ្យកត់សម្គាល់ដូចជា ការងារផ្សព្វផ្សាយច្បាប់ ការងារទទួលពាក្យបណ្តឹង និង អង្កេតស្រាវជ្រាវការងារទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ច។
លើសពីនេះលោកជំទាវក៏បានថ្លែងឲ្យដឹងថា ក្រសួងក៏បានរៀបចំវេទិកាសាធារណៈស្របតាមអនុសាសន៍របស់សម្តេចតេជោនាយករដ្ឋមន្ត្រី ដោយផ្តល់ឪកាសដល់មន្ត្រីរាជការលើកឡើងនូវការលំបាកនានាដើម្បីដោះស្រាយ និង ដាក់វិធានការណ៍មួយចំនួនជម្រុញដល់ការអនុវត្តតាមវិស័យការងារនីមួយៗឲ្យកាន់តែប្រសើរ និង បានអំពាវនាវឲ្យមន្ត្រីរបស់ក្រសួងជម្រុញការអនុវត្តន៍ការងារសម្រាប់ឆមាសទី០២ឲ្យកាន់តែមានប្រសិទ្ធភាពថែមទៀត ៕ 
