កំពង់ចាម: ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត បានអញ្ជើញចុះទៅធ្វើការណែនាំដល់ មន្ត្រីរាជការ ក្នុងស្រុកកំពង់សៀម ឲ្យយកចិត្តទុកដាក់ ក្នុងការបម្រើសេវាសាធារណ: ជូនប្រជាពលរដ្ឋ ឲ្យកាន់តែល្អប្រសើរឡើងថែមទៀត។ ដែលពិធីនេះត្រូវបានធ្វើឡើងនាព្រឹកថ្ងៃទី២៧ ខែមីនា ឆ្នាំ២០១៩ នៅសាលប្រជុំសាលាស្រុកកំពង់សៀម ដោយមានការចូលរួមពី មេប៉ុស្តិ មេឃុំ ស្មៀនឃុំ មន្ត្រីជំនាញ និងថ្នាក់ដឹកនាំសាលាស្រុកកំពង់សៀម ផងដែរ។
ឯកឧត្តម គួច ចំរើន អភិបាលខេត្តកំពង់ចាម បានថ្លែងថា ការចុះមកបំពេញបេសកកម្មរបស់ថ្នាក់ដឹកនាំខេត្ត នាពេលនេះ គឺដើម្បីស្ដាប់នូវចំណុចខ្វះខាត នឹងធ្វើការណែនាំ អប់រំ ដល់មន្ត្រីគ្រប់លំដាប់ថ្នាក់ ក្នុងមូលដ្ឋាន ឲ្យយកចិត្តទុកដាក់ ក្នុងការអនុវត្តតួនាទី ភារកិច្ច ស្របទៅតាមនីតិវិធីច្បាប់ និងគោលការណ៍ណែនាំនានា ដោយជៀសវាងការអនុវត្តភារកិច្ច ទៅតាមទម្លាប់ ក៏ដូចជា ការអនុវត្ត ដោយរំលោភអំណាច និងដែនសមត្ថកិច្ចគ្នា ។ 
ឯកឧត្ដមអភិបាលខេត្ត បានរំលឹកថា រាជរដ្ឋាភិបាលកម្ពុជា កំពុងអនុវត្តគោលនយោបាយកំណែទម្រង់លើគ្រប់ផ្នែកគ្រប់វិស័យ ចាប់តាំងពីឆ្នាំ២០០២ មកម៉្លេះ និងមានរយៈពេល ១៧ឆ្នាំ កន្លងទៅហើយ ។ ដោយឡែក ក្នុងអាណត្តិ ទី៦នេះ រាជរដ្ឋាភិបាល កំពុងផ្ដោតទៅលើ ការអនុវត្តនូវអភិក្រមទាំង ៥ មានដូចជា ៖ ងូតទឹក ដូសក្អែល ឆ្លុះកញ្ចក់ ព្យាបាល វះកាត់ ។ ហើយយើងម្នាក់ៗ សុទ្ធតែបានដឹង និងបានលឺ ផងដែរ ។ យ៉ាងណាម៉ិញ មកដល់ពេលនេះ គ្មាននរណាម្នាក់ អាចគេចផុត ពីការអនុវត្តលើកំណែទម្រង់ស៊ីជម្រៅ ជាពិសេស លើការអនុវត្តនូវអភិក្រម ទី៥ ដែលអាចនិយាយបានថា មិនត្រឹមតែមន្ត្រីរាជការ ប៉ុណ្ណោះទេ សូម្បី វិស័យឯកជនក៏ត្រូវបានអនុវត្ត រួចមកហើយដែរ ពោលគឺ ជនណាដែលបានប្រព្រឹត្តខុសច្បាប់ ត្រូវមកទទួលទោស ទៅតាមផ្លូវច្បាប់ ។ 
ដូច្នេះហើយ ថ្នាក់ដឹកនាំខេត្ត មិនចង់ឃើញមន្ត្រីយើងមានកំហុស រហូតដល់ត្រូវអនុវត្តអភិក្រមទី៥ នោះទេ ទើបពេលនេះ យើងធ្វើការណែនាំ អប់រំ ក្នុងគោលបំណង ឲ្យមន្រ្តីមានសមត្ថភាព និងចំណេះដឹង ហើយផ្លាស់ប្ដូរនូវឥរិយាបទ ខិតខំអនុវត្តតួនាទី ភារកិច្ចស្នូល ដើម្បី បម្រើសេវាជូនប្រជាពលរដ្ឋ ឲ្យបានកាន់តែល្អ ប្រសើរឡើងថែមទៀត ។
ជាមួយគ្នានោះ ឯកឧត្ដមអភិបាលខេត្ត ក៏បានធ្វើការអំពាវនាវដល់បងប្អូនប្រជាពលរដ្ឋ ដែលរស់នៅក្នុងស្រុកកំពង់សៀម ឲ្យទៅកាន់ការិយាល័យច្រកចេញចូលតែមួយ របស់សាលាស្រុកកំពង់សៀម ដើម្បីឲ្យមន្ត្រីរបស់យេីង បានបម្រើសេវារដ្ឋបាលជូន ហើយបើនៅមានបញ្ហាអ្វីប្រឈម មន្ត្រីយេីងនឹងខិតខំធ្វើការដោះស្រាយជូន ជាក់ជាមិនខាន។ ហយឯកឧត្ដមអភិបាលខេត្ត ក៏បានជំរុញដល់មន្ត្រីពាក់ព័ន្ធទាំងអស់ នៅក្នុងស្រុកកំពង់សៀម ត្រូវខិតខំអភិវឌ្ឍន៍សមត្ថភាពរបស់ខ្លួន ឲ្យកាន់តែមានចំណេះដឹងខ្ពស់បន្ថែមទៀត ក្នុងការបំពេញតួនាទីបម្រើប្រជាពលរដ្ឋ ឲ្យកាន់តែមានភាពល្អប្រសើរឡើងបន្ថែមទៀត។ 
ឯកឧត្ដមអភិបាលខេត្ត ក៏បានលើកឡើងផងដែរថា ប្រមុខរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ធមន្រ្តីនៃព្រះរាជាណាចក្រ បានដំឡើងប្រាក់បៀវត្ស ជូនមន្ត្រីរាជការយេីង ជាបន្តបន្ទាប់ ដូច្នេះយើងក៏ត្រូវខិតខំប្រឹងប្រែង បំពេញភារកិច្ច បម្រើប្រជាពលរដ្ឋ ឲ្យកាន់តែខ្ជាប់ខ្ជួនឡើងបន្ថែមទៀតផងដែរ ៕
