កំពង់ចាមៈ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជើញចូលរួមប្រារព្ធទិវាជាតិ បង្ការ និងពន្លត់អគ្គីភ័យលើកទី៣ សំរាប់ខេត្តកំពង់ចាម ដែលពិធីនេះត្រូវបានប្រារព្ធឡើង នាព្រឹកថ្ងៃទី១៩ ខែមីនា ឆ្នាំ២០១៩ នៅវិទ្យាល័យ ហ៊ុន សែន ព្រៃទទឹង ស្ថិតក្នុងភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម ដោយមានការអញ្ជើញចូលរួមពី លោក លោកស្រី អភិបាលរងខេត្ត មន្ទីរអង្គភាពពាក់ព័ន្ធជុំវិញខេត្ត កងកម្លាំងប្រដាប់អាវុធទាំង៣ និងបងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សជាច្រើននាក់ផងដែរ។
លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានធ្វេីសេចក្តីីរាយការណ៍ អំពីសភាពការណ៍គ្រោះអគ្គីភ័យ ដែលកើតមានឡើង ក្នុងភូមិសាស្ត្រខេត្តកំពង់ចាម ក្នុងឆ្នាំ២០១៨ មានចំនួន៣៤លេីក បណ្តាលឲ្យឆេះផ្ទះ២៨ខ្នង និងស្លាប់មនុស្សម្នាក់ បេីប្រៀបធៀបទៅនឹងឆ្នាំ២០១៧ កេីនឡើងចំនួន១៧លេីក។
ដោយឡែកក្នុងត្រីមាសទី១ ឆ្នាំ២០១៩នេះ គ្រោះអគ្គីភ័យ បានកេីតមានឡេីងចំនួន១១លេីក បណ្តាលឲ្យឆេះផ្ទះ២៨ខ្នង កុដិលោក១ខ្នង និងរបួសស្រាលមនុស្ស២នាក់។ លោកស្នងការបានបញ្ជាក់ថា បច្ចុប្បន្នយេីងមាន រថយន្តពន្លត់អគ្គីភ័យសរុបចំនួន១៥គ្រឿង ក្នុងនោះរថយន្តកែច្នៃ០១គ្រឿង ដេីម្បីធានាក្នុងកិច្ចប្រតិបត្តិការជួយអន្តរាគមន៍ទាន់ពេលវេលា ពេលដែលមានគ្រោះអគ្គីភ័យកេីតឡើងនោះ យើងបានធ្វេីការបែងចែករថយន្តពន្លត់អគ្គីភ័យ ទៅតាមបណ្ដាស្រុកចំនួន៩ ដែលមានរថយន្តចំនួន១២គ្រឿង ទុកនៅស្នងការដ្ឋាន០៣គ្រឿង។
ក្នុងនោះក៏មានការបង្ហាញពីសកម្មភាពជួយ អន្តរាគមន៍ពន្លត់អគ្គីភ័យមានលក្ខណៈសាមញ្ញ ដោយប្រើប្រាស់ភួយជ្រលក់ទឹក បាលប្រភេទពន្លត់អគ្គីភ័យ បំពង់ពន្លត់អគ្គីភ័យ ដែលជាវិធីសាស្ត្រសង្គ្រោះបឋមក្នុងពេលមានគ្រោះអគ្គីភ័យ និងការប្រើប្រាស់រថយន្តពន្លត់អគ្គីភ័យ ចេញជួយអន្តរាគមន៍ពេលមានគ្រោះអគ្គីភ័យកេីតឡេីងផងដែរ ។
ឆ្លៀតក្នុងឱកាសនោះ ឯកឧត្តម គួច ចំរើន អភិបាលខេត្តកំពង់ចាម បានថ្លែងកោតសរសើរ ដល់កងកម្លាំងនគរបាលដែលកន្លងមក បានខិតខំប្រឹងប្រែងយកចិត្តទុកដាក់ ក្នុងការជួយអន្តរាគមន៍ពន្លត់អគ្គីភ័យ ជូនបងប្អូនប្រជាពលរដ្ឋបានទាន់ពេលវេលា នៅពេលដែលមានគ្រោះអគ្គីភ័យកើតឡើងម្តងៗ ។
ជាមួយគ្នានោះ ឯកឧត្ដមអភិបាលខេត្ត ក៏បានអំពាវនាវដល់គ្រប់គ្រឹះស្ថានទាំងរដ្ឋ និងឯកជន អាជីវករ និងបងប្អូនប្រជាពលរដ្ឋទាំងអស់ ត្រូវបង្កើនការសហការចូលរួមជាមួយអាជ្ញាធរ និងសមត្ថកិច្ចជំនាញនៅក្នុងការអនុវត្តវិធានការបង្ការ ទប់ស្កាត់ ធ្វើយ៉ាងណាកុំឲ្យមានករណីគ្រោះអគ្គីភ័យកើតឡើង ជាពិសេស នារដូវក្ដៅនេះ ត្រូវបង្កើនការប្រុងប្រយ័ត្នគ្រប់ពេល ចំពោះរាល់ដើមហេតុទាំងឡាយដែលអាចបង្កឲ្យកើតមានគ្រោះអគ្គីភ័យ ដូចជាភ្លើងចង្រ្កាន ភ្លើងចង្កៀង ភ្លើងទៀនធូប ភ្លើងដុតសំរាម ភ្លើងកម្ទេចបារី ចរន្តអគ្គិសនី ផ្ទាំងសូឡា ហ្គាស ឧស័្មន និងរាល់វត្ថុផ្សេងៗទៀត ដែលងាយឆេះ និងងាយផ្ទុះឆេះ ជាដើម។
ហើយឯកឧត្តមក៏សំណូមពរដល់ បងប្អូនប្រជាពលរដ្ឋ ត្រូវយកចិត្តទុកដាក់ក្នុងការតាមដានមើល ខ្សែបណ្ដាញអគ្គិសនីផង ព្រោះពេលដែលតភ្ជាប់បណ្ដាញ តំរូវការប្រេីប្រាស់ក្នុងផ្ទះយេីងវាមានកំរិតទាប ដោយបច្ចុប្បន្ននេះប្រទេសជាតិយើង មានសុខសន្តិភាព និងមានការអភិវឌ្ឍន៍ជាបន្តបន្ទាប់ ហើយសម្ភារៈប្រើប្រាស់ទំនើបៗ ក្នុងផ្ទះយើងក៏សម្បូរបែប ចំពោះខ្សែបណ្ដាញអគ្គិសនីចាស់ៗ វាមិនមានសុវត្ថិភាពក្នុងការប្រើប្រាស់នោះទេ ដែលអាចទុស្សេ បង្កជាគ្រោះអគ្គីភ័យទៀតផង ដូច្នេះបេីចាំបាច់យេីងត្រូវផ្លាស់ប្ដូរខ្សែភ្លេីងថ្មី ដែលមានគុណភាពខ្ពស់ផងដែរ ៕