កំពង់ចាម: ឯកឧត្តម គួច ចំរើន អភិបាល នៃគណៈអភិបាលខេត្តកំពង់ចាម បានជំរុញឲ្យ មន្ត្រីសុខាភិបាល ត្រូវសហការជាមួយនឹងអាជ្ញាធរមូលដ្ឋាន ដេីម្បីចូលរួមក្នុងការទប់ស្កាត់ការដើរចាក់ថ្នាំដោយខុសច្បាប់ ពីសំណាក់ក្រុមគ្រូពេទ្យដែលគ្មានអាជ្ញាប័ណ្ណ ឬជំនាញច្បាស់លាស់ ។
ការថ្លែងបែបនេះ ឯកឧត្ដម គួច ចំរើន អភិបាលខេត្តកំពង់ចាម បានលើកឡើងក្នុងពិធីបិទអង្គសន្និបាតបូកសរុបការងារសុខាភិបាល ខេត្តកំពង់ចាម លេីកទី២២ ឆ្នាំ២០១៨ និងទិសដៅភារកិច្ច ឆ្នាំ២០១៩ របស់មន្ទីរសុខាភិបាលខេត្តកំពង់ចាម នារសៀលថ្ងៃទី២៥ ខែមីនា ឆ្នាំ២០១៩ នៅសាលប្រជុំ មន្ទីរសុខាភិបាលខេត្តកំពង់ចាម ។
ថ្លែងក្នុងពិធីនោះដែរ ឯកឧត្ដមអភិបាលខេត្ត បានលើកឡើងថា ចាប់ពីពេលនេះតទៅ មន្ត្រីសុខាភិបាល ត្រូវសហការជាមួយនឹងអាជ្ញាធរមូលដ្ឋាន ដេីម្បីធ្វើការផ្សព្វផ្សាយអំពីផលប៉ះពាល់ ចំពោះការទទួលសេវាចាក់ថ្នាំដោយខុសច្បាប់ គឺសូមឲ្យក្រុមគ្រូពេទ្យ នៅតាមភូមិនានា ដែលបេីកអាជីវកម្មដោយគ្មានច្បាប់ទម្លាប់ ឬជំនាញច្បាស់លាស់នោះ គឺត្រូវបញ្ឈប់សកម្មភាពជាបន្ទាន់ ។ ឯកឧត្ដមអភិបាលខេត្ត ក៏បានសង្កត់ធ្ងន់ថា ចាប់ពីថ្ងៃទី១ ខែមិថុនា ឆ្នាំ២០១៩នេះតទៅ គឺសូមឲ្យគណៈបញ្ជាការឯកភាព ក្រុង-ស្រុក ត្រូវអនុវត្តន៍វិធានការទប់ស្កាត់ ជាមួយនឹងការដើរចាក់ថ្នាំដោយខុសច្បាប់ ដោយជំហានដំបូងត្រូវអនុវត្តន៍វិធានការរដ្ឋបាល គឺត្រូវធ្វើការអប់រំណែនាំ ប៉ុន្តែបេីក្រុមគ្រូពេទ្យគ្មានអាជ្ញាប័ណ្ណទាំងនោះ មិនព្រមបញ្ឈប់សកម្មភាពរបស់ខ្លួនទេនោះ គឺត្រូវអនុវត្តន៍វិធានការតាមផ្លូវច្បាប់តែម្តង ពោលគឺមិនអនុញ្ញាតឲ្យមានការដើរចាក់ថ្នាំដោយខុសច្បាប់ តទៅទៀតទេ ដែលវាអាចប៉ះពាល់ដល់អាយុជីវិតបងប្អូនប្រជាពលរដ្ឋផងដែរ ។
លោក វេជ្ជបណ្ឌិត គឹមសួរ ភីរុណ ប្រធានមន្ទីរសុខាភិបាលខេត្តកំពង់ចាម បានឲ្យដឹងថា បច្ចុប្បន្ននេះ មន្ត្រីសុខាភិបាល ដែលកំពុងបម្រើការងារទូទាំងខេត្តកំពង់ចាម មានចំនួនសរុប១,០៧៧នាក់ ក្នុងនោះស្រុកប្រតិបត្តិមានចំនួន០៩ មន្ទីរពេទ្យខេត្តមាន០១ (កំរិត៣) មន្ទីរពេទ្យបង្អែកថ្នាក់ស្រុក មានចំនួន០៤(កំរិត២) មន្ទីរពេទ្យបង្អែកថ្នាក់ស្រុក មានចំនួន០៤(កំរិត១) មណ្ឌលសុខភាព មានចំនួនសរុប៨៩កន្លែង ចំពោះការប្រើប្រាស់សេវាសុខាភិបាល ក្នុងឆ្នាំ២០១៨ បានពីគ្រោះជម្ងឺរបស់ប្រជាពលរដ្ឋទាំង២ភេទ និងគ្រប់វ័យទូទាំងខេត្ត មានចំនួនសរុប ៧៤០.០៧៨ ករណី ក្នុងនោះជម្ងឺចូលសម្រាកព្យាបាលនៅតាមមូលដ្ឋាន សុខាភិបាលសាធារណៈទូទាំងខេត្ត មានចំនួនសរុប ៤៨.៩៥៤ ករណី ពិនិត្យ ពីគ្រោះ និងវះកាត់ភ្នែក ដោយក្រុមគ្រូពេទ្យស្ម័គ្រចិត្ត របស់សាធារណរដ្ឋប្រជាមានិតចិន ចំនួន៣លេីក សរុប១៣៣៩នាក់។ សូចនាករសំខានៗ នៃកម្មវិធីសុខភាពបន្តពូជ មាតា-ទារក និងកុមារ ប្រយុទ្ធជម្ងឺឆ្លង ជម្ងឺមិនឆ្លង និងពង្រឹងប្រព័ន្ធសុខាភិបាល កំពុងបន្តសកម្មភាព។ កត្តាគន្លឹះនាំឲ្យសម្រេចបាននូវសមិទ្ធផលទាំងនេះ គឺដោយមានការគាំទ្រដ៏រឹងមាំរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ធមន្រ្តីនៃព្រះរាជាណាចក្រកម្ពុជា និងមានការគាំទ្រពីក្រសួងសុខាភិបាល ជាពិសេស ឯកឧត្ដម អភិបាលខេត្តកំពង់ចាម ផងដែរ ៕