កំពង់ឆ្នាំង៖ ជនសង្ស័យប្រុសស្រីចំនួន៦នាក់ ជាអ្នកជួញដូរចែកចាយនិងប្រើប្រាស់ថ្នាំញៀន ត្រូវសមត្ថកិច្ចឡោមព័ទ្ធចាប់បានទាំងយប់ខណៈសមត្ថកិច្ចចុះទៅសំរុះសំរួលពីករណីអំពើហឹង្សាប្តីប្រពន្ធមួយគូរ។ប្រតិបត្តិការបង្ក្រាបនេះ បានធ្វើឡើងនៅម៉ោង៩និង៣០នាទីយប់ថ្ងៃទី០២
ខែកក្កដា ឆ្នាំ២០១៤ នៅផ្ទះសំណាក់យីហោសុដាលីន ស្ថិតក្នុងភូមិត្រពាំងចឹកសា សង្កាត់កំពង់ឆ្នាំង ក្រុងកំពង់ឆ្នាំង។ លោក សំ សិទ្ធី អធិការក្រុងកំពង់ឆ្នាំងបានអោយដឹងថា៖ជនសង្ស័យទាំង៦នាក់នោះរួមមាន ១ឈ្មោះ មុត ចន្ថា ហៅគ្រើល អាយុ៣០ឆ្នាំ ជាមេជួញដូរនិងចែកចាយថ្នាំញៀន រស់នៅក្នុងភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង,២ឈ្មោះ ឃឹម ផល្លា ហៅអ៊ូក ភេទស្រី អាយុ៣១ឆ្នាំ,៣ឈ្មោះ គល់ សុភា អាយុ២៨ឆ្នាំ,៤ឈ្មោះ សៅ សុភារ៉ា អាយុ១៧ឆ្នាំ,៥ឈ្មោះ ស៊ុយ ប៊ុនធឿន អាយុ១៧ឆ្នាំ,និងទី៦ឈ្មោះ ជឿន ស្រីម៉ុម ភេទស្រី អាយុ២៥ឆ្នាំ ហើយអ្នកទាំង៥នាក់រស់នៅផ្ទះជួល និងផ្ទះពួកគេស្ថិតក្នុងភូមិត្រពាំងចឹកសា សង្កាត់កំពង់ឆ្នាំង។
មុនពេលឈានទៅដល់ការឡោមព័ទ្ធចាប់ខ្លួនជនសង្ស័យទាំងអស់ខាងលើ សមត្ថកិច្ចចុះទៅសំរុះសំរួលករណីអំពើហឹង្សាប្តីប្រពន្ធស្ត្រីឈ្មោះ ឃឹម ផល្លា តែនៅពេលនោះប្រភព មួយបានបង្ហើប្រាប់សមត្ថកិច្ចថា៖ឈ្មោះ ឃឹម ផល្លានេះជាអ្នកប្រើប្រាស់ថ្នាំញៀន បន្ទាប់មកសមត្ថកិច្ចក៏បានឆែកឆេររកឃើញថ្នាំញៀន២កញ្ចប់តូចក្នុងកាបូបនាង ក្រោយមកក៏ឈានទៅរកបក្ខពួកគេទាំង៥នាក់ខាងលើទៀត។ ក្រោយពីទទួលបានព័ត៌មានពិតប្រាកដ និងក្តាប់បាននូវមុខសញ្ញារួចមក លោកព្រះរាជអាជ្ញារងអមសាលាដំបូងខេត្តបានដឹកនាំកម្លាំងចំនួន២៥នាក់ចុះ
ឡោមព័ទ្ធនិងបង្ក្រាបនៅទីតាំងផ្ទះសំណាក់យីហោ សុដានីន ដោយចាប់បានជនសង្ស័យចំនួន៥នាក់ ព្រមទាំងវត្ថុតាងរួមមាន៖ថ្នាំញៀនម៉ាទឹកកកចំនួន២កញ្វប់ធំ និង២១កញ្ចប់តូច,លុយចំនួន៨ម៉ឺនរៀល,ទូរស័ព្ទដៃ៤គ្រឿង,និងឧបករណ៍សំរាប់ជក់ថ្នាំញៀនមួយចំនួនថែមទៀត។ នៅព្រឹកថ្ងៃទី០៣ ខែកក្កដានេះ សមត្ថកិច្ចនគរបាលក្រុងបានកសាងសំណុំរឿងបញ្ជូនទៅការិយាល័យនគរបាលប្រឆាំងការជួញដូរគ្រឿងញៀននៃស្នងការនគរបាលខេត្ត ដើម្បីស្រាវជ្រាវ និងកសាងសំណុំរឿងបញ្ជូនខ្លួនជនសង្ស័យទាំងអស់បន្តទៅសាលាដំបូងខេត្តចាត់ការតាមនីតិវិធីនិងផ្តន្តាទោសតាមបញ្ញត្តិច្បាប់៕