កំពង់ចាម: ឯកឧត្តមបណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត អមដំណើរដោយ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជើញជាគណៈអធិបតីក្នុងពិធីសម្ពោធដាក់ឲ្យប្រើប្រាស់នូវបណ្ណាល័យ១ខ្នង ខ្លោងទ្វារ ស្រះទឹក និងរបងវិទ្យាល័យ ហ៊ុន សែន ព្រៃទទឹង ស្ថិតនៅឃុំជ្រៃវៀន ស្រុកព្រៃឈរ ខេត្តកំពង់ចាម ដែលពិធីនេះត្រូវបានប្រារព្ធឡើងនាព្រឹកថ្ងៃទី១៦ ខែមីនា ឆ្នាំ២០១៩ ដោយមានការអញ្ជេីញចូលរួមពី លោក លោកស្រី អភិបាលរងខេត្ត មន្ទីរអង្គភាពពាក់ព័ន្ធជុំវិញខេត្ត ព្រមទាំងលោកគ្រូ អ្នកគ្រូ ប្អូនៗសិស្សានុសិស្ស និងបងប្អូនប្រជាពលរដ្ឋជាច្រើនផងដែរ។
ជាមួយនឹងការអបអរសាទរចំពោះសមិទ្ធផលថ្មីនេះ ឯកឧត្តម គួច ចំរើន អភិបាលខេត្តកំពង់ចាម ក៏បានថ្លែងជុំរុញដល់មន្ត្រីពាក់ព័ន្ធ ត្រូវយកចិត្តទុកដាក់ ក្នុងការជួយផ្សព្វផ្សាយ ជុំវិញបញ្ហាគ្រោះរាំងស្ងួត នារដូវប្រាំងនេះ គឺសូមឲ្យបងប្អូនប្រជាពលរដ្ឋ ចូលរួមតាមដានជាមួយនឹងព្រឹត្តិការណ៍នេះ ជាពិសេសការចូលរួមថែទាំ គ្រប់គ្រងទឹករបស់យេីង ទុកសម្រាប់ត្រៀមបង្ការក្នុងការប្រើប្រាស់ ព្រោះបេីតាមទិន្នន័យដែលក្រសួងធនធានទឹកនិងឧតុនិយម បានបន្តការជូនដំណឹងជាបន្តបន្ទាប់មកនោះ ឃើញថាស្ថានភាពគ្រោះរាំងស្ងួតហួតហែងនេះ នឹងនៅបន្តអូសបន្លាយពេលវេលា តទៅមុខវែងឆ្ងាយទៀត ហេីយក៏សូមឲ្យមន្ត្រីរបស់យើង ត្រូវចុះពិនិត្យ ជួយជួសជុលអណ្តូងចាស់ និងបន្តជីកអណ្តូងថ្មី ឬស្រះទឹកបន្ថែមទៀត ជូនប្រជាពលរដ្ឋយេីង យកទឹកទុកសម្រាប់ប្រេីប្រាស់។ ពាក់ព័ន្ធជាមួយនឹងគ្រោះស្ងួតហួតហែង ដែលងាយបង្កជាគ្រោះអគ្គីភ័យឆាបឆេះនេះដែរ ឯកឧត្ដមអភិបាលខេត្ត ក៏បានអំពាវនាវដល់ បងប្អូនប្រជាពលរដ្ឋ ត្រូវយកចិត្តទុកដាក់ក្នុងការតាមដានមើល ខ្សែបណ្ដាញអគ្គិសនីផង ព្រោះពេលដែលតភ្ជាប់បណ្ដាញ តំរូវការប្រេីប្រាស់ក្នុងផ្ទះយេីងវាមានកំរិតទាប ដោយបច្ចុប្បន្ននេះប្រទេសជាតិយើង មានសុខសន្តិភាព និងមានការអភិវឌ្ឍន៍ជាបន្តបន្ទាប់ ហើយសម្ភារៈប្រើប្រាស់ទំនើបៗ ក្នុងផ្ទះយើងក៏សម្បូរបែប ចំពោះខ្សែបណ្ដាញអគ្គិសនីចាស់ៗ វាមិនមានសុវត្ថិភាពក្នុងការប្រើប្រាស់ទេ ដែលអាចទុស្សេ បង្កជាគ្រោះអគ្គីភ័យទៀតផង ដូច្នេះចាំបាច់យេីងត្រូវផ្លាស់ប្ដូរខ្សែភ្លេីងថ្មី ដែលមានគុណភាពខ្ពស់ផងដែរ។
