កំពង់ធំ៖ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ បានអញ្ជើញ ប្រគល់ ខ្នងផ្ទះទី១១៤ ដែលជាអំណោយដ៏ថ្លៃថ្លារបស់សម្ដេចតេជោហ៊ុន សែន ប្រធានសមាគមអតីតយុទ្ធជនកម្ពុជា បានប្រគល់ជូនគ្រួសារអតីតយុទ្ធជនពិការ រស់នៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ។
ឯកឧត្តម ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំក្រុមការងារ សមាគមអតីតយុទ្ធជនកម្ពុជា ខេត្ត ដែលមានការចូលរួម ពីសំណាក់អាជ្ញាធរ ដែនដី មកប្រគល់ផ្ទះ ដែលជា ជាអំណោយសម្ដេចតេជោហ៊ុន សែន ជូន លោក ជ័យ ចយ នៅរសៀលថ្ងៃអាទិត្យទី១៧ខែមីនា ឆ្នាំ២០១៩ ខ្នងផ្ទះនេះ មានទំហំ៤ម៉ែត្រx៦ម៉ែត្រ សាងសង់ពីឈើ ជញ្ជាំងនិងរនាបក្តារ ដំបូលប្រក់ស័ង្កសី ដែលត្រូវបានចំណាយថវិកាក្នុងការសាងសង់អស់ទឹកប្រាក់ចំនួន៦,៩៨៥,០០០ រៀល ។
នៅក្នុងឳកាសចុះប្រគល់ផ្ទះជូនដល់អតីតយុទ្ធជនពិការ ឯកឧត្តម ឧត្តមសេនីយ៍ទោ សោម ស៊ុន បានពាំនាំ យកអំណោយសម្តេចតេជោ ហ៊ុន សែន តាមរយះឯកឧត្តម បណ្ឌិតហ៊ុន ម៉ាណែត ប្រគល់ជូនគាត់បន្ថែមដែលមានអង្ករចំនួន៥០គីឡូក្រាម មីយើងចំនួន២កេស ទឹកត្រីទឹកស៊ីអ៊ីវចំនួន២យួរ និងថវិកាចំនួន២០០,០០០ រៀល ។
លោកជ័យ ចយ ជាអតីតយុទ្ធជនពិការ មានអាយុ៤៦ ឆ្នំា ធ្លាប់ចូលបម្រើកងទ័ពនៅឆ្នាំ១៩៨៦ នៅអង្គភាពយោធាស្រុកកំពង់ស្វាយ ខេត្តកំពង់ធំ ក្រោយមកក៏បានធ្លាក់ខ្លួនពិការ ដោយសាររបួសក្នុងសមរភូមិនាសម័យសង្គ្រាមនៅឆ្នាំ១៩៨៩ មានភរិយាឈ្មោះឡុង សំអ៊ិន អាយុ៤៥ ឆ្នំា មានកូនចំនួន៤ នាក់ ស្លាប់២នាក់ លោក ជ័យ ចយ ជាអតីតយុទ្ធជនពិការ រួមទាំងភរិយា បានសម្តែងនូវក្តីរំភើប ត្រេតអរយ៉ាងខ្លាំង ដែលបាន ទទួលផ្ទះថ្មីពីសម្តេចតេជោ ហ៊ុន សែន ប្រមុខរាជរដ្ឋាភិបាល បានយកចិត្តទុកដាក់មកលើក្រុមគ្រួសាររបស់ ពួកគាត់ ដែលជាអតីតយុទ្ធជន ដោយមិនឲ្យអស់សង្ឃឹមក្នុង កិច្ចការពារជាតិកន្លងមក។
ឯកឧត្តម ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ ក៏បានមានប្រសាសន៍ថា ដោយបានអនុវត្តយ៉ាងម៉ឺងម៉ាត់ ពីការចង្អុលណែនាំ ពីសំណាក់ ឯកឧត្តម ទេសរដ្ឋមន្រ្តីគន់ គីម អគ្គលេខាធិការសមាគមអតីតយុទ្ធជនកម្ពុជា ឲ្យមើលថែ. បំរើ. ដោះស្រាយ .ចូលរួមសុខទុក្ខ ជាមួយនឹងគ្រួសាររបស់អតីតយុទ្ធជន ដែលមានជីវភាពលំបាកខ្វះខាត ត្រូវចុះសួរសុខទុក្ខជាប្រចាំ ដែលប្រកាន់ភ្ជាប់នូវពាក្យមួយឃ្លាថា ( ទុក្ខសោករបស់អតីតយុទ្ធជន គឺជាទុក្ខសោករបស់ថ្នាក់ដឹកនាំសមាគម អតីតយុទ្ធជន) ។
ដោយ ប៊ុន រដ្ឋា