ឯកឧត្ដម អភិបាលខេត្ត ក៏បានលើកឡើងផងដែរថា ដោយឆ្លើយតបទៅនឹងក្តីព្រួយបារម្ភ របស់បងប្អូនប្រជាពលរដ្ធ ចំពោះបញ្ហាជំងឺឆ្កែឆ្កួតនោះ គឺមានក្រុមគ្រូពេទ្យនៃវិទ្យាស្ថានប៉ាស្ទ័រកម្ពុជា បានចុះបេសកកម្មផ្ដល់សេវាវ៉ាក់សាំងការពារជំងឺឆ្កែឆ្កួត នៅមន្ទីរពេទ្យ ខេត្តកំពង់ចាមយេីងហេីយ ។ ដូច្នេះ បើបងប្អូនណាម្នាក់ ដែលរងរបួសដោយសារបញ្ហា សត្វខាំ ឬខ្វាច សូមប្រញាប់ប្រញ៉ាល ទៅកាន់មន្ទីរពេទ្យខេត្តកំពង់ចាម ដើម្បី ឲ្យគ្រូពេទ្យជំនាញ បានពិនិត្យ ព្យាបាល និងចាក់វ៉ាក់សាំងបង្ការ ទាន់ពេលវេលា ។ ប៉ុន្តែ អ្វីដែលសំខាន់នោះ វ៉ាក់សាំងនេះ បានផ្ដល់អាទិភាព ចំពោះ តែប្រជាពលរដ្ឋណា ដែលរងរបួសដោយសារសត្វចិញ្ចឹម ដូចជាត្រូវឆ្កែខាំ ឆ្មាខាំ ឬខ្វាច តែប៉ុណ្ណោះ ដូច្នេះសូមបងប្អូនមកទទួលសេវានេះ ឲ្យបានគ្រប់ៗគ្នា។
ជាមួយគ្នានោះ ឯកឧត្ដម បណ្ឌិត ហ៊ុន ម៉ាណែត បានធ្វេីការសាកសួរសុខទុក្ខជាមួយបងប្អូនប្រជាពលរដ្ឋ និងសិស្សានុសិស្ស លោកគ្រូអ្នកគ្រូ ដោយភាពស្និទ្ធស្នាល និងរីករាយបំផុត ។ លោកលើកឡើងថា សុខសន្តិភាព និងស្ថិរភាពសង្គម ជាផ្នែកមួយដ៏សំខាន់មិនអាចកាត់ថ្លៃបានសម្រាប់ការអភិវឌ្ឍបានរំលេចឡើងនូវសមិទ្ធិផល អគារ ផ្លូវ ស្ពានថ្នល់ ហេដ្ឋារចនាសម្ព័ន្ធនានា មានការរីកដុះដាលជាបន្តបន្ទាប់។ ឯកឧត្ដមបានក្រើនរំឭកដល់ពលរដ្ឋគ្រប់រូប ត្រូវចេះរួមគ្នាថែរក្សាសុខសន្តិភាព ស្ថិរភាពនយោបាយ ក្រោមការដឹកនាំ របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី នៃព្រះរាជាណាចក្រកម្ពុជា និងបានជំរុញ ឲ្យសិស្សានុសិស្សខិតខំប្រឹងប្រែងរៀនសូត្រ ដើម្បីក្លាយជាទំពាំងស្នងឬស្សី និងក្លាយជាយុវជនគំរូ កូនល្អ សិស្សល្អ មិត្តល្អ និងពលរដ្ឋល្អក្នុងសង្គម ៕